BRN

1   Xilesvo, xa kusungula, nitsratsriya lesvaku kuyenciwa svikombelo, svikhongoto, svitsratsriyo, ni svikhenso, na sviyenceliwa vhanu hinkwavu,

2   ni tihosi ni hinkwavu lavanga wuhosini, akuva hikota kutihanyela ha hombe na hizrulile, awuton’wini bza kuchava Xikwembu hi tindlela hinkwatu ni kuva ni xinthunzi.

3   Lesvi i svinene nakone svayamukeleka amahlweni ka Muhuluxi wezru, anga Xikwembu,

4   lexinavelaka lesvaku vhanu va mixaka hinkwayu vahuluxiwa, vativa ntiyiso.

5   Hikusa ku ni Xikwembu xin’we, ni mutlhanganisi mun’we wa Xikwembu ni vhanu, anga Kriste Yesu, wa lixaka dzra vhanu,

6   lwatinyikeliki svanga tizrulo dzringahakeleliwa hinkwavu. Lebzi hi bzo wumboni lebzi abziyimela nkama wa bzone.

7   Hi nkongometo wolowu, nibekiwe kuva muzrezri ni mupostola (lesvi nisvihlayaka i ntiyiso, anihembi), ni kuva mudondzrisi wa matiko atimhakeni ta lipfumelo ni ntiyiso.

8   Xilesvo, ninavela lesvaku, amimbangwini hinkwayu, loko vavanuna vahamba svikhongoto, vatlakuxa mavoko ya kubasa, na vange na mahlundzru kumbe kuphikisana.

9   Hi ndlela leyifanaka, na vone vavasati vafanela kutixongisa hi mpahla ya kutsrhamiseka, vakombisa lesvaku vatichava tingana nakone va ni miyanakanyu leyitizraka ha hombe; vangatixongisi hi malukela ya misisi, kumbe gole kumbe tindzralama, kumbe timpahla leta kudula kutlulisa mpimu,

10   kambe vatixongisa hi minchumu leyixongelaka vavasati lavatihlayaka lesvaku vachava Xikwembu, yinga mintizro leyinene.

11   Wansati aadondzre na amiyelile hi kutibeka hansi hinkwaku.

12   Anipfumeleli wansati lesvaku adondzrisa kumbe afuma wanuna, kambe aamiyele.

13   Hikusa kuzrange kuhambiwa Adamu, kugama kulandzra Evha.

14   Nakone, Adamu ahi yene angakanganyisiwa, kambe wansati hi yene angakanganyisiwa hi kuhelela agama atlula nawu.

15   Nhambitanu, wansati atahuluxiwa hi kupsala vana; ntsena svojula lesvaku atsrhama alipfumelweni, ni le lizrandzrwini, ni le kuxwengeni, na a ni miyanakanyu leyitizraka ha hombe.