-
1 Johani 5
1 Mani na mani lwakholwaka lesvaku Yesu hi yene Kriste apsaliwe hi Xikwembu; kutani mani na mani lwazrandzraka lweyi angamupsala awamuzrandzra lweyi apsaliwiki hi yene.
2 Hisvitivisa xilesvi lesvaku havazrandzra vana va Xikwembu: Hi loko hizrandzra Xikwembu hitlhela hilandzra svileleto sva xone.
3 Hikusa kuzrandzra Xikwembu i kuva hihlayisa svileleto sva xone; nakone svileleto sva xone asvibindzri,
4 hikusa mun’wana ni mun’wana lweyi apsaliwiki hi Xikwembu ahlula misava. Kutani kuhlula lokuhluliki misava i lipfumelo dzrezru.
5 Hi mani lwahlulaka misava handle ka lweyi apfumelaka lesvaku Yesu i N’wana wa Xikwembu?
6 Yesu Kriste hi yene lweyi atiki hi mati ni ngati; kunge hi mati ntsena, kambe hi mati ni ngati. Kutani moya hi wone wufakazaka, hikusa moya i ntiyiso.
7 Hikuva ku ni minchumu yizrazru leyifakazaka:
8 moya, mati ni ngati, kutani lesvizrazru svatwanana.
9 Kutani loko hiyamukela wumboni lebzinyikeliwaka hi vhanu, wumboni bza Xikwembu i bzikulu kutlulisa, hikusa lebzi hi bzone wumboni lebzi Xikwembu xibzibekiki mayelanu ni N’wana wa xone.
10 Lweyi apfumelaka ka N’wana wa Xikwembu a ni wumboni lebzo andzreni kwake. Lweyi angapfumelikiki ka Xikwembu axiyence muhembi, hikusa angapfumelanga wumboni lebzi Xikwembu xibzibekiki mayelanu ni N’wana wa xone.
11 Kutani wumboni bza kone hi lebzi: Hi lesvaku Xikwembu xihinyike wutomi lebzingahelikiki, nakone wutomi lebzo bzile ka N’wana wa xone.
12 Lweyi anga ni N’wana a na bzone wutomi lebzi; lweyi angeke na N’wana wa Xikwembu anga na bzone wutomi lebzo.
13 Nimitsralele timhaka leti akuva mitasvitiva lesvaku mi ni wutomi lebzingahelikiki, n’wine mipfumelaka avitweni dzra N’wana wa Xikwembu.
14 Kutani loku hi kone kudumba loku hinga na kone amahlweni ka xone: Hi lesvaku xin’wana ni xin’wana lexi hixikombelaka hi kuya hi kuzrandzra ka xone, xahiyingela.
15 Nakone loko hisvitiva lesvaku xahiyingela ka xin’wana ni xin’wana lexi hixikombelaka, hasvitiva lesvaku hitasvikuma lesvi hisvikombeliki hikusa hisvikombele ka xone.
16 Loko mhunu wa kukazri avona makwavu na ayenca xidoho xa kukazri lexingayisikiki akufeni, aakombele, kutani Xikwembu xitamunyika wutomi; nihlaya lavangayencikiki xidoho lexiyisaka akufeni. Ku ni xidoho lexiyisaka akufeni. Ahi xone xidoho lexi niliki aahambe xikombelo hi mhaka ya xone.
17 Hinkwasvu lesvingalulamangakiki i xidoho; kambe xi kone xidoho lexingayisikiki akufeni.
18 Hasvitiva lesvaku mani na mani lwapsaliwiki hi Xikwembu angatami adoha, kambe N’wana wa Xikwembu awamuvonelela, kutani Mubihi angamukhumbi.
19 Hasvitiva lesvaku hihuma ka Xikwembu, kambe misava hinkwayu yile mavokweni ya Mubihi.
20 Kambe hasvitiva lesvaku N’wana wa Xikwembu atile, kutani ahinyike kutwisisa akuva hitativa lweyi anga wa ntiyiso. Kutani hi xikan’we ni lweyi anga wa ntiyiso, hi kola ka Yesu Kriste. Lweyi anga wa ntiyiso hi yene Xikwembu xa ntiyiso ni wutomi lebzingahelikiki.
21 Vananga, tivonelani ka svithombe.