BRN

1   Hi wugamu, ke, vamakwezru, svanga hesvi miyamukeliki xileleto ka hine mayelanu ni ndlela leyi mifanelaka kufamba ha yone akuva mitanyonxisa Xikwembu, svanga hesvi ni svosvi mifambisaka xisvone, himikombela hitlhela himitsratsriya lesvi ha Hosi Yesu: Yencani ni sva kutlula kolanu.

2   Hikusa masvitiva svileleto lesvi hisvinyikeliki ha Hosi Yesu.

3   Hikusa lesvi Xikwembu xisvijulaka hi lesvaku miva lavaxwengiki ni kufambela kule ni wugangu.

4   Mun’wana ni mun’wana wenu afanela kutiva kulawula mizri wake hi ntshima hi kuxwenga ni xichavu,

5   kunge hi kupsha hi kunavela ka kunyonxisa svizro sva mbeleko ka kufana ni loku vanga naku vhanu va matiko lavangativikiki Xikwembu.

6   Kungave na mhunu lweyi atlulaka mindzrilakana leyifaneliki kutani akanganyisa makwavu amhakeni leyi, hikusa Jehovha awakhatisa minchumu leyi hinkwayu, svanga hesvi hizrangikiki himibzela hitlhela himibasopisa svinene.

7   Hikusa Xikwembu axihivitanelanga mahanyela lamangabasangakiki, kambe xihivitanele kuxwenga.

8   Xilesvo, lweyi ayivonelaka hansi minchumu leyi, angayeyisi mhunu, kambe ayeyisa Xikwembu, leximinyikiki moya wa xone wa kuxwenga.

9   Nhambitanu, mayelanu ni lizrandzru dzra wukwavu, n’wine amahavileli kuva himitsralela nchumu, hikusa n’wine hi ntshima midondzrisiwa hi Xikwembu kuzrandzranana.

10   Nakunene, hi svosvo misviyencelaka vamakwezru hinkwavu le Masedonya hinkwaku. Kambe, vamakwezru, himitsratsriya lesvi: Yengetelani kutlula ni kolanu.

11   Lwelani kuhanya hi kuzrula ni kulandzrelela timhaka ta ka kwenu, ni kutizra hi mavoko yenu, svanga hesvi himidondzrisiki ha kone,

12   akuva mikota kufamba hi ndlela leyixongiki amahlweni ka vhanu va le handle, mingakiyeleliwi hi nchumu.

13   Nakone, vamakwezru, ahijuli lesvaku misala ntsrhaku ka timhaka ta lava svosvi vatiyetleleliki, akuva mingavavisekisi xisvone lesvi lavambeni, lavangeke na dumbo, vavavisekisaka xisvone.

14   Hikusa loko hipfumela lesvaku Yesu afile atlhela apfuka, na xone Xikwembu xitabuyisa na yene lavatiyetleleliki hi kola ka Yesu.

15   Hikusa himibzela lesvi hi zritu dzra Jehovha: Hine hihanyaka, lavahatakatama vava kone kuyatlhasa ankameni wa kuhumelela ka Hosi, hingetizrangela lavatiyetleleliki;

16   hikusa Hosi hi ntshima yitaxika hi le tilweni hi kubandlukana lokukulu, hi zritu dzra ntsrumi leyikulu ni hi xipalapala xa Xikwembu, kutani lavafiki xikan’we na Kriste vatazranga vapfuka.

17   Antsrhaku hine hihanyaka, lavahatakatama vava kone, hitatlakuliwa xikan’we na vone, hifamba amatlavini hiyatlhangaveta Hosi ampfhukeni; kutani hi ndlela leyo hitatsrhama ni Hosi minkama hinkwayu.

18   Kutani ke, tiyisanani timbilu hi mazritu lawa.