BRN

1   Landzrelelani lizrandzru, na milwela kukuma tinyiko ta moya, kambe ngopfungopfu ya kuprofeta.

2   Hikuva lweyi avulavulaka hi lidzrimi dzra kukazri angakhaneli ni vhanu, kambe akhanela ni Xikwembu, hikuva aku na mhunu lwayingisetaka, kambe avulavula svihundla sva Xikwembu hi moya.

3   Kambe, lweyi aprofetaka akhanela ni vhanu akuva avayaka, avatiyisa atlhela avachavelela.

4   Lweyi avulavulaka lidzrimi dzra kukazri otiyaka wusvake, kambe lweyi aprofetaka ayaka bandla.

5   Kutani ninavela lesvaku hinkwenu mingavulavula hi tindzrimi, kambe ngopfungopfu akuva miprofeta, hikusa lweyi aprofetaka atlula lweyi avulavulaka hi tindzrimi, handle ka loko yelweyo otlhamuxela lesvi asvikhanelaka, akuva bandla dzrikuma kuyakiwa.

6   Kambe, vamakwezru, loko svosvi nobuya nivulavula na n’wine hi tindzrimi, anitamipfuna ha yini loko ningakhaneli na n’wine hi mpfuletelo kumbe hi wutivi kumbe hi wuprofeta kumbe dondzro?

7   Svifanaka ni minchumu leyingahanyikiki, leyihumexaka mpfumawulu, ya kufana ni xitiloti kumbe xitende. Loko machayela ya mimpfumawulu mangahambanisiwi, xana svitativisiwa kuyini lesvichayiwaka hi xitiloti kumbe hi xitende?

8   Hikuva loko xipalapala xihumexa mpfumawulu lowungatwisisekiki, i mani xana lweyi angatibekiselaka kulwa yimpi?

9   Ni ka n’wine svi tanu, loko hi lidzrimi mingavulavuli minchumu leyihatlaka yitwisiseka, xana mhunu atasvitivisa kuyini lesvihlayiwaka? Kunene, mitava na movulavula sva kukala ndlela.

10   Kungahava ni mixaka ya kutala ya tindzrimi amisaveni, kambe awu kone muxaka wa lidzrimi ledzringeke na ntlhamuxelo.

11   Hikuva loko ningawutwisisi ntlhamuxelo wa mazritu lamavulavuliwaka, nitava mupfi ka lweyi avulavulaka, na yene lweyi avulavulaka, kwanga atava mupfi.

12   Na n’wine, ke, lesvi minavelaka hi ntamu tinyiko ta moya, lwelani kutala hi tinyiko letitakayaka bandla.

13   Xilesvo, lweyi avulavulaka lidzrimi dzra kukazri aakhongote lesvaku akota kutoloka.

14   Hikuva loko nikhongota hi lidzrimi dzra kukazri, i nyiko yanga ya moya leyikhongotaka, kambe miyanakanyu yanga ayibindzruli nchumu.

15   Nitayenca yini kutani? Nitakhongota hi nyiko ya moya, kambe nitatlhela nikhongota hi miyanakanyu yanga. Nitayimbelela xidzrumiso hi nyiko ya moya, kambe nitatlhela niyimbelela xidzrumiso hi miyanakanyu yanga.

16   Loko svinge tanu, loko ukhensa hi kutizrisa moya, xana mhunu lweyi okosungula kuva makazri kwenu atahlayisa kuyini lesvaku “Amen” loko uheta kukhensa, na angasvitivi lesvi usvihlayaka?

17   Kunene, wene ukhensa ha hombe, kambe mhunu lwemun’wana angayakiwi.

18   Nitlangela Xikwembu hi lesvi nivulavulaka tindzrimi tinyingi kutlula n’wine hinkwenu.

19   Nhambitanu, loko hihlengeletanile, nivona sviyampsa kuvulavula ntlhanu wa mazritu hi ngqhondho yanga, akuva nitakota kutlhela nidondzrisa van’wana, kutlula 10.000 wa mazritu hi lidzrimi dzra kukazri.

