BRN

1   Zritu ledzri dzradumbeka, ledzriliki: Loko mhunu anavela kuva mulaviseli, anavela ntizro lowunene.

2   Xilesvo, mulaviseli afanela kuva lwangasolekiki, ava nuna wa nsati mun’we ntsena, ava lwatikhomaka, ava ni miyanakanyu leyitizraka ha hombe, ava lwabekisekiki, azrandzra kuyamukela vayeni, akota kudondzrisa,

3   angavi lwazrandzraka bzala, angavi wa kubanana, kambe ava mhunu wa kunabzala, angazrandzri timholova, angazrandzri mali,

4   ava lwazrangelaka ha hombe ndangu wa ka kwake, lwanga ni vana lavatibekaka hansi hi xinthunzi hinkwaxu,

5   (hikusa loko mhunu angasvitivi kuzrangela ndangu wa ka kwake, xana atadzribekisisa kuyini bandla dzra Xikwembu?),

6   angavi lweyi angandzruluka mukriste svosvinyana, kuyencela lesvaku angachuki atikukumuxa awela kuyavanyisiweni loku Diyavulosi angakukuma.

7   Handle ka lesvo, afanela kutiviwa hi minchumu leyinene hi vhanu va le handle, akuva angachuki awela tinganeni ni le ntlhan’wini wa Diyavulosi.

8   Hi ndlela leyifanaka, vatizreli vafanela kuva vhanu lavanga ni xinthunzi, vangahembi, vangazrandzri kunwa ngopfu bzala, vangavi lavazrandzraka mali ya kuyikuma hi kukanganyisa,

9   vava lavativaka kubekisa xihundla xa lipfumelo hi lipfalu ledzribasiki.

10   Nakone, avazrange hi kukambiwa, antsrhaku vayenciwa vatizreli, loko kunge na nchumu lowu vasoliwaka ha wone.

11   Na vone vavasati vafanela kuva lavanga ni xinthunzi, vangazrandzri kuhleva, vatikhoma, vadumbeka atimhakeni hinkwatu.

12   Mutizreli kujuleka ava nuna wa nsati wun’we ntsena, azrangela ha hombe vanake ni ndangu wa ka kwake.

13   Hikusa lavayenciki ha hombe ntizro wa mutizreli vatinyika ndhuma leyinene nakone vakota kuvulavula na vangatilumalumi hi lipfumelo ledzringa ka Kriste Yesu.

14   Nikutsralela timhaka leti na nidumba lesvaku nitakubuyela kunge kungani,

15   kambe loko nichuka nihlwela, utativa lesvi ufanelaka kuhanyisa xisvone andlwini ya Xikwembu, dzringa bandla dzra Xikwembu lexihanyaka, nsika ni xiseketelo xa ntiyiso.

16   Nakone mpela, xihundla lexi xa wutomi bza kuchava Xikwembu i xikulu: ‘Ahumelele hi tlhelo dzra nyama, ahlayiwa lwalulamiki hi tlhelo dzra moya, avoniwa hi tintsrumi, ahuweleliwa amatikweni, apfumeliwa amisaveni, ayamukeliwa hi kuphatima.’