-
2 Petrosi 2
1 Nhambitanu, kasame kuva ni vaprofeta va madzrimi amakazri ka vhanu, svanga hesvi kutakava ni vadondzrisi va madzrimi amakazri kwenu, lavatakakhokhoveta tidondzro ta kuyavanisa bandla, ni lavatakalandzrula nhambi n’winyi wa vone lweyi ekevaxava, vatikahlulisela kuhelisiwa.
2 Handle ka lesvo, vanyingi vatalandzrelela minchumu yavu ya tingana, nakone hi nkonta yavu ntiyiso wutasoliwa.
3 Nakone, vatamixolola hi magolo hi mazritu ya kukanganyisa. Kambe kuyavanyisiwa kwavu, lokubekisiwiki khale svinene, akunani nakone kuhelisiwa kwavu akujovoteli.
4 Kunene lesvi Xikwembu xikalaka xingatsrhikanga kukhatisa tintsrumi letidohiki, kambe xiticukumeteliki le Tartaru, hi kutitsrimba hi machini ya munyama lowukulu akuva tibekiseliwa kuyavanyisiwa,
5 ni lesvi xikalaka xingatsrhikanga kukhatisa misava ya khale, kambe xihuluxiki Nowa, muzrezri wa wululami, xikan’we ni lavan’wana va 7 loko xitise ndhambhi ahenhla ka vhanu lavangachavikiki Xikwembu,
6 xitlhela xiyavanyisa madoropa ya Sodoma na Gomora, ximahelisa masala hi nkuma, ximabeka svanga xikombiso xa lesvitakayencekela lavangachavikiki Xikwembu,
7 xitlhela funtsrhi xihuluxa Loti, lwewa kululama, lweyi aakazrateka hi kuvona lava kubiha na vayenca sva tingana na ni kudana vangadani,
8 hikusa siku ni siku hika dzra kululama dzra mhunu lweyo wa kululama adzrixaniseka hi kuvona ni kuyingela sviyenco svavu lesva kubiha ankama lowu aatsrhama makazri kwavu,
9 svile livaleni lesvaku Jehovha awasvitiva kuhuluxa ndzringweni lavachavaka Xikwembu, ni kubeka hi tlhelo lavayencaka lesva kubiha akuva vahelisiwa hi siku dzra yavanyiso,
10 ngopfungopfu lavajuletelaka kunyamisa nyama ya van’wana ni lavayeyisaka lavatamelisiwiki wuzrangeli. Va ni xixinya ni nkanu, nakone avachavi kusandzra lava kuphatima.
11 Kambe tintsrumi, nhambilesvi tivatlulaka hi ntamu ni wukulu, ativalumbeti hi kutizrisa mazritu ya kusandzra, hilesvi tichavaka Jehovha.
12 Kambe vhanu lava, kufana ni svihazri lesvingapimisikiki, lesvilandzraka ntumbuluku ntsena ni lesvipsaleliwaka kukhomiwa svidlayiwa, vavulavulela kubiha hi minchumu leyi vangayitivikiki ni kuyitiva. Vatahelisiwa hi ndlela ya ka kwavu leyidlayisanaka,
13 vaweliwa hi khombo svanga muholo wa ndlela yavu leyidlayisanaka. Vali svanyonxisa kuheta siku hinkwadzru na votlanga vangagami. I vhanu va kuchelana tingana ni va kuhonetela sva kuxonga, lavatikholisaka hi wukanganyisi bzavu ankama vadaka na n’wine.
14 Matihlo yavu matale hi wumbuye nakone avasvikoti kutsrhika xidoho; vatsrhama hi kuwonga vhanu lavangatiyangakiki. Timbilu tavu tidondzrisiwe makwanga; i vana lavazrukiwiki.
15 Vatsrhike ndlela leyinene, valahlekisa xisvosvo. Valandzre ndlela ya Balama, n’wana Bewori, lweyi angazrandzra kuholeliwa hi kuyenca lesva kubiha,
16 kambe atshinyiwile hilesvi atluliki nawu hi wusvake: mbongolo ya kukala yingavulavuli yize yihumexa zritu dzra mhunu yisivela muprofeta lwewa kuhlanya.
17 Lavo i svihlovo lesvingeke na mati ni tihunguva letisusumetiwaka hi xidzedze, nakone munyama lowukulu ngopfu wubekeliwe vone.
18 Vavulavula sva kutikukumuxa ni sva kukala ndlela. Vawongetela vhanu lavahakakuphonyoka vahuma ka vhanu lavahanyaka hi xidoho, hi kuvahlohlotela kunyonxisa kunavela kwavu ka nyama ni kuyencetela minchumu ya tingana.
19 Vavadumbisa ntsrhunxeko, nakuve nhambi vone hi ntshima i svikazrawa sva mikhuva ya kubola; hikusa loko mhunu afumiwa hi mun’wanyana, i xikazrawa xa yelweyo.
20 Kunene, lesvi antsrhaku ka loko vahulukile ka tinsila ta misava hi kupfuniwa hi wutivi bza Hosi ni Muhuluxi wezru, Yesu Kriste, vatlheliki vayapela aminchun’wini yoleyi ya yin’we vava vakhonzisiwa ha yone, xiyimu xavu xa wugamu xivabihele ngopfu kutlula lexa kusungula.
21 Asvitava sviyampsile loko avangativanga ndlela ya wululami vava loko vayitivile vahambuka xileletweni lexa kuxwenga lexi vanganyikiwa xone.
22 Vahumeleliwe hi mhaka leyihlayiwaka hi xihlayahlaya xa ntiyiso, lexiliki: “Mbzana yitlhelele manhlanteni ya yone, ni nguluve ya mpsele leyihlampsiwiki yitlhele yiyapuluvundzreka antsrakeni.”