BRN

1   Lexi axili kone kusukela akusunguleni, lexi hixiyingeliki, lexi hixivoniki hi matihlo ya ka kwezru, lexi hixilangutisiki ha hombe, ni lexi hixikhumbiki hi mavoko ya ka kwezru, mayelanu ni zritu dzra wutomi;

2   (nakone wutomi bzikhanyisiwile hiva hibzivona, kutani hibeka wumboni hitlhela himidzrungulela wutomi lebzingahelikiki lebzi abzili kone na Tatana lebzi hikhanyiseliwiki bzone)

3   lexi hixivoniki hiva hixiyingela, hamidzrungulela xone na n’wine, akuva na n’wine mitava ni wuxaka na hine. Kutlula kolanu, wuxaka lebzi bza ka kwezru bzihitlhanganisa na Tatana ni N’wanake, Yesu Kriste.

4   Kutani himitsralela minchumu leyi akuva kunyonxa kwezru kutatatiseka.

5   Ledzri hi dzrone zritu ledzri hidzriyingeliki ka yene, ledzri himitivisaka dzrone, lesvaku Xikwembu i livaningo nakone aku na munyama ni wutsrongo ka xone.

6   Loko hiku: “Hi ni wuxaka na xone”, nakuve hifamba amunyameni, hahemba funtsrhi ahiwulandzri ntiyiso.

7   Nhambitanu, loko hifamba alivaningweni svanga hesvi xone hi ntshima xinga livaningweni, hi ni wuxaka hi xihine, nakone ngati ya N’wana wa xone Yesu yahibasisa asvidohweni hinkwasvu.

8   Loko hiku: “Ahi na xidoho”, hotikanganyisa nakone ntiyiso awu kone ka hine.

9   Loko hitihlaya svidoho svezru, xone xadumbeka nakone xilulamile. Xilesvo, xingahidzrivalela svidoho svezru ni kuhibasisa awubihini hinkwabzu.

10   Loko hiku: “Ahidohanga”, hixiyenca muhembi, nakone zritu dzra xone adzri kone ka hine.