BRN

1   Nhambiloko novulavula tindzrimi ta vhanu ni ta tintsrumi, loko ninge na lizrandzru, nifana ni xigubu xa nsimbi lexitinganaka loko xibiwa kumbe ni mugqomo lowupfumaka loko wubiwa.

2   Ni loko nova ni nyiko ya wuprofeta ni ya kutwisisa svihundla hinkwasvu ni wutivi hinkwabzu, ni loko nova ni lipfumelo hinkwadzru lakakuva ningasusa tinhava, kambe loko ninge na lizrandzru, ani nchumu.

3   Ni loko nonyikela minchumu yanga hinkwayu akuva nidisa van’wana, ni loko ningonyiketa mizri wanga akuva nitatikhuza ha svone, kambe loko ninge na lizrandzru, anipfuneki ha nchumu.

4   Lizrandzru dzrilehisa mbilu nakone dzrizrandzra kupfuna vhanu. Lizrandzru adzri na wukwele. Adzritikhuzi, adzritikukumuxi,

5   adzriyenci sva tingana, adzritijuleli sva dzrone ntsena, adzri na xikwatisana. Adzribekelani xiviti.

6   Adzrinyonxi hi wubihi, kambe dzrinyonxa hi ntiyiso.

7   Dzrizrwala minchumu hinkwayu, dzrikholwa minchumu hinkwayu, dzrilavisela minchumu hinkwayu, dzritiyisela aminchun’wini hinkwayu.

8   Lizrandzru adzriheli ni siku ni dzrin’we. Kambe loko kuli kuprofeta, kutahela; loko tili tindzrimi, titayima; loko bzili wutivi, bzitahela.

9   Hikuva hotiva sva svitsrongo nakone hoprofeta sva svitsrongo,

10   kambe loko kutatlhasa lesviheleliki, lesva svitsrongo svitahela.

11   Na nahali ntsrongo, anihamba nivulavula svanga ntsrongwana, nipimisa svanga ntsrongwana, nivona minchumu svanga ntsrongwana. Kambe lesvi kutani nikuliki, nitsrhike hinkwasvu sva wutsrongwana.

12   Hikuva svosvi hivona hi xivonivoni xa kumphuma, kambe ankameni wa kone hitavona mombo hi mombo. Svosvi notiva sva svitsrongo, kambe ankameni wa kone nitativisisa hi wuyenti svanga hesvi na mine nitivisisiwaka hi wuyenti.

13   Kambe svosvi kusala minchumu leyizrazru: lipfumelo, dumbo ni lizrandzru; kambe lexikulu ka svone i lizrandzru.