BRN

1   Pawlu, Silvhanu na Timotewu, ka bandla dzra vatesalonika, ledzringa xikan’we ni Xikwembu lexinga Tatana, kupatsra na Hosi Yesu Kriste: Himinavelela wumbilu ni kuzrula!

2   Minkama hinkwayu hikhensa Xikwembu loko himiphata hinkwenu asvikhongotweni svezru,

3   hikusa nkama ni nkama hidzrimukela ntizro wenu lowa kudumbeka, kutihita kwenu loka lizrandzru, ni kutiyisela kwenu hi kola ka kulavisela loku minga naku ka Hosi yezru Yesu Kriste amahlweni ka Xikwembu xezru ni Tatana wezru.

4   Hikusa hasvitiva, vamakwezru lavazrandzriwaka hi Xikwembu, lesvaku ximilangile.

5   Hikusa madzrungula lamanene lawa himazrezraka amamitlhaselanga hi kuvulavula ntsena, kambe ni hi ntamu, ni hi moya wa kuxwenga, ni kudumba lokukulu, svanga hesvi misvitivaka lesvaku hitihambe vhanu va muxaka muni amakazri kwenu hi mhaka yenu.

6   Kutani n’wine mindzruluke vayetiseli vezru ni va Hosi, hilesvi miyamukeliki zritu hansi ka nhlomulo wukulu hi kunyonxa ka moya wa kuxwenga,

7   lakakuva mindzruluke xikombiso ka hinkwavu vapfumeli va le Masedonya ni le Akaya.

8   Mhaka hi lesvaku, zritu dzra Jehovha adzritwiwanga ntsena kusukela ka n’wine le Masedonya ni le Akaya, kambe lipfumelo dzrenu ka Xikwembu dzrihangalake dzriyatlhasa ni le matikweni amimbangwini hinkwayu, lakakuva asvahajuli hahahlaya nchumu.

9   Hikusa vone hi ntshima vatsrhama hi kudzrungula lesvi vavonanisiki xisvone na n’wine hi khambi dzra kusungula ni lesvi mingandzrulukisa xisvone miya ka Xikwembu, mitsrhika svikwembu svenu sva svivatliwa, akuva mitizrela Xikwembu lexihanyaka ni xa ntiyiso,

10   ni kuyimela N’wana wa xone na apfa hi le matilweni, lweyi ximupfuxiki akufeni, anga, Yesu, lweyi atakahihuluxa ka mahlundzru lamataka.