BRN

1   Pawlu, lweyi, hi kuzrandzra ka Xikwembu, anga mupostola wa Kriste Yesu, na makwezru Timotewu,  ka bandla dzra Xikwembu ledzringa le Korinte, ni hinkwavu vhanu va Xikwembu lava kuxwenga lavanga le xifundzrankulu hinkwaxu xa Akaya:

2   Niminavelela wumbilu ni kuzrula lesvipfaka ka Xikwembu, lexinga Tatana wezru, na Hosi Yesu Kriste.

3   Akudzrumisiwe Xikwembu ni Tatana wa Hosi yezru Yesu Kriste, Tatana lwatwelanaka ngopfu wusiwana ni Xikwembu lexinyikanaka nchavelelo wa mixaka hinkwayu,

4   lexihichavelelaka akukazratekeni kwezru hinkwaku akuva hitakota kuchavelela lavanga xiyin’wini xin’wana ni xin’wana xa kukazrateka hi kuchaveleliwa loku hikukumaka ka Xikwembu!

5   Hikusa svanga hesvi kuxaniseka hi mhaka ya Kriste kuhitaleliki, na kone kuchaveleliwa loku hikukumaka ha Kriste i kunyingi.

6   Kutani loko hikumana ni svikazratu, sviyencela kuchavelela ni kuhuluxa n’wine; ni loko hichaveleliwa, sviyencela kuchavelela n’wine, lesvitizrelaka kumipfuna kutiyisela ka tinxanisa leti na hine hinga natu.

7   Nakone kudumba kwezru mayelanu na n’wine kutiyile, hi kutiva lesvaku svanga hesvi mikumanaka ni kuxaniseka, na n’wine mitakuma kuchaveleliwa.

8   Hikusa, vamakwezru, ahijuli lesvaku mitsrhama na mingakutivi kukazrateka loku hiviki naku le xifundzrankulu xa Azya. Hikuva hakameke ngopfu svinene sva kutlula ni ntamu wezru, lakakuva hingahadumbi ni lesvaku hahatahanya.

9   Kambe, ahititwa na hinyikiwe xikhatiso xa lifu, lesvaku hingatidumbi, kambe hidumba Xikwembu lexipfuxaka vafi.

10   Xihihuluxile nakone xitahihuluxa ka lifu dzra muxaka lowo. Funtsrhi hi ni kudumba ka lesvaku xahatahihuluxa.

11   Na n’wine mingahipfuna hi kuhikombelela, lesvaku vanyingi vakota kukhensa hi nkonta yezru hi mhaka ya kutsretsreleliwa loku hikukumiki hi kuhlamula svikhongoto sva lavanyingi.

12   Hikusa lexi hitikhuzaka ha xone hi lesvaku lipfalu dzrezru dzrahifakazela lesvaku hitikhome hi kuxwenga ni kubasa ka mbilu amahlweni ka Xikwembu la misaveni, ngopfungopfu ka n’wine, kungali hi wutlhazri bza nyama, kambe hi wumbilu bza Xikwembu.

13   Hikusa ahimitsraleli nchumu handle ka lesvi mingasvidondzraka mitlhela misvitwisisa, nakone nidumba lesvaku mitasvitwisisa kuyatlhasa awugan’wini,

14   svanga hesvi na n’wine mihitwisisikinyana miza mitikhuza ha hine, kufana ni lesvi na hine hitakatikhuza ha n’wine asikwini dzra Hosi yezru Yesu.

15   Kutani hi kudumba loku, akusunguleni anijula kumibuyela, akuva mitlhela minyonxa;

16   hikusa anijula kukhaluta nimipfuxela na niya Masedonya, nigama nisuka Masedonya nimibuyela, akuva mitanilongelela loko niya Judeya.

17   Kutani ke, loko nipimise lesvo, xana anotlanga? Kumbe loko nihamba makungu, nimahamba hi ndlela ya nyama, lakakuva niku: “Ina, ina” nakuve nili: “Ihina, ihina”?

18   Kambe Xikwembu xadumbeka: Loko hite “ina”, ahingahlayi “ihina”.

19   Hikusa N’wana wa Xikwembu, Yesu Kriste, lweyi mizrezreliwiki yene ha hine, anga mine na Silvhanu, na Timotewu, angavanga “ina” na ahlaya “ihina”, kambe kwake “ina” ave “ina” minkama hinkwayu.

20   Hikusa nhambi svetalisa kuyini svidumbiso sva Xikwembu, svindzruluke svihamba “ina” hi kola kwake. Xisvosvo, hihlayiwa “Amen” ka Xikwembu hi kola kwake, lesvaku hixidzrumisa.

21   Kambe lweyi atiyisaka lesvaku n’wine na hine hiva Kriste atlhela ahitota i Xikwembu,

22   lexi nakone xihibekeliki mfungu, xitlhela xipfa xihitamelisa xitiyiso xa xidumbiso xa xone, anga moya, atimbilwini tezru.

23   Kutani nili Xikwembu axiniphikise loko ali lesvaku nohemba lesvaku kuva ningesibuya Korinte asviyencela kutsretsrelela n’wine!

24   Hikusa ahifumi lipfumelo dzrenu, kambe hotizrisana na n’wine akuva minyonxa, hikusa mitiya hi mhaka ya lipfumelo dzrenu.