BRN

1   Xilesvo, lesvi hinga ni svidumbiso lesvi, vazrandzriwa, ahitibasiseni ka minchumu hinkwayu leyinchimisaka nyama ni moya, hihetisekisa kuxwenga hi kuchava Xikwembu.

2   Hitsrhikani hinhingena timbilwini tenu. Ahingiyencela mhunu wubihi, ahingikanganyisa mhunu, nakone ahingidela mhunu nchumu.

3   Lesvi anihlayeli kumisola. Hikusa nike nihlaya lesvaku n’wine mile timbilwini tezru nakone mitafa na hine mitlhela mihanya na hine.

4   Nikhanela na n’wine na ningatilumalumi ni kutsrongo. Nitikhuza svinene ha n’wine. Nitiyisiwa ngopfu nhlana ha n’wine; akuxanisekeni kwezru hinkwaku, nitala hi kunyonxa lokutlhelaka kuhalakela.

5   Hikusa, loko hitlhase Masedonya, ahikumanga kuwisa ni kutsrongo, kambe hikamekile hi tindlela hinkwatu; kukumeka lesvaku le handle i tiyimpi, le ndzreni i kuchava.

6   Kambe Xikwembu, lexichavelelaka lavaheliki ntamu, xihichavelelile hi kuhumelela ka Tito;

7   kunge ntsena hi kuhumelela kwake kambe ni hi mazritu ya kutiyisa nhlana lawa mimuchaveleliki ha wone, hikusa ahidzrungulelile lesvaku minixuva svinene, ni lesvaku mivaviseka ngopfu nakone mizron’weka ngopfu ha mine. Xisvosvo, ninyonxisise ngopfu.

8   Hikusa, nhambiloko nimitsrhove timbilu hi papela dzranga, anititwi nandzru. Akusunguleni nititwe nandzru hi kuvona lesvaku papela ledzro dzrimitsrhove timbilu, nhambilesvi  svikalaka svingatekanga nkama wa kuleha.

9   Kambe svosvi nanyonxa, naninganyonxi hilesvi mitsrhovekiki timbilu ntsena, kambe hilesvi miziki mitisola hi kutwa timbilu kuvavisa. Hikusa mivaviseke hi mavavisekela ya mhunu lwachavaka Xikwembu, xilesvo amizanga mikhunguvanyisiwa ha hine.

10   Hikusa kuvaviseka hi mavavisekela ya mhunu lwachavaka Xikwembu kuyenca mhunu atisola, akuma kuhuluka, ava asala na angatitwi nandzru ha nchumu; kambe kuvaviseka hi mavavisekela ya misava kupsala lifu.

11   Vonani ha wusvenu lesvaku kuvaviseka kwenu hi mavavisekela ya mhunu lwachavaka Xikwembu kumiyence yini! Mizron’wekile, ina, mitibasise nandzru, ina, minyenyentsekile hi sva kubiha, ina, michavile, ina, minavele ngopfu, ina, mihisekile, ina milulamise lesvihoxekiki! Mitikombise hi tindlela hinkwatu lesvaku mibasile amhakeni leyi.

12   Nhambiloko nimitsralelile, aniyencelanga lweyi ahoxiki kumbe lweyi ahoxeliwiki, kambe niyencele akuva svitikomba amakazri kwenu lesvaku mazron’weka ha hine amahlweni ka Xikwembu.

13   Hi mhaka leyo, hichavelelekile. Kambe handle ka kuchaveleleka kwezru, hitlhele hinyonxisisa hi kuvona Tito na anyonxile, hilesvi n’wine hinkwenu mingamuzrulisa mbilu.

14   Hikusa loko nitikhuze ha n’wine amahlweni kwake, anidanisiwanga; kambe svanga hesvi hinkwasvu lesvi himibzeliki svone svitiyiki, ni ko kutikhuza kwezru amahlweni ka Tito kutiyisiwile.

15   Nakone, lesvi amizrandzrisaka xisvone asvihlayeki loko adzrimuka lesvi mimuyingisetisiki xisvone, lesvi mimuhoyozelisiki xisvone hi kuchava ni kuzruzrumela.

16   Nanyonxa hilesvi ningamidumbaka aminchun’wini hinkwayu.