BRN

1   Svosvi, vamakwezru, nimibzela madzrungula lamanene wolawa ningamizrezrela wone, lawa mingamapfumela mitlhela mitiya ka wone;

2   lawa funtsrhi mihuluxiwaka ha wone loko mitiya mikunde ka madzrungula lamanene lawa nimizrezreliki wone, loko mingapfumelanga mahala.

3   Hikuva xin’we xa lesvi ningazranga nimitlhasisela svone hi lesvi na mine nisviyamukeliki, lesvaku Kriste afele svidoho svezru hi kulandzra lesvi Matsralwa masvihlayaka;

4   ni lesvaku alahliwile, atlhela apfuxiwa hi siku dzra wuzrazru hi kulandzra lesvi Matsralwa masvihlayaka;

5   ni lesvaku ayetivonekisa ka Kefasi, agama ativonekisa ka lava 12.

6   Antsrhaku ka lesvo, ativonekise ka vamakwezru va kutlula 500 hi nkama wun’we, lava ntalu wavu vahahanyaka kutatlhasa svosvi, kambe van’wana vafile.

7   Antsrhaku ka lesvo, ativonekise ka Jakobe, agama ativonekisa ka vapostola hinkwavu.

8   Kambe, hi wugamu, ativonekise ni le kwanga svanga hi loko nepsaliwa na kungesitlhasa nkama.

9   Hikuva mine ni lwentsrongo ngopfu ka vapostola, nakone anifaneliwi hi kuvitaniwa mupostola, hikusa nixanise nhlengeletanu ya Xikwembu.

10   Kambe hi wumbilu bza Xikwembu, mine ni lesvi ninga svone. Nakone wumbilu lebzi xinikombiki bzone abzivanga bza mahala, kambe nitizre ngopfu kutlula vone hinkwavu; kambe ahi mine, kambe kuve wumbilu bza Xikwembu lebzi abzili na mine.

11   Xilesvo, nhambi ali mine kumbe vone, lesvi hi lesvi hizrezrisaka xisvone, nakone hi lesvi n’wine mikholwisiki xisvone.

12   Kutani, loko kuzrezriwa lesvaku Kriste apfuxiwile akufeni, xana van’we amakazri kwenu vahlayisa kuyini lesvaku aku na kupfuka ka vafi?

13   Loko mpela kunge na kupfuka ka vafi, svijula kuhlaya lesvaku Kriste angapfuxiwanga.

14   Kambe loko Kriste angapfuxiwanga, svijula kuhlaya lesvaku kuzrezra kwezru ahi ka nchumu, na dzrone lipfumelo ahi dzra nchumu.

15   Handle ka lesvo, hitlhela hikumeka na hili timboni ta madzrimi ta Xikwembu, hikusa hixifakazelile, hiku: “Xikwembu xipfuxe Kriste”, na kasi aximupfuxanga, loko kuli lesvaku vafi hakunene vangetipfuxiwa.

16   Hikuva loko kuli lesvaku vafi vangetipfuxiwa, nhambi Kriste angapfuxiwanga.

17   Nakone, loko Kriste angapfuxiwanga, lipfumelo dzrenu adzrisizi nchumu, funtsrhi mahali svidohweni svenu.

18   Nakone svijula kuhlaya lesvaku lavafiki ka Kriste vafele wugamu.

19   Loko kuli lesvaku hidumbe Kriste ka wutomi bzobzi ntsena, hi hine vambuyangwana va kone ka vhanu hinkwavu.

20   Kambe, ke, Kriste apfuxiwile akufeni, ava yene wa kusungula kupfuxiwa amakazri ka lavafiki.

21   Hikuva svanga hesvi lifu dzringa kone hi mhunu mun’we, na kone kupfuka ka vafi kutava kone hi mhunu mun’we.

22   Hikuva svanga hesvi vhanu hinkwavu vafaka hi kola ka Adamu, hi kola ka Kriste hinkwavu na vone vatatlhela vahanya.

23   Kambe mun’wana ni mun’wana hi nxaxamelo wa ka kwake: Kriste, lwewa kusungula wa kone, kulandzra lavalumbaka Kriste hi nkama wa kuhumelela kwake.

24   Antsrhaku ka lesvo, kutatlhasa wugamu, kunga nkama lowu atakanyiketa mfumu ka Xikwembu ni Tatana wake, loko atava na ahelise mimfumu hinkwayu, ni wuhosi hinkwabzu, ni ntamu hinkwawu.

25   Hikuva afanela kufuma kuyatlhasa ka nkama lowu Xikwembu xitabeka valala hinkwavu ahansi ka minkondzro yake.

26   Kutani nala wa wugamu lweyi atakahelisiwa i lifu.

27   Hikuva Xikwembu xibeke minchumu hinkwayu ahansi ka minkondzro yake. Kambe loko kuhlayiwa lesvaku “xibeke minchumu hinkwayu ahansi ka minkondzro yake”, svile livaleni lesvaku akupatsriwi lweyi abekiki minchumu hinkwayu ahansi kwake.

28   Kambe loko minchumu hinkwayu yitava yibekiwe ahansi kwake, kutani N’wana hi ntshima na yene atatibeka ahansi ka lweyi abekiki minchumu hinkwayu ahansi kwake, akuva Xikwembu xiva hinkwasvu ka hinkwavu.

29   Loko svinge tanu, xana lava vababatiseliwaka kufa vatayenca yini? Loko kuli lesvaku vafi vangetipfuxiwa ni siku ni dzrin’we, hayini vhanu vababatiseliwa kufa?

