-
1 Vakorinte 16
1 Kutani mayelanu ni kuhlenga ka sva kupfuna vhanu va Xikwembu lava kuxwenga, na n’wine yencisani xilesvi ningaleleta mabandla ya le Galatiya.
2 Hi siku dzra kusungula dzra vhiki, mun’wana ni mun’wana aabeke xanchumu hi tlhelo hi kuya hi lesvi asvikumiki, akuva kungahumexiwi minhlengo loko nitlhasa.
3 Kambe, loko nitlhasa, nitazruma vhanu lava mitakavahlawula hi mapapela akuva vaheketa xihananu xenu le Jerusalema.
4 Kambe, loko kuvoneka lesvaku svayampsa kuva na mine nifamba, nitafamba na vone.
5 Kambe nitamipfuxela loko nikhalutile hi le Masedonya, hikuva nitakhaluta hi Masedonya;
6 kumbexana nitatsrhamanyana na n’wine nhambi kuheta wuxika na n’wine, akuva mitaniheketanyana lomu nitakaya kone.
7 Hikuva anijuli kumivona svosvi na nokhaluta ntsena, hikusa nilavisela kutsrhamanyana na n’wine, loko Jehovha asvipfumelela.
8 Kambe nitatsrhama le Efesa kuko kutlhasa Nkhuvu wa Pentekoxta,
9 hikusa nipfulekeliwe hi nyangwa leyikulu ya kutizra nibindzrula, nhambilesvi vanyingi vanikanetaka.
10 Kutani loko Timotewu atlhasa, muyencani angachavi nchumu amakazri kwenu, hikuva ayenca ntizro wa Hosi, kufana na mine.
11 Xilesvo, kungave na mhunu lwamuvonelaka hansi. Muheketani hi kuzrula, akuva ata kwanga, hikuva nimuyimelile ni vamakwezru.
12 Kutani mayelanu na makwezru Apolu, nimutsratsriye ngopfu lesvaku atatamipfuxela ni vamakwezru. Kambe svosvi angatibekiselanga kuta, kambe atata loko akuma nkama.
13 Vonelelani, mitiya mikunde alipfumelweni, miyencisa xinuna, miva ni ntamu.
14 Hinkwasvu lesvi misviyencaka asviyenciwe hi lizrandzru.
15 Kutani, vamakwezru nimitsratsriya lesvi: Masvitiva lesvaku ndangu wa ka Stefana i wa kusungula wa kone le Akaya ni lesvaku vatinyiketele akutizreleni ka vhanu va Xikwembu lava kuxwenga.
16 Nikombela lesvaku na n’wine mitibeka hansi ka vhanu va matsrhamela lawo ni hinkwavu lavatizrisanaka vatlhela vatikazrata svinene.
17 Kambe nanyonxa hilesvi Stefana, Fortunatu na Akayku vanga kola na mine, hikusa vamisivetile.
18 Hikuva vapepise moya wanga ni wenu. Xilesvo, bekelani xichavu vhanu va matsrhamela lawo.
19 Mabandla ya le Azya mamidzrungula. Akila na Priska ni bandla ledzringa kaya kwavu vamidzrungula ngopfu amahlweni ka Hosi.
20 Hinkwavu vamakwezru vamidzrungula. Dzrungulanani hi kun’qutana ka kuxwenga.
21 Hi lawa madzrungula yanga, Pawlu, hi voko dzranga hi ntshima.
22 Loko mhunu angayizrandzri Hosi, aazrukiwe. Tana, we Hosi yezru!
23 Wumbilu bza Hosi Yesu abzive na n’wine.
24 Lizrandzru dzranga adzrive na n’wine hinkwenu ka Kriste Yesu!