-
2 Timotewu 1
1 Pawlu, lweyi, hi kuzrandzra ka Xikwembu, anga mupostola wa Kriste Yesu, hi kuya hi xidumbiso xa wutomi lebzinga kone ha Kriste Yesu,
2 ka Timotewu, n’wananga lwazrandzrekaka: Nikunavelela wumbilu, ni timpsalu ni kuzrula lesvipfaka ka Xikwembu, Tatana, ni le ka Hosi yezru Kriste Yesu.
3 Nikhensa Xikwembu, lexi nixigandzrelaka kufana ni lesvi vatatana vanga vayencisiki xisvone, hi lipfalu ledzribasiki, na ningatsrhiki kukuphata asvikombelweni svanga wusiku ni nhlikanhi.
4 Loko nidzrimuka minyembeti yaku, ninavela kukuvona, akuva nitatala hi kunyonxa.
5 Hikusa nadzrimuka lipfumelo dzraku ledzringeke na wukanganyisi, ledzrizrangiki dzritsrhama ka kokwana waku Loysi, na mamana waku, Ewunisi, kambe ledzri ninga ni kudumba ka lesvaku dzri kone ni le ka wene.
6 Hi xivangelo lexi, nikudzrimuxa kuhlanganyeta nyiko ya Xikwembu leyi ungayikuma ankama lowu ningakutlhanteka mavoko.
7 Hikusa Xikwembu axihinyikanga moya wa wutoya, kambe xihinyike moya wa ntamu ni wa lizrandzru ni wa miyanakanyu leyitizraka ha hombe.
8 Xilesvo, ungachuki udana hi mhaka ya wumboni bza Hosi yezru kumbe bza ka kwanga, lesvi ninga jele hi mhaka ya yone, kambe pfumela kuxaniseka xikan’we hi mhaka ya madzrungula lamanene, hi kudumba ntamu wa Xikwembu,
9 lexihihuluxiki, xihivitana hi kuvitaniwa loka kuxwenga, na kungali hi mhaka ya mintizro yezru, kambe hi nkonta ya nkongometo wa xone ni wumbilu bza xone, lebzi xihikombiki bzone hi kola ka Kriste Yesu khale ka khaleni,
10 kambe bzikhanyisiwiki svosvi ntsena hi kola ka kuvonekisiwa ka Muhuluxi wezru, Kriste Yesu, lweyi ahelisiki lifu, ahivaningela ndlela ya kukuma wutomi ni kupfumala kubola hi kutizrisa madzrungula lamanene,
11 lawa ningabekiwa kuva muzrezri, mupostola ni mudondzrisi wa wone.
12 Hi svosvo sviniyencaka nitiyisela ka lesvi nitlhanganaka nasvu. Kambe ani na tingana, hikusa namutiva lweyi nimupfumeliki, nakone nadumba lesvaku awasvikota kuhlayisa lesvi nimukombeliki kuva anihlayisela svone kuko kutlhasa siku ledzro.
13 Hlayisa muxaka wa mazritu lamanga manene lawa umayingeliki kwanga ni lipfumelo ni lizrandzru lesvipfaka ka Kriste Yesu.
14 Hlayisa minchumu leyinene leyi utamelisiwiki yone hi moya wa kuxwenga, lowutsrhamaka makazri kwezru.
15 Wasvitiva lesvaku hinkwavu vavanuna va le xifundzrankulu xa le Azya vafambe vanisiya wusvanga, kupatsra na Filego na Hermoxjeni.
16 Aninavelela ndangu wa ka Onezifro lesvaku Hosi yingawutsretsrelela, hikusa anipepise mbilu kanyingi, nakone angazanga adana hi mhaka ya machini lawa ningatsrimbeleliwa ha wone ajele.
17 Kambe, enakutlhasa le Roma, afambe anijuletela hi xiviti aza anikuma.
18 Animunavelela lesvaku Hosi yingamukomba timpsalu amahlweni ka Jehovha asikwini ledzro. Nakone wene wayitiva mintizro hinkwayu leyi ayiyenciki le Efesa.