30   Na hine, hayini hitsrhama akhombzeni nkama hinkwawu?

31   Siku ni siku nivhikisana ni lifu. Leyi i mhaka leyitiyiki svanga hesvi nitikhuzisaka xisvone ha n’wine, vamakwezru, amahlweni ka Kriste Yesu, Hosi yezru.

32   Loko, kufana ni vhanu vambeni, nilwe ni svihazri sva nhova le Efesa, svinisiza ha yini svosvo? Loko kuli lesvaku vafi vangetipfuxiwa, ahideneni, hinwa, hikuva mundzruku hitafa.

33   Mingakanganyisiwi. Xinghanunghanu xa kubiha xibolisa mahanyela lamanene.

34   Buyelelisani ngqhondho hi kuyenca lesva kululama, mitsrhika kudoha; hikuva van’we ni kuxitiva Xikwembu avaxitivi. Nihlaya lesvi kumikhomisa tingana.

35   Kambe, mun’we ataku: “Xana vafi vatapfuxisiwa kuyini? Nakone vatatlhela na va ni mizri wa muxaka muni?”

36   Awupimisi, wene! Phela, lexi uxibzalaka axitlheli xihanya loko xingazrangi hi kufa.

37   Nakone lexi uxibzalaka, ahi mizri lowutakakula, kambe ubzala mbewu ntsena, yingavaka ya tirigu kumbe ya muxaka wun’wana;

38   kambe Xikwembu xiyinyika mizri xilesvi xisvijulisaka xisvone, nakone xinyika mbewu yin’wana ni yin’wana muxaka wa yone wa mizri.

39   Nyama hinkwayu ahi nyama yin’we, kambe ku ni nyama yin’we ya vhanu, ku ni nyama yin’wana ya svifuyo, nyama yin’wana ya tinyanyana, ni yin’wana ya tinhlampfi.

40   Nakone ku ni mizri ya tilo ni mizri ya misava; kambe kuphatima ka mizri ya tilo i ka muxaka wa kukazri, kasi kuphatima ka mizri ya misava i ka muxaka wumbeni.

41   Kuphatima ka dambu i ka muxaka wa kukazri, kasi kuphatima ka n’weti i ka muxaka wumbeni, nakone kuphatima ka tinyeleti i ka muxaka wumbenyana; nakone funtsrhi, nyeleti ni nyeleti yihambanile ni tin’wana hi kuphatima.

42   Svafana ni kupfuka ka vafi. Mizri wubzaliwa na wuli lowubolaka; wupfuxiwa na wuli lowungabolikiki.

43   Wubzaliwa na wudanisa; wupfuxiwa na wuphatima. Wubzaliwa na wutsranile; wupfuxiwa na wu ni ntamu.

44   Wubzaliwa na wuli mizri wa nyama; wupfuxiwa na wuli mizri wa moya. Loko ku ni mizri wa nyama, na wone mizri wa moya wu kone.

45   Svi hi la svingatsraliwa ha kone: “Mhunu wa kusungula, Adamu, ave hika ledzrihanyaka.” Adamu wa wugamu ave moya lowuhanyisaka.

46   Nhambitanu, lexizrangaka ahi xone xa moya. Kuzranga lexa nyama, kulandzra lexa moya.

47   Mhunu wa kusungula i wa la misaveni nakone ahambiwe hi ntsrhuzri; mhunu wa wubidzri i wa le tilweni.

48   Kufana ni lweyi ahambiwiki hi ntsrhuzri, va tanu ni volava vahambiwiki hi ntsrhuzri; nakone kufana ni lweyi wa le tilweni, va tanu ni volava vanga va le tilweni.

49   Nakone svanga hesvi hiyambaliki xifaniso xa lweyi ahambiwiki hi ntsrhuzri, hitayambalisa xisvosvo xifaniso xa lwewa le tilweni.

50   Kambe nimibzela lesvi, vamakwezru, lesvaku nyama ni ngati asvi na kuda pfindla dzra Mfumu wa Xikwembu; nhambi kubola aku na kuda pfindla dzra kungaboli.

51   Lavisani! Nimibzela xihundla xa Xikwembu: Ahi hinkwezru hitakayetlela akufeni, kambe hinkwezru hitandzrulutiwa,

52   hi nkamanyana, hi kubzavuta ka tihlo, hi nkama wa kubiwa ka xipalapala xa wugamu. Hikuva kutabiwa xipalapala, kutani vafi vapfuxiwa na vangahaboli svin’wana, hiva hindzrulutiwa.

53   Hikuva kujuleka lesvaku lexibolaka xiyambala kungaboli, ni lexifaka kujuleka xiyambala kungafi.

54   Kambe loko lexibolaka xiyambala kungaboli, ni lexifaka xiyambala kungafi, kutani kutahetiseka zritu ledzritsraliwiki dzriku: “Lifu dzriheliseliwe wugamu!”

55   “Lifu, ku kwini kuhlula kwaku kee? Lifu, wu kwini ntsrhombo waku kee?”

56   Ntsrhombo wa lifu i xidoho, ni ntamu wa xidoho i nawu.

57   Kambe ahikhenseni Xikwembu, hikuva xihinyika kuhlula hi kola ka Hosi yezru Yesu Kriste!

58   Xilesvo, vamakwezru lavazrandzrekaka, tiyani mikunde, mingatsrekatsreki, mitsrhama na mi ni svinyingi sva kusviyenca antizrweni wa Hosi, na mitiva lesvaku ntizro wenu ahi wa mahala amahlweni ka Hosi.