BRN

1   Svijula nitikhuza. Asvisizi nchumu, kambe nitakhanela hi minchumu leyi Hosi yinganivonisa yone ni leyi yinganipfuletela.

2   Nitiva mhunu lwalumbaka Kriste, lweyi angatlakuliwa ayisiwa atilweni dzra wuzrazru 14 wa malembe lamakhalutiki—kumbe svive hi mizri lowu, anisvitivi, kumbe svive handle ka mizri lowu, anisvitivi; svotiviwa hi Xikwembu.

3   nhambi ningasvitivi lesvaku svive hi mizri lowu kumbe svive handle ka mizri lowu, kunga ntsena Xikwembu xisvitivaka, namutiva mhunu lweyo,

4   lweyi atlakuliwiki ayisiwa aparadeyisini, ayingela mazritu lamangeke na kuhlayiwa, lawa mhunu angapfumeleliwikiki kumahlaya.

5   Nitatikhuza hi mhunu lweyo, kambe ningetitikhuza ha mine; nitotikhuza ntsena hi kupfumala kwanga ntamu.

6   Hikusa nhambiloko nonavela kutikhuza, anitava ningamphuntanga, hikusa anitava na nihlaya ntiyiso. Kambe nhambi svosvo anisviyenci, hikusa kungachuka kuva ni lweyi anidzrumisaka kutlula mpimu hi mhaka ya lesvi asvivonaka kumbe asviyingelaka ha mine,

7   ni lesvi nipfuleteliwiki minchumu ya kutala kutlula mpimu. Xilesvo, akuva ningativoneli henhla kutlula mpimu, nitlhomiwe mutwa anyameni, yinga ntsrumi ya Sathana, akuva yinibukutela, lesvaku ningativoneli henhla kutlula mpimu.

8   Svihambe makhambi mazrazru na nikombela ha svone ka Hosi, lesvaku wusuka kwanga.

9   Kambe yinihlamule lesvi: “Wene awahavileli nchumu kutlula wumbilu lebzi nikukombiki bzone, hikusa ntamu wanga wutikombekisa hi ndlela leyihetisekiki ka mhunu lwangeke na ntamu.” Xilesvo, hi kunyonxa lokukulu, nitatikhuza hi kupfumala kwanga ntamu, lesvaku ntamu wa Kriste wutsrhama ahenhla kwanga.

10   Xisvosvo, ninyonxa hi kupfumala ntamu, hi kuzruketeliwa, hi kubindzreliwa, hi kuxanisiwa ni kukazrateka, hi mhaka ya Kriste. Hikusa loko nipfumala ntamu, hi kone ninga mhunu wa ntamu.

11   Nindzruluke ximphunta. Hi n’wine minganisindzrisa, hikusa inhaka minifakazelile. Hikusa, nhambilesvi ningeke wa nchumu, anivanga ntsrongo ha nchumu ka vapostola volavo va xiyimu xa le henhla.

12   Nakunene, minchumu leyikombisaka lesvaku hi wini mupostola wa ntiyiso yihumexiwile miyivona hi kutiyisela lokukulu, ni hi svikombiso, ni svihlamaliso ni masingita.

13   Hikusa hi le ka mhaka yini n’wine mingakumeka na mitluliwa hi mabandla laman’wana kee? Ova amhakeni ya lesvaku anizanga nimibindzrisela ha nchumu ntse! Nidzrivalelani wubihi lebzo!

14   Lavisani! Ledzri i khambi dzra wuzrazru na nijula kumitlhasela, nakone ningetiva ntsrhwalu. Hikusa anijuli minchumu yenu, kambe nijula n’wine; hikusa ahi vana vafanelaka kubeketela minchumu kunyika vapsele, kambe i vapsele vafanelaka kubeketela minchumu kunyika vana.

15   Mine, ke, hi kunyonxa lokukulu nitatiheta, nihela kungahasali nchumu hi mhaka yenu. Lesvi nimizrandzraka kutlula mpimu, hayini nizrandzriwa kutsrongo?

16   Kambe, nhambi keyenceka yini, animibindzriselanga. Kambe mili ni ni maqhinga nakone nimitlhazrihelile.

17   Svili nimidele xa kukazri hi mun’we wa lava ningavazruma akuva vamiyendzrela kee?

18   Nikombele Tito, nitlhela nizruma makwezru mumbeni akuva amuheketa. Svili xi kone lexi Tito angamidela xone kee? Xana hinkwezru ahifambanga hi moya wa wun’we? Ahiyencanga sva kufanana kee?

19   Xana amipimisa lesvaku hine hotiyimelela amahlweni kwenu? Hine hivulavula amahlweni ka Xikwembu ha Kriste. Kambe, vazrandzriwa, hinkwasvu lesvi hiyencela kumiyaka.

20   Hikusa nichava lesvaku loko nitlhasa, ningachuka nikuma lesvaku ami xisvone lesvi nimijulisaka xisvone, na n’wine mikuma lesvaku ani xisvone lesvi minijulisaka xisvone; kungachuka kukumeka timholova, wukwele, mahlundzru, kuyavana, kulumbetana, kuhlevana, kutikukumuxa ni madzolonga.

21   Nichava lesvaku loko nitlhela nibuya, Xikwembu xanga xingachuka xinidanisa amahlweni kwenu, niva nidzrila hi mhaka ya vanyingi lavangasama vadoha kambe vakalaka vangatisolanga ka mahanyela yavu lamangabasangakiki, ni wugangu ni ka sva tingana lesvi vasviyenceteliki.