-
1 Petrosi 3
1 Hi ndlela leyifanaka, n’wine vasati, tibekani hansi ka vanuna venu, kuyencela lesvaku loko ku ni lavayalaka kuyingiseta zritu, vatakokiwa hi mahanyela ya vasati vavu, kunge hi zritu,
2 hilesvi vavoniki hi wusvavu mahanyela yenu laya kubasa ni ya xichavu.
3 Kutixongisa kwenu kungave ka minchumu ya le handle, hi malukela ya misisi ya kutlulisa mpimu ni kutibeketela minkazrazra, masindzra ni svitlan’wana sva gole kumbe kuyambala minkhancu ya kudlayelela,
4 kambe akuve ka lesvi mhunu anga xisvone hi ndzreni, hi kutixongisa lokungabolikiki ka moya wa kuzrula ni wa kutimiyelela, lokunga ka lisima ledzrikulu amahlweni ka Xikwembu.
5 Hikusa leyi hi yone ndlela leyi avatixongisa ha yone vavasati va kuxwenga lava avadumba Xikwembu, vatibeka hansi ka vanuna vavu,
6 kufana na Sara lweyi aahamba ayingiseta Abrahamu, amuvitana hosi. N’wine mindzruluke vana vake, hi kuhanya hi kuyenca lesvinene, mingachavi nchumu wa kuchukisa mbilu.
7 N’wine vanuna, hi ndlela leyifanaka, tsrhamani na vone hi kuya hi wutivi, mivatamela hi xichavu svanga hi xibza lexingatiyangakiki, xa xisati, hikuva na vone vatakuma wumbilu bza kunyikiwa wutomi xikan’we na n’wine, akuva svikhongoto svenu svingachuki svisiveliwa.
8 Hi wugamu, hinkwenu vanani ni miyanakanyu yin’we, mitwelana wusiwana, mizrandzranana svanga vamakwavu, mitsretsrelelana, mititsrongahata.
9 Mingatlheliseli wubihi hi wubihi kumbe xizruku hi xizruku. Amatsrhan’wini ya lesvo, tlheliselani hi kunavelela vambeni tinjombo, hikusa mivitaneliwe kuhanyisa xisvosvi, akuva mitada pfindla dzra nkateko.
10 Hikusa “mani na mani lwazrandzraka wutomi ni kuvona masiku lamanene afanela kuvonelela lidzrimi dzrake lesvaku dzringayenci lesva kubiha ni minomu yake lesvaku yingakhaneli madzrimi.
11 Aafulazrele lesvibihiki, ayenca lesvinene; aajule kuzrula akulandzrelela.
12 Hikusa matihlo ya Jehovha ma le henhla ka lavalulamiki, nakone tindleve take tiyingiseta xikombelo xavu, kambe wuso bza Jehovha bzibinyela lavayencaka lesva kubiha.”
13 Kunene, xana i mani lweyi atakamiyenca sva kubiha loko mihisekela lesvinene?
14 Kambe, nhambiloko michuka mixaniseka hi nkonta ya wululami, mikatekile. Nhambitanu, mingachavi lesvi vone vasvichavaka, funtsrhi mingakazrateki.
15 Kambe xwengisani Kriste svanga Hosi atimbilwini tenu, minkama hinkwayu mitsrhama na mitibekisele kutihlamulela amahlweni ka mani na mani lwajulaka kutiva ka n’wine xivangelo xa dumbo ledzri minga nadzru, kambe miyenca tanu hi moya wa kuzrula ni xichavu.
16 Tsrhamani na mi ni lipfalu ledzrinene, akuva lavakhanelaka kubiha ha n’wine vadaniseka ka xin’wana ni xin’wana lexi vamilumbetaka xone, hi kola ka hanyela dzrenu ledzrinene svanga malandzra ya Kriste.
17 Hikusa svayampsa kuxaniseka hi kuyenca lesvinene loko ali kuzrandzra ka Xikwembu kusvitsrhika sviyenceka, kutlula kuva mixaniseka hi kuyenca lesva kubiha.
18 Hikusa Kriste afe kan’we ntsena hi nkonta ya svidoho, ava mululami lwafelaka lavangalulamangakiki, akuva amitsrhindzretela ka Xikwembu. Kunene adlayiwile anyameni, kambe ahanyisiwile amoyeni,
19 lani atlheliki ayazrezrela ni mimoya ajele,
20 leyi akusunguleni yiyaliki kuyingiseta loko Xikwembu xili kazri xiyimela hi kulehisa mbilu asikwini dzra Nowa, na ngalawa yili kazri yiyakiwa, leyi vatsrongo vahulukeliki ka yone hi kola ka mati, anga 8 wa mahika.
21 Babatiso, kunga nchumu lowufanaka ni lesvo, na dzrone dzramihuluxa svosvi (kunge hi kususa nsila ya nyama, kambe hi kukombela lipfalu ledzrinene ka Xikwembu), hi kola ka kupfuxiwa ka Yesu Kriste,
22 lweyi anga xineneni xa Xikwembu, svanga hesvi ayiki tilweni, kuva kubekiwa hansi kwake tintsrumi, ni wuhosi, ni mintamu.