-
1 Vatesalonika 3
1 Kutani, lesvi ahingahasvikoti kutiyisela, hivone sviyampsa kutsrhama wusvezru le Atena;
2 ni kuzrumela Timotewu, makwezru ni mutizrisani wa Xikwembu akuhangalaseni ka madzrungula lamanene ya Kriste, akuva amitiyisa ni kumichavelela atimhakeni ta lipfumelo dzrenu,
3 akuva kungavi na mhunu lweyi atsrekatsrekisiwaka hi tinxanisa leti. Hikusa n’wine hi ntshima masvitiva lesvaku hiyimele svosvo.
4 Hikusa loko hahali na n’wine n’wine, ahihamba himibzela na wehe nkama lesvaku hitakuma tinxanisa, nakone lesvi hi lesvi sviyencekiki, hi la misvitivaka ha kone.
5 Hi svosvo sviniyenciki lesvaku na mine, loko ningahasvikoti kutiyisela, nimizrumela wa kutatakamba ndzrava ya lipfumelo dzrenu, hi kuchava lesvaku kumbexana Mudzringi angava na amidzringile, kutani ntizro wezru wundzruluka wa mahala.
6 Kambe Timotewu ahakutlhasa halenu na apfa halanu, nakone ahinyike ndzrava yinene mayelanu ni lipfumelo dzrenu ni lizrandzru dzrenu, lesvaku minkama hinkwayu mitsrhama hi kuhidzrimuka hi lizrandzru, ni lesvaku mahixuva kufana ni lesvi na hine himixuvisaka xisvone.
7 Vamakwezru, hi svosvo sviyenciki lesvaku, akukamekeni kwezru mbilu ni le kuxanisekeni kwezru hinkwaku, hichaveleliwa hi kola ka lipfumelo dzrenu.
8 Hikusa hikuma ntamu wumpsha loko miyima na mitiyile amahlweni ka Hosi.
9 Hikusa hingakombisisa kuyini kukhensa kwezru amahlweni ka Xikwembu mayelanu na n’wine hi mhaka ya kunyonxa lokukulu loku hinga naku amahlweni ka Xikwembu xezru hi nkonta yenu?
10 Wusiku ni nhlikanhi hiyenca svikombelo hi kuhiseka svinene akuva hikota kumivona hi wuso ni kutatisa lesvikiyelaka alipfumelweni dzrenu.
11 Svosvi ahinavela lesvaku Xikwembu xezru ni Tatana wezru hi ntshima, ni Hosi yezru Yesu, vangahipfulela ndlela ya kuva hikota kumitlhasela.
12 Nakone ahinavela lesvaku Hosi yingamiyenca lesvaku mitala mitlhela mikhaphakhapa hi lizrandzru makazri kwenu ni le ka hinkwavu, kufana ni lesvi na hine himizrandzrisaka xisvone,
13 akuva yitiyisa timbilu tenu, titsrhama na tinge na xisandzru akuxwengeni amahlweni ka Xikwembu xezru ni Tatana wezru ankama lowu Hosi yezru Yesu atakahumelela ha wone ni vhanu vake hinkwavu lava kuxwenga.