-
1 Johani 3
1 Vonani lesvaku lizrandzru ledzri Tatana ahikombiki dzrone i dzrikulu njhani! Hitlhase la hivitaniwaka vana va Xikwembu; kutani hi vana va xone. Hi xivangelo lexi, misava ayihitivi, hikusa ayixitivanga.
2 Vazrandzriwa, svosvi hi vana va Xikwembu, kambe kutatlhasa svosvi asvisikombekisiwa lesvi hitakava svone. Hasvitiva lesvaku loko akombekisiwa, hitafana na yene, hikusa hitamuvonisa xilesvi anga xisvone.
3 Kutani mani na mani lwanga ni kudumba loku mayelanu na yene awatibasisa svanga hesvi na yene abasiki.
4 Mani na mani lwayencetelaka xidoho atlula nawu; kutani xidoho i kutlula nawu.
5 Nakone n’wine masvitiva lesvaku yene akombekisiwile akuva atasusa svidoho svezru, nakone aku na xidoho ka yene.
6 Mani na mani lwatsrhamaka xikan’we na yene angadoheteli; mani na mani lwadohetelaka angasami amuvona, ni kumutiva angamutivi.
7 Vananga, mingakanganyisiwi hi mhunu; lweyi ayencaka lesva kululama alulamile, svanga hesvi na yene alulamiki.
8 Lweyi ayencetelaka xidoho ahuma ka Diyavulosi, hikusa Diyavulosi adoha kusukela akusunguleni. Hi svosvo sviyenciki N’wana wa Xikwembu akombekisiwa, lesvaku atatahelisa mintizro ya Diyavulosi.
9 Mani na mani lwapsaliwiki hi Xikwembu angayenceteli xidoho, hikusa mbewu ya xone yitsrhama ka yene, kutani angesvikoti kutsrhama hi kudoha, hikusa apsaliwe hi Xikwembu.
10 Vana va Xikwembu ni vana va Diyavulosi vatikombekisa hi lesvi: Mani na mani lwangayencikiki lesva kululama, angahumi ka Xikwembu, nhambi lweyi angamuzrandzrikiki makwavu.
11 Hikusa ledzri hi dzrone zritu ledzri midzriyingeliki kusukela akusunguleni, lesvaku hifanela kuzrandzranana;
12 hingafani na Kayini, lweyi ahumiki ka Mubihi kutani adlaya makwavu. Nakone amudlayele yini kee? Hilesvi mintizro ya ka kwake ayibihile, kasi leya makwavu ayilulamile.
13 Vamakwezru, mingahlamali hilesvi misava yimivengaka.
14 Hasvitiva lesvaku hihume akufeni hinhingena awuton’wini, hikusa havazrandzra vamakwezru. Lweyi angakombisikiki lizrandzru atsrhama akufeni.
15 Mani na mani lwavengaka makwavu i mudlayi wa vhanu, kutani masvitiva lesvaku aku na ni mun’we mudlayi wa vhanu lweyi wutomi lebzingahelikiki bzitsrhamaka ka yene.
16 Hitlhase la hitivaka lizrandzru hi kola ka lesvi: hilesvi yene angahifela. Kutani na hine hiboheka kufela vamakwezru.
17 Kambe loko mani na mani lwanga ni minchumu ya misava leyi ya kutihanyisa ha yone avona makwavu na apfumala, kambe ayala kumutwela wusiwana, xana lizrandzru dzra Xikwembu dzringatsrhamisa kuyini ka yene?
18 Vananga, ahizrandzreni, kunge hi nomu kumbe lidzrimi, kambe hi sviyenco ni ntiyiso.
19 Hitasvitiva hi lesvo lesvaku hisukela ka ntiyiso, nakone hitatiyisa timbilu tezru amahlweni kwake,
20 hitibzela lesvaku loko timbilu tezru tichuka tihisola, Xikwembu i xikulu kutlula timbilu tezru nakone xitiva hinkwasvu.
21 Vazrandzriwa, loko timbilu tezru tingahisoli, hivulavula hi kuntsrhunxeka amahlweni ka Xikwembu;
22 kutani xini na xini lexi hixikombelaka, Xikwembu xitahinyika, hikusa hiyingiseta svileleto sva xone nakone hiyenca minchumu leyixinyonxisaka.
23 Nakone xileleto xa xone hi lexi: hi lesvaku hifanela kupfumela avitweni dzra N’wana wa xone Yesu Kriste, ni kuzrandzranana, svanga hesvi ahileletiki ha kone.
24 Ntlhantakabidzri, lweyi ayingisetaka svileleto sva xone atsrhama xikan’we na xone, na xone xitsrhama xikan’we na yene; nakone hasvitiva lesvaku xitsrhama xikan’we na hine hi mhaka ya moya lowu xihinyikiki wone.