BRN

1   Xana hotlhela hi sungula kutiyimelela? Kumbe, kufana ni vambeni, hivilela mapapela ya kuhiyimelela amahlweni kwenu kumbe na masukela kwenu?

2   Hi n’wine hi ntshima minga papela dzrezru, ledzritsraliwiki atimbilwini tezru, ledzritiviwaka dzritlhela dzridondzriwa hi vhanu hinkwavu.

3   Hikusa svatikomba lesvaku n’wine mi papela dzra Kriste ledzritsraliwiki hi hine svanga vatizreli, ledzritsraliwiki hi moya wa Xikwembu lexihanyaka, kunge hi tinta; ka sviphephezrele sva kuhambiwa hi timbilu ta nyama, kunge ka sviphephezrele sva kuhambiwa hi mazribze.

4   Kutani hi ni kudumba loku amahlweni ka Xikwembu ha Kriste.

5   Ahi lesvaku hine wusvezru hokota kuyenca nchumu akuva hingahlaya lesvaku xa kukazri xipfa ka hine, kambe wusvikoti bzezru bzipfa ka Xikwembu,

6   lexihiyenciki hifaneleka kutizra svanga vatizreli va xipfumelelanu leximpsha, kunge xa minawu ya kutsraliwa, kambe xa moya; hikusa minawu ya kutsraliwa yitisa lifu, kambe moya wunyika wutomi.

7   Kutani, loko wutizreli lebzitisaka lifu hi minawu leyingatsraliwa amazribzeni bzibuye hi kuphatima lokukulu, lakakuva vana va Yisrayele vangatiyi ni kulangusa wuso bza Moxe hi mhaka ya kuphatima ka wuso bzake, kunga kuphatima loku akutahelisiwa,

8   i yini xingayencaka lesvaku wutizreli bza moya bzingavi na kuphatima lokutlulisaka?

9   Hikusa loko wutizreli lebzitisaka xikhatiso abziphatima, wutizreli lebzibasisaka minandzru bziphatima hi ndlela leyitlulisaka!

10   Hikusa, nakunene, nhambi nchumu lowu awuphatima ankameni lowuya awahaphatimi, hi mhaka ya kuphatima lokuwusiyaka kule svinene.

11   Hikusa loko lesvi asvitahelisiwa svinhingenisiwe hi kuphatima, kuphatima ka lesvitsrhamaka hi masiku akutava lokukulu hi ndlela leyitlulisaka!

12   Lesvi hinga ni kudumba koloko, hivulavula na hingatilumalumi,

13   nakone ahifani na Moxe lweyi aahamba atipfala wuso hi ntuzru akuva vana va Yisrayele vangasvikoti kulangutisa wugamu bza lesvi asvitagama hi kuhelisiwa.

14   Kambe tinhloko tavu titiyelile. Hikusa ni namunhla ntuzru wutsrhama na wungasukanga loko kudondzriwa xipfumelelanu xa khale hi zritu dzra le henhla, hikuva wosusiwa ntsena ha Kriste.

15   Kunene, ni namunhla, loko vadondzra matsralwa ya Moxe hi zritu dzra le henhla, kutsrhama ntuzru atimbilwini tavu.

16   Kambe loko mhunu andzruluka aya ka Jehovha, ntuzru wasuka.

17   Hikuva Jehovha i Moya, kutani lomu kunga ni moya wa Jehovha ku ni ntsrhunxeko.

18   Kutani hinkwezru, lesvi hifunukuliwiki wuso, hikombekisa kuphatima ka Jehovha kufana ni svivonivoni, nakone hindzrulutiwa hifana na yene, hisuka ka maphatimela ya kukazri hiya ka man’wana, hi la sviyenciwaka ha kone ha Jehovha, lwanga Moya.