BRN

1   Mine, svanga mun’we wa vakulu ni mboni ya tinxanisa leti Kriste akumaniki natu, ni mun’we wa lavayaveliwiki kuphatima lokutakapfuleteliwa, nitsratsriya vakulu lavanga makazri kwenu, niku:

2   Bzisani ntlhambi wa Xikwembu lowunga makazri kwenu, miwulavisela hi kusvizrandzra, kunge hi kusindzrisiwa; kungali hi kuzrandzra mali ya kukanganyisa, kambe hi kuzrandzra kutizra;

3   mingayenci ingiki mi tihosi ta vhanu va Xikwembu lava xingamitamelisa vone, kambe miva svikombiso ka ntlhambi.

4   Kutani loko mubzisi lwenkulu atakombekisiwa, mitayamukela ngiyana leyingabunikiki ya kuphatima.

5   Hi ndlela leyifanaka, n’wine vampsha, tibekani hansi ka vakulu va vhanu. Kambe hinkwenu yambalani kutitsrongahata amakazri kwenu, hikusa Xikwembu xilwa ni lavatikulisaka, kambe lavatitsrongahataka xivakomba wumbilu.

6   Xilesvo, titsrongahatani hansi ka voko ledzra ntamu dzra Xikwembu, akuva xitamitlakuxa hi nkama wa kone,

7   na micukumetela ka xone hinkwasvu lesvimikazrataka, hikusa xazron’weka ha n’wine.

8   Tsrhamani na miyanakanyu yitlhazrihile, mingayetleli hi tihlo! Nala wenu, Diyavulosi, afambafamba kufana ni nghonyama leyibongaka, yijulaka wa kumuda.

9   Kambe simani milwa naye, mitiya mikunde alipfumelweni, na mitiva lesvaku tinxanisa letifanaka tiyencekela hinkwavu vamakwenu amisaveni!

10   Kambe, antsrhaku ka loko mixanisekilenyana, Xikwembu xa wumbilu, leximivitaneliki kuphatimeni ka xone lokungahelikiki na Kriste, xone hi ntshima xitamiwupfisa hi matlhelo hinkwawu; xitamitiyisa, xitaminyika ntamu, ximisimeka mitiya amasungulwini.

11   Ka xone akuyisiwe ntamu hi la kungahelikiki! Amen.

12   Nimitsralele papela ledzri hi mazritu matsrongo, hi voko dzra Silvhanu, lweyi, kwanga, anga makwezru lwadumbekaka, akuva nimikuca ni kumibekela wumboni lebzitiyiki bza lesvaku lebzi hi bzone wumbilu bza Xikwembu. Tsrhamani ka bzone.

13   Bandla ledzringa le Babilona, ledzringahlawuliwa na n’wine, dzramidzrungula. Na yene n’wananga Marku awamidzrungula.

14   Losananani hi kun’qutana ka lizrandzru. Kuzrula akuve na n’wine hinkwenu lavanga xikan’we na Kriste.