-
1 Vakorinte 12
1 Kasi mayelanu ni tinyiko ta moya, vamakwezru, anijuli lesvaku mitsrhama na mingativi nchumu.
2 Masvitiva lesvaku ankama lowu amahali vhanu va matiko, amihamba miyisiwa ka svithombe lesvingavulavulikiki, milhembisiwa.
3 Kutani nijula lesvaku misvitiva lesvaku aku na mhunu lwavulavulaka hi moya wa Xikwembu lwaliki: “Yesu azrukiwile!” Nakone aku na mhunu lwangahlayaka lesvi: “Yesu i Hosi!” na angasusumeteliwi hi moya wa kuxwenga.
4 Kutani ku ni tinyiko ta kusiyanasiyana, kambe ku ni moya wolowu wa wun’we;
5 nakone ku ni wutizreli bza kusiyanasiyana, kambe ku ni Hosi yoleyi ya yin’we;
6 nakone ku ni matizrela ya kusiyanasiyana, kambe i Xikwembu xolexi xa xin’we lexitizraka hinkwasvu ka hinkwavu.
7 Kambe mun’wana ni mun’wana anyikiwa xikombiso xa moya akuva kupfuneka hinkwavu.
8 Hikuva mun’we anyikiwa zritu dzra kusiyanasiyana dzra wutlhazri hi kola ka moya, mun’wana anyikiwa zritu dzra wutivi hi kuya hi moya wolowu wa wun’we,
9 mun’wanyana anyikiwa lipfumelo hi moya wolowu wa wun’we, mun’wanyana anyikiwa tinyiko ta kudaha hi moya wolowu wa wun’we,
10 mun’wanyana funtsrhi anyikiwa ntamu wa kuyenca masingita, mun’wana anyikiwa wuprofeta, mun’wanyana anyikiwa kutwisisa lesvihlayiwaka hi moya, mun’wana anyikiwa tindzrimi ta kuhambana, kasi mun’wanyana anyikiwa kutoloka tindzrimi.
11 Kambe hinkwawu matizrela lawa mayenciwa hi moya wolowu wa wun’we, lowuyavelaka mun’wana ni mun’wana hi la wujulaka ha kone.
12 Hikuva svanga hesvi mizri wunga wun’we ntsena kambe wunga ni svizro svinyingi, ni lesvi svizro hinkwasvu sva mizri wolowo, nhambiloko svili svinyingi, svivumbaka mizri wun’we, na yene Kriste a tanu.
13 Hikuva hinkwezru hibabatisiwe hi moya wun’we amizrini wun’we ntsena, nhambi hili vajuda kumbe vagrika, nhambi hili svikazrawa kumbe lavantsrhunxekiki, nakone hinkwezru hinwisiwe moya wun’we ntsena.
14 Hikuva, mizri awuvumbiwi hi xizro xin’we ntsena, kambe wuvumbiwa hi svizro svinyingi.
15 Loko nkondzro wungaku: “Lesvi ningeke voko, ani wa mizri lowu”, lesvo svingeyenci lesvaku wungahavi wa mizri lowo.
16 Nakone loko ndleve yingaku: “Lesvi ningeke tihlo, ani wa mizri lowu”, lesvo asviyenci lesvaku yingahavi ya mizri.
17 Xana loko mizri hinkwawu awova tihlo, kuyingela akutava kwini? Loko hinkwasvu asvova kuyingela, xana kutwa kunun’whela akutava kwini kee?
18 Kambe kutani Xikwembu xibeke xizro xin’wana ni xin’wana xa mizri hi la xisvizrandzraka ha kone.
19 Loko hinkwasvu asvova xizro xo xa xin’we, xana mizri awutava kwini?
20 Kambe, ke, nhambilesvi kunga ni svizro svinyingi, kova ni mizri wun’we ntsena.
21 Tihlo dzringebzeli voko, dzriku: “Mine anikuvileli wene.” Kumbe na yo nhloko yingebzeli minkondzro, yiku: “Mine animivileli n’wine.”
22 Kuhambana ni svosvo, svizro sva mizri lesvivonekaka ingiki asvitiyanga svivileleka ngopfu,
23 nakone svizro sva mizri lesvi hipimisaka lesvaku ahi sva nchumu hi lesvi hisvibekelaka ngopfungopfu lisima; kutani svizro lesvidanisaka amizrini hi lesvi hisviyencaka svichaviseka hi kutlulisa,
24 kasi svizro sva mizri lesvixongiki asvivileli kuyenceliwa nchumu. Nhambitanu, Xikwembu hi xone xihambiki mizri, xiva xinyika lisima ledzritlulisaka xizro lexi axikiyeleliwa,
25 akuva kungavi na kuyavana amizrini, kambe lesvaku svizro sva wone svihlayisana.
26 Loko xizro xin’we xixaniseka, svizro hinkwasvu svixaniseka naxu; nakone loko xizro xin’we xibekeliwa lisima, svizro hinkwasvu svinyonxa naxu.
27 Kutani n’wine mi svizro sva mizri wa Kriste, nakone mun’wana ni mun’wana wenu i xizro xa wone.
28 Nakone Xikwembu xinyike van’we mintizro andzreni ka bandla: Xa kusungula, vapostola; xa wubidzri, vaprofeta; xa wuzrazru, vadondzrisi; kulandzra masingita; kulandzra tinyiko ta kuhanyisa; kupfunana; kukota kuzrangela; kuvulavula tindzrimi ta kusiyanasiyana.
29 Svili hinkwavu i vapostola kee? Svili hinkwavu i vaprofeta kee? Svili hinkwavu i vadondzrisi kee? Svili hinkwavu vayenca masingita kee?
30 Svili hinkwavu va ni tinyiko ta kuhanyisa kee? Svili hinkwavu vavulavula tindzrimi kee? Svili hinkwavu vakota kutoloka tindzrimi kee?
31 Kambe lwelani kukuma tinyiko ta kutlula leti hi lisima. Kutani svosvi nijula kumikomba mahanyela lamatlulaka hinkwawu hi kuxonga.