20   Vamakwezru, mingapimisi kufana ni svitsrongotwana, kambe vanani vatsrongwana ka lesva kubiha; miva vakulu va vhanu ka kukota kupimisa.

21   Anawini kutsraliwe lesvi: “‘Nitakhanela ni tiko ledzri hi tindzrimi ta matiko mambeni ni hi mavulavulela ya vambeni. Kambe, nhambilesvo, vangetiniyingiseta’, kuhlaya Jehovha.”

22   Xilesvo, tindzrimi ahi xikombiso xa kukholwisa vapfumeli kambe xa kukholwisa lavangeke vapfumeli, kasi wuprofeta abzitizreli lavangeke vapfumeli kambe bzitizrela lavanga vapfumeli.

23   Kutani ke, loko bandla hinkwadzru dzrihlengeletanile ambangu wun’we na hinkwavu vavulavula hi tindzrimi ta kuhambanahambana, kutani kunhingena vhanu lava vokosungula kumbe lavangeke vapfumeli, xana vangetipimisa lesvaku mohlanya?

24   Kambe loko hinkwavu vaprofeta kutani kunhingena lwangeke mupfumeli kumbe mhunu lweyi okosungula, atapaluxiwa atlhela akambisisiwa hi hinkwavu.

25   Svihundla lesvinga mbilwini yake svitabekiwa alivaleni, lakakuva atawa hi mombo agandzrela Xikwembu, aku: “Xikwembu hakunene xile makazri kwenu.”

26   Kutani ke, hitayenca yini, vamakwezru? Loko mihlengeletana, mun’we a ni lisimu, mun’wana a ni dondzro, mun’wana a ni mpfuletelo, mun’wana a ni lidzrimi, kasi mun’wana a ni wusvikoti bza kutoloka. Hinkwasvu asviyenceliwe kuyakana.

27   Nakone loko mhunu akhanela hi lidzrimi dzrimbeni, aagamele ka tibidzri kumbe tizrazru ntsena, anyiselana ni vambeni, na ku ni mhunu wa kutoloka.

28   Kambe loko kunge na mhunu wa kutoloka, aamiyele anhlengeletanwini, avulavula wusvake ni Xikwembu.

29   Akukhanele vaprofeta vabidzri kumbe vazrazru, kutani lavan’wana vatwisisa lesviprofetiwaka.

30   Kambe loko mun’wana achuka anyikiwa mpfuletelo wa kukazri na atsrhamile, lwewa kusungula aamiyele.

31   Hikuva hinkwenu mingaprofeta ha mun’wemun’we, akuva hinkwavu vadondzra ni kuva hinkwavu vatiyisiwa.

32   Nakone kuhleveliwa hi moya loku vaprofeta vanga na kone kulawuliwa hi vone.

33   Hikusa Xikwembu ahi Xikwembu xa mpfilumpfilu kambe i Xikwembu xa kuzrula. Svanga hi le mabandleni hinkwawu ya vhanu va Xikwembu lava kuxwenga,

34   vavasati lavanga mabandleni avamiyele, hikuva avapfumeleliwi kuvulavula. Kambe, avatibeke ahansi, svanga hesvi na wone Nawu wuhlayaka ha kone.

35   Loko vanavela kudondzra xa kukazri, avavutise vanuna vavu akaya, hikuva svikhomisa tingana loko wansati avulavula abandleni.

36   Kumbe zritu dzra Xikwembu dzrehuma ka n’wine, kumbe dzrefamba dzriyagamela ka n’wine ntsena?

37   Loko mhunu wa kukazri apimisa lesvaku i muprofeta kumbe a ni nyiko ya kuhleveliwa hi moya, afanela kutwisisa lesvaku lesvi nimitsralelaka svone i xileleto xa Hosi.

38   Kambe loko mhunu wa kukazri atiyalisa, aabiwe hi makatla.

39   Kutani, vamakwezru, julani ngopfu kuprofeta, kambe mingasiveli mhunu kuvulavula hi tindzrimi.

40   Kambe hinkwasvu asviyenciwe hi mfanelo ni hi nawu.