-
2 Vakorinte 4
1 Xilesvo, lesvi hinga ni wutizreli lebzi, hi mhaka ya lesvi hitweliwiki wusiwana, ahigodoli.
2 Kambe hitsrhike minchumu ya tingana leyifihliwiki. Ahahafambi hi kukanganyisa nakone ahihlulukisi zritu dzra Xikwembu. Kuhambana ni svosvo, hi kubeka ntiyiso alivaleni, hiyenca lesvaku lipfalu dzra mun’wana ni mun’wana dzrinyonxa hi hine amahlweni ka Xikwembu.
3 Kunene, loko madzrungula lamanene lawa himatwalisaka mafihlekile, mefihleka ntsena ka lavayaka akufeni,
4 lava amakazri kwavu xikwembu xa misava leyi xidlayiki matihlo ya miyanakanyu ya lavangapfumelikiki, lesvaku vangavaningeliwi hi kuvaninga ka kuphatima ka madzrungula lamanene ya Kriste, lwanga xifaniso xa Xikwembu.
5 Hikusa ahifambi hitwalisa svezru, kambe hifamba hitwalisa Kriste, lwanga Hosi; kutani hine hi svikazrawa svenu hi mhaka ya Yesu.
6 Hikusa Xikwembu hi xone xitiki: “Livaningo adzrivaninge amunyameni!” Kutani xihivaningele timbilu akuva hikota kuvona kuphatima ka wutivi bza Xikwembu lokunga wusweni bza Kriste.
7 Nhambitanu, hi ni wukosi lebzi asvibzeni sva vumba, akuva svivoneka lesvaku ntamu lowutlulisaka hi wukulu awuhumi kwezru kambe wuhuma ka Xikwembu.
8 Hikamiwa hi tindlela hinkwatu, kambe ahimanyekanga; hidideka tinhloko, kambe ahisali na hingaxitivi ni xa kuxiyenca;
9 haxanisiwa, kambe ahisiyiwi wusvezru; hawisiwa, kambe ahihelisiwi.
10 Minkama hinkwayu hifambafamba ni kufa ka kufana ni ka Yesu amizrini wezru, lesvaku wutomi bza Yesu na bzone bzingakombekisiwa amizrini wezru.
11 Hikusa minkama hinkwayu hine hihanyaka hile khombzeni dzra kufa hi mhaka ya Yesu, lesvaku wutomi bza Yesu na bzone bzingakombekisiwa anyameni yezru leyifaka.
12 Kutani hine hitsrhama hi kufa, kambe n’wine mohanya.
13 Kambe, lesvi hinga ni moya wa lipfumelo wa kufana ni wa lesvitsraliwiki, sviku: “Lipfumelo ledzri niviki nadzru dzriniyence nikhanela”; na hine lipfumelo ledzri hiviki nadzru dzrihiyence hikhanela,
14 hi kutiva lesvaku Lweyi apfuxiki Yesu atahipfuxa na hine xikan’we na Yesu, nakone atahikombekisa xikan’we na n’wine.
15 Hikusa minchumu hinkwayu yiyenceliwa kupfuna n’wine, lesvaku wumbilu lebza kutala ngopfu svinene bzingayandzrisisa, hikuva vanyingi ngopfu vahumexa svikhenso lesviyisaka lidzrumu ka Xikwembu.
16 Xilesvo, ahigodoli, kambe nhambiloko mhunu lweyi hinga yene hi le handle abola, kunene mhunu lweyi hinga yene hi le ndzreni awapfuxetiwa siku dzrin’wana ni dzrin’wana.
17 Hikusa kukazrateka kwezru i ka nkamanyana nakone kavevuka, kambe kutahitisela kuphatima lokutlulisaka hi wukulu ni lokungahelikiki.
18 Xilesvo, hingalanguseni minchumu leyivoniwaka, kambe ahilanguseni minchumu leyingavoniwikiki. Hikusa minchumu leyivoniwaka i ya nkamanyana, kambe minchumu leyingavoniwikiki i ya minkama leyingeke na wugamu.