BRN

1   Kambe moya wusvibeka alivaleni lesvaku aminkameni ya wugamu, van’we vatahuma alipfumelweni, vayingiseta vhanu lavahleveliwaka hi mimoya ya madzrimi ni tidondzro ta mademona,

2   hi kola ka wukanganyisi bza vhanu lavavulavulaka madzrimi, lava lipfalu dzravu dzrihisiwiki hi nsimbi akuva vangahatwi nchumu.

3   Vatsimbisa kutekana vatlhela valeleta vhanu lesvaku vangadi svakuda lesvi Xikwembu xisvitumbuluxiki akuva svidiwa hi kukhensa hi lavanga ni lipfumelo ni lavativaka ntiyiso.

4   Hikusa hinkwasvu lesvitumbuluxiwiki hi Xikwembu i svinene, funtsrhi aku na nchumu lowufanelaka kudzreliwa loko wuyamukeliwa hi kukhensa,

5   hikusa wuxwengisiwa hi zritu dzra Xikwembu ni xikhongoto.

6   Loko ulayisa xilesvi vamakwezru, utava mutizreli lwenene wa Kriste Yesu, lwawundliwiki hi mazritu ya lipfumelo ni ya dondzro leyinene leyi ubuyaka na uyilandzra hi le kusuhi.

7   Kambe dzrela svihitana lesvinyamisaka minchumu ya kuxwenga, sva kufana ni lesvithiwaka hi svikoxana sva xisati. Amatsrhan’wini ya lesvo, titolovete kuhanya hi kuchava Xikwembu.

8   Hikusa kutoloveta mizri svapfuna kutsrongonyana, kambe kuhanya hi kuchava Xikwembu svipfuna ka minchumu hinkwayu, hikuva svinyikana xidumbiso xa kuva ni wutomi bza nkama wa svosvi ni bza lowutaka.

9   Mazritu lawo madumbeka nakone mafaneliwa hi kukholwiwa svinene.

10   Kunene, hi yo mhaka yoleyo hikumekaka na hitizra hi ntamu hiva hitikazrata svinene, hikusa hibeke kulavisela kwezru ka Xikwembu lexihanyaka, lexinga Muhuluxi wa vhanu va tinxaka hinkwatu, ngopfungopfu lava kudumbeka.

11   Valelete minchumu leyi utlhela uvadondzrisa.

12   Ungatsrhiki mhunu akuyeyisa hilesvi unga mumpsha. Amatsrhan’wini ya lesvo, bekela vapfumeli xikombiso lexinene ka mavulavulela, mahanyela, lizrandzru, lipfumelo ni kubasa.

13   Na ningesitlhasa, tihite ka kudondzrela vhanu Matsralwa, ka kutsratsriya ni kudondzrisa.

14   Ungayiloloheli nyiko leyi unga nayu, leyi unganyikiwa yone hi wuprofeta, loko huvo ya vakulu yikutlhanteke mavoko.

15   Yanakanyisisa hi minchumu leyi; ukhomeka ha yone, lesvaku kuya kwaku amahlweni kuvoneka amahlweni ka vhanu hinkwavu.

16   Tilavisise ha hombe ni madondzrisela yaku. Tiyisela ka minchumu leyi, hikusa hi kuyenca lesvi, utatihuluxa, uhuluxa ni lavakuyingisetaka.