BRN

1   Nakunene, kuhlayiwa lesvaku ku ni wugangu amakazri kwenu, wugangu bza kuva nhambi ka vhanu va matiko abzi kone, lakakuva mhunu ateka ni nsati wa tatana wake.

2   Kambe n’wine mipatsra ni kutikukumuxa, amatsrhan’wini ya kudzrila. Hikusa mhunu lwayenciki nchumu lowo inhaka asusiwa amakazri kwenu!

3   Mine, nhambilesvi ningeke kone amakazri kwenu hi tlhelo dzra nyama, ni kone hi tlhelo dzra moya, nakone mhunu lwayenciki lesvo nimuyavanyise khale, ingiki hi loko nova na n’wine,

4   lesvaku, loko mitlhanganile hi vito dzra Hosi yezru Yesu, na mine hi tlhelo dzra moya, ni hi ntamu wa Hosi yezru Yesu,

5   minyiketa mhunu lweyo ka Sathana, akuva kuhelisiwa nyama, ni kuva moya wuhuluka hi siku dzra Hosi.

6   Lesvi mitikhuzaka ha svone ahi svinene. Moka mingasvitivi lesvaku svikukumukisu svitsrongo svikukumukisa tirigu hinkwadzru ledzripfuviwiki?

7   Susani svikukumukisu lesva khale akuva miva tirigu ledzrimpsha dzra kupfuviwa, tanihi lesvi mikalaka mingacheliwanga svikukumukisu. Hikuva na yene Kriste, hamba yezru ya Paxkwa, kuhambiwe gandzrelo ha yene.

8   Xilesvo, ahideneni nkhuvu lowu, na hinge na svikukumukisu lesva khale, kumbe svikukumukisu sva wubihi ni wusomboloki, kambe hi kati ledzringeke na svikukumukisu, dzra kubasa ka mbilu ni dzra ntiyiso.

9   Ka papela ledzri ningamitsralela, nite mingahahanyisani ni vhanu va wugangu,

10   na ningahlayi hi kuhelela vhanu va wugangu va misava leyi kumbe vhanu va makwanga, kumbe vawutli, kumbe vagandzreli va svithombe. Hikusa asvitajula miyenca hi kusuka ka misava leyi.

11   Kambe svosvi nimitsralela lesvaku mingahahanyisani na mani na mani lwavitaniwaka “makwezru”, na kasi i mhunu wa wugangu kumbe mhunu wa makwanga, kumbe mugandzreli wa svithombe, kumbe muzruketeli, kumbe mpopsi, kumbe muwutli. Ni kuda mingadi naye mhunu lweyo.

12   Hikuva, ninhingena kwini mine akuyavanyisiweni ka lavanga handle? Kasi ahi n’wine miyavanyisaka lavanga ndzreni kee?

13   Kambe lavanga handle, Xikwembu hi xone xivayavanyisaka. Susani lwe wa kubiha amakazri kwenu.