BRN

1   Aninavela minilehisela mbilu loko nimphuntile kutsrongonyana. Kambe, svone, manilehisela mbilu!

2   Hikusa ni ni wukwele ha n’wine bza kufana ni wukwele bza Xikwembu, hikuva nimidumbise muchatu ka nuna mun’we lesvaku nitaminyiketa ka Kriste na mili n’hwanyana lwabasiki.

3   Kambe nachava lesvaku na n’wine, svanga hesvi nyoka yingakanganyisa Evha hi maqhinga ya yone, miyanakanyu yenu hi tindlela ta kukazri yingachuka yihoniwa, mitsrhika kubasa ka mbilu ni kubasa ka mahanyela lokufanelaka Kriste.

4   Hikusa, kunene, loko kutlhasa mhunu amibzela ta Yesu wa kuhambana ni lweyi hingamibzela yene, kumbe loko miyamukela moya wa kuhambana ni lowu miwuyamukeliki, kumbe madzrungula lamanene ya kuhambana ni lawa mimapfumeliki, mikahlula mimulehisela mbilu.

5   Hikusa nipimisa lesvaku anivanga ntsrongo ha nchumu ka vapostola volavo va xiyimu xa le henhla.

6   Kambe, nhambiloko nivulavula sva kukala svingatwali, kutiva nativa; funtsrhi lesvi himikombise hi kukhanya hi tindlela hinkwatu ni le minchun’wini hinkwayu.

7   Kumbe nedoha xana hilesvi ningatitsrongahata lesvaku n’wine mitlakuxiwa, hilesvi ningamizrezrela madzrungula lamanene ya Xikwembu hi mahala?

8   Mabandla mambeni “nimatekele” sva wone hi kuyamukela svipfunu sva wone akuva nikota kutizrela n’wine.

9   Kambe, ankama lowu anili na n’wine anibindzriselanga mhunu ni mun’we loko nivilela xa kukazri, hikusa hinkwasvu lesvi anisvivilela ninyikiwe hi vamakwezru lava avabuya hi le Masedonya. Kutani anizanga nimibindzrisela hi nchumu ni wa wun’we nakone nahatatsrhamisa xisvosvo.

10   Svanga hesvi ntiyiso wa Kriste wunga ka mine, ningetsrhiki kutikhuza hi mhaka leyi amigangeni hinkwayu ya le Akaya.

11   Hi mhaka muni? Hi kukala ningamizrandzri kee? Xikwembu xasvitiva lesvaku namizrandzra.

12   Kambe lesvi nisviyencaka svosvi, nitaya amahlweni nisviyenca akuva nisusela mukhandlu lavajulaka kutinyika mukhandlu wa kukumeka na vafana na hine ka lesvi vatikhuzaka ha svone.

13   Hikusa vhanu lavo i vapostola va madzrimi, vatizri va kukanganyisana, lavatiyencaka ingiki i vapostola va Kriste.

14   Nakone asvihlamalisi, hikusa nhambi Sathana atiyenca ingiki i ntsrumi ya livaningo.

15   Xilesvo, ahi nchumu wa kuhlamalisa loko vatizreli vake na vone vatiyenca ingiki i vatizreli va lesva kululama. Kambe wugamu bzavu bzitafana ni mintizro yavu.

16   Nitlhela niphindha, niku: Kungave na mhunu lwapimisaka lesvaku nemphunta. Kambe, nhambiloko nimphuntile, niyamukelani svanga ximphunta, lesvaku na mine nitatikhuzanyana.

17   Lesvi nisvihlayaka anisvihlayi hi kutekelela Hosi, kambe nisvihlaya svanga ximphunta, amhakeni leyi ya kutidumba ni kutikhuza.

18   Lesvi vanyingi vatikhuzaka hi lesvi vanga xisvone hi tlhelo dzra nyama, na mine nitatikhuza.

19   Hikusa n’wine masvizrandzra kulehisela mbilu svimphunta, nhambilesvi mitlhazrihiki.

20   Funtsrhi, nhambiloko mhunu amiyenca svikazrawa svake, nhambi amidela svakuda svenu, nhambi amiwutlela minchumu yenu, nhambi atikulisa ahenhla kwenu, nhambi amiba mpama, n’wine mimulehisela mbilu.

21   Svadanisa kusvihlaya, hikusa ingiki hi loko ahova ni wutoya. Kambe loko lavan’wana va ni xixixi (lani nivulavula svanga ximphunta), na mine ni ni xixixi.

22   I vaheberu? Na mine ni yene. I vayisrayele? Na mine ni yene. I vana va Abrahamu? Na mine ni yene.

23   I vatizreli va Kriste? Nikhanela ingiki toka tingabi, niku nivasiya kule: nitizre sva kubindzra kuvatlula; nikhomiwe kanyingi kuvatlula; nibeteteliwe kutlula mpimu; nakone nihuluke kufa kanyingi;

24   nipshitiwe hi vajuda kantlhanu hi 40 wa minkhavi kusala wun’we;

25   nibiwe hi tinhonga kazrazru; nikhandliwe hi mazribze kan’we; nihonekeliwe hi ngalawa kazrazru; nihete siku dzrin’we ni wusiku bzin’we na ngalawa yezru yopengwa alwandle.

26   Nitsrhame hi kufambafamba, niwela minambu ya kuchavisa, nivhikisana ni vayivi, nivhikisana ni vhanu va tiko dzranga, nivhikisana ni vhanu va matiko man’wana, nikumana ni makhombo adoropeni, nikumana ni makhombo anhoveni, nikumana ni makhombo alwandle, nivhikisana ni vamakwezru va madzrimi,

27   na nitizra ningawisi, niheleliwa hi wuzrongo kanyingi, nidlawa hi ndlala ni tozra, nitsrhama na ningadi masiku ya kutala, nibiwa hi xizrami, nipfumala mpahla.

28   Handle ka minchumu leyo ya le handle, ku ni lexinikazrataka miyanakanyu siku ni siku: inga kuvindlavindleka hi mabandla hinkwawu.

29   I mani angeke na ntamu? Na mine a ni nawu. I mani akhunguvanyisiwaka? Na mine svanihisa.

30   Loko svijula nitikhuza, nitatikhuza hi kupfumala kwanga ntamu.

31   Xikwembu, lexinga Tatana wa Hosi Yesu, lexifanelaka kudzrumisiwa hi la kungahelikiki, xasvitiva lesvaku anihembi.

32   Le Damaxku, hosi ya xifundzrankulu leyingabekiwa hi hosi Areta yizrume vhanu vavonelela doropa hinkwadzru akuva vanikhoma,

33   kambe nixixiwe hi jinela hi khumbi dzra doropa, na nili ndzreni ka ntsrhava, niva nihulukisa xisvosvo amavokweni ya yone.