BRN

1   Xilesvo, tsrhikani mona hinkwawu, ni maqhinga, ni wukanganyisi, ni matsrhoho, ni mahlevo.

2   Svanga svibebana lesvahakakupsaliwa, navelani ntsrwamba lowa kukala wungacheliwanga mati wa zritu, akuva mitakota kukula ha wone miya kuhulukeni,

3   loko kutani misvihanyile lesvaku Hosi yi ni wumbilu.

4   Ankama lowu mibuyaka ka yene, lweyi anga zribze ledzrihanyaka, ledzri, kunene, dzridzreliwiki hi vhanu kambe ledzringa dzra kukheteka ni ledzra lisima ka Xikwembu,

5   na n’wine, svanga mazribze lamahanyaka, mayakiwa miva yindlu ya moya akuva miva vaprista va kuxwenga, akuva mihumexa svitlhavelo sva moya lesvinyonxeliwaka hi Xikwembu hi kola ka Yesu Kriste.

6   Hikusa ndzrimana yili: “Lavisani! Nibeka zribze dzra kukheteka le Ziyoni, zribze dzra lisima dzra kusungula yindlu hi dzrone; nakone lweyi apfumelaka ka yene angaka angakhomisiwi tingana.”

7   Xilesvo, ka n’wine i wa lisima hilesvi mipfumeliki; kambe ka lavangapfumelikiki i “zribze ledzri vayaki vadzridzreliki, ledzrindzrulukiki zribze ledzra lisima dzra masungulu”,

8   ni “zribze dzra kukhunguvanyisana ni zribze dzra kuwisana”. Vakhunguvanyeka hikusa vayala kulandzra zritu, kunga lesvi vabekiseliwiki svone.

9   Kambe n’wine mi “lixaka ledzrihlawuliwiki, ntlawa wa vaprista lavanga tihosi, tiko ledzrixwengiki, ni vhanu lavanga pfindla dzra kuhlawuleka, akuva mitwalisa wukulukumba” bza lweyi amivitaneliki kuhuma amunyameni miya livaningweni dzrake ledzrihlamalisaka.

10   Hikusa khale amingali tiko, kambe svosvi mi tiko dzra Xikwembu; khale amingakombiwanga timpsalu, kambe svosvi mikombiwe timpsalu.

11   Vazrandzriwa, nimitsratsriya svanga vahlapfa ni valuveli lesvaku mifambela kule ni kunavela ka nyama, lokulwaka ni lesvi mhunu anga xisvone.

12   Tsrhamani na mi ni hanyela ledzrinene amakazri ka matiko, akuva ka lesvi vamilumbetaka ha svone svanga vayenci va lesva kubiha, vadzrumisa Xikwembu asikwini dzra kukambela ka xone, na svisukela ka mintizro yenu leya kuxonga leyi vayivoniki hi wusvavu.

13   Hi nkonta ya Hosi, tibekani ahansi ka mhunu mun’wana ni mun’wana: kumbe i hosi ya tiko hinkwadzru, svanga lwafumaka hinkwavu,

14   kumbe i tihosi ta svifundzrankulu, svanga lavazrumiwiki ha yone, akuva vakhatisa lavayencaka sva kubiha kambe vadzrumisa lavayencaka lesvinene.

15   Hikusa lesvi Xikwembu xijulaka svone hi lesvaku, hi kuyenca lesvinene, mipfala minomu ya vhanu va kumphunta lavakhanelaka sva kukala ndlela.

16   Hanyani svanga vhanu lavantsrhunxekiki, kambe mingatizrisi ntsrhunxeko wenu svanga xa kutiyimelela ha xone akuva miyenca lesva kubiha, kambe wutizrisani svanga malandzra ya Xikwembu.

17   Bekelani hinkwavu xichavu, zrandzrani nhlengeletanu hinkwayu ya vamakwavu, chavani Xikwembu, mibekela xichavu hosi ya tiko hinkwadzru.

18   Malandzra amatibeke ahansi ka vinyi va wone hi xichavu hinkwaxu, kunge ntsena ka lavanga vanene ni lava kunabzala kambe ni ka lava kukazrata.

19   Hikusa i svinene loko mhunu atiyisela hansi ka nhlomulo ni kuyenceliwa wubihi hi mhaka ya lipfalu dzrake amahlweni ka Xikwembu.

20   Hikusa svi ni lisima muni loko mibiwa hi mhaka ya kudoha migama mitiyisela? Kambe loko mitiyisela loko mixanisiwa hi mhaka ya kuyenca lesvinene, lesvo, ka Xikwembu, i svinene.

21   Hikuva mivitaneliwe svolesvi, hikusa nhambi Kriste axanisekile hi nkonta yenu, amisiyela xikombiso akuva mitalandzrelelisisa minkondzro yake.

22   Angayencanga xidoho ni xa xin’we, nhambi zritu dzra kukanganyisa adzrikumiwanga anon’wini wake.

23   Loko azrukiwa, angatlheliselanga hi kuzruketela. Loko axaniseka, angahlayanga aku: “N’wine mitasvivona kwanga!” Kambe abeke wutomi bzake amavokweni ya Lweyi ayavanyisaka hi kululama.

24   Yene hi wusvake azrwale svidoho svezru amizrini wa ka kwake, kuyencela lesvaku hifa amhakeni ya svidoho kambe hihanya amhakeni ya wululami. Hine “hidahiwile hi timbanga take.”

25   Hikusa n’wine amifana ni tihamba letilahlekiki, kambe svosvi mitlhelele ka mubzisi ni mulaviseli wa mahika yenu.