-
1 Vatesalonika 2
1 Hikusa n’wine, vamakwezru, masvitiva lesvaku ahimibuyelanga mahala.
2 Hikusa, nhambilesvi hizrangiki hi kuxanisiwa hitlhela hikhomiwa hi tihanyi le Filipiya, svanga hesvi misvitivaka, hikume xixixi hi kola ka Xikwembu xezru akuva himibzela madzrungula lamanene ya Xikwembu amakazri ka nkaneto lowukulu.
3 Hikusa xitsratsriyo xezru axisukeli ka xihoxo kumbe mahanyela lamangabasangakiki kumbe wukanganyisi,
4 kambe lesvi hiyamukelisiwiki xisvone hi Xikwembu akuva hitamelisiwa madzrungula lamanene, hikhanelisa xisvosvo, na hingajuli kunyonxisa vhanu, kambe kunyonxisa Xikwembu, lexikambelaka timbilu tezru.
5 Hikusa, hi la misvitivaka ha kone, ahingisama hikhuza mhunu hi kufela bindzru kumbe hitizrisa wukanganyisi hi mhaka ya makwanga; Xikwembu i mboni!
6 Nakone ahijulanga kudzrumisiwa hi vhanu, nhambi hi n’wine kumbe hi van’wana, nhambilesvi ahi ni mfanelo ya kumibindzrisela svanga vapostola va Kriste.
7 Kuhambana ni svolesvo, hive va kunabzala amakazri kwenu, svanga hi loko mamana lwayan’wisaka ahlayisa vanake hi lizrandzru.
8 Xilesvo, lesvi himizrandzrisiki xilesvi, ahingatibekiselanga kuminyika madzrungula lamanene ya Xikwembu ntsena, kambe kuminyika ni mahika ya ka kwezru, hikusa mindzruluke vhanu lava hivazrandzraka ngopfu svinene.
9 Hikusa n’wine, vamakwezru, mawudzrimuka ntizro wezru ni kutihita kwezru. Ahitizra wusiku ni nhlikanhi, akuva hingabindzriseli mhunu ni mun’we amakazri kwenu, ankama lowu ahimizrezrela madzrungula lamanene ya Xikwembu.
10 N’wine mi timboni, na xone Xikwembu i mboni, ta lesvaku hihanye hi ndlela ya kudumbeka ni ya kululama, ni ya kupfumala xisandzru amahlweni kwenu, n’wine vapfumeli.
11 Hi la misvitivaka ha kone, ahitsrhama hi kutsratsriya mun’wana ni mun’wana wenu, nikumutiyisa nhlana hitlhela himubekela wumboni, kufana ni lesvi tatana ayencisaka xisvone ka vanake,
12 akuva mifamba hi ndlela leyifanelekaka ka Xikwembu, leximivitaneliki amfun’wini wa xone ni le kuphatimeni ka xone.
13 Nakone hi yo mhaka yo yoleyi, hitlhela hikhensa Xikwembu na hingagami, hikusa ankama lowu miyamukeliki zritu dzra Xikwembu ha wone, ledzri midzriyingeliki ha hine, amidzriyamukelanga svanga zritu dzra vhanu, kambe midzriyamukelise xilesvi dzringa xisvone hi ntiyiso wa kone, anga zritu dzra Xikwembu, ledzritlhelaka dzritizra ni le ka n’wine vapfumeli.
14 Hikusa n’wine, vamakwezru, mindzruluke vatekeleli va mabandla ya Xikwembu lamanga xikan’we na Kriste Yesu, lawa manga Judeya, hikusa mixanisekile amavokweni ya vhanu lavahumaka atikweni dzrenu, kufana na vone vaxanisekiki amavokweni ya vajuda,
15 lava vangadlaya nhambi Hosi Yesu ni vaprofeta, vatlhela vahixanisa. Nakone avaxinyonxisi Xikwembu, kambe valwa ni lesvipfunaka vhanu hinkwavu,
16 hi kuhisivela kukhanela ni vhanu va matiko akuva vatahuluka. Hi ndlela leyi, minkama hinkwayu vatatisa mpimu wa svidoho svavu. Kambe mahlundzru ya Xikwembu magame hi kuvawela.
17 Kambe, vamakwezru, ankama lowu hingahambanisiwa na n’wine sva nkamanyana ntsena (hi mizri, na kungali hi timbilu), himixuve lakakuva hiza hidzringisa tindlela hinkwatu akuva hikota kutatavonana na n’wine hi wuso.
18 Hi mhaka leyi, hijule kumibuyela; mine Pawlu kunene nidzringise kan’we ni kabidzri; kambe Sathana ahisivelile.
19 Hikusa hi kwini kulavisela kwezru kumbe kunyonxa, kumbe ngiyana ya kutibuma ha yone amahlweni ka Hosi yezru Yesu ankama lowu atakahumelela ha wone? Ahi n’wine kee?
20 Phela hi ye n’wine kuphatima kwezru ni kunyonxa kwezru.