BRN

1   Kasi mayelanu ni wutizreli bza kupfuna vhanu va Xikwembu lava kuxwenga, kunene asvahajuli nimitsralela nchumu,

2   hikusa nawutiva moya wenu wa kuyenca minchumu hi kusvizrandzra, lowu nitikhuzaka ha wone ka va le Masedonya, lesvaku bandla dzra le Akaya dzritibekisele kusukela ka lembe ledzrikhalutiki, kutani nkhinkhi yenu yipfuxe wunyingi bza vone.

3   Kambe nimizrumelela vamakwezru, akuva kutikhuza kwezru ha n’wine kungachuki kuva ka mahala amhakeni leyi ni lesvaku kunene miva lavatsrhamaka na mitibekiselile, hi la ningahlaya ha kone lesvaku amitava tanu.

4   Hikusa loko va le Masedonya votlhasa na mine vamikuma na mingatibekiselanga, hitadana (ningahlayi n’wine) hilesvi hingamidumba.

5   Xilesvo, nivone svijuleka kukombela vamakwezru lesvaku vapfa vazranga vatlhasa halanu akuva vapfa valulamisela na wehe nkama xihananu xenu xa kusukela ambilwini lexi mingaxidumbisa, akuva xitsrhama na xibekisekile svanga nchumu wa kuhananiwa hi voko dzra kupfuleka, kunge nchumu wa kutekeliwa.

6   Kambe amhakeni leyi, lweyi abzalaka na afelela atatsrhovela sva kukala svingatati xiyandla, kasi lweyi abzalaka sva svinyingi atatsrhovela sva kutata matsrhala.

7   Mun’wana ni mun’wana aayence hi la abohiki ha kone ambilwini; angayence na angasvijuli kumbe hi kusindzriseka, hikusa Xikwembu xizrandzra lweyi anyikelaka na anyonxile.

8   Kambe, Xikwembu xingamiyenca mitaleliwa hi wumbilu hinkwabzu bza xone akuva minkama hinkwayu miva ni hinkwasvu lesvi misvivilelaka hi matlhelo hinkwawu, mitlhela mitaleliwa hi mintizro hinkwayu ya kuxonga.

9   (Svanga hesvi kutsraliwiki ha kone: “Afambe aphakela; ahanane svisiwana. Wululami bzake bzitsrhama hi la kungahelikiki.”

10   Kutani yene lweyi aphakelaka mubzali timbewu ni svakuda lesvaku ada atamiphakela ava amiyandzrisela timbewu akuva mibzala nakone atayengetela mihandzru ya wululami bzenu.)

11   Mitayenciwa svigogo aminchun’wini hinkwayu akuva mikota kuva ni kuhanana ka mixaka hinkwayu, lokuyencaka lesvaku hitlangela Xikwembu;

12   hikuva ntizro lowu wa kupfuna vhanu awunyiki ntsena vhanu va Xikwembu lava kuxwenga lesvi vasvipfumalaka, kambe wutlhela wuyenca lesvaku kuhuma mazritu ya kutala ya kutlangela Xikwembu.

13   Hi kuvona mihandzru ya ntizro lowu wa xipfunu, vatwalisa Xikwembu hilesvi milandzraka madzrungula lamanene ya Kriste, hi kutwanana ni lesvi mitihlayaka svone alivaleni, ni hilesvi mihumexiki sva kupfuna vone ni hinkwavu hi mbilu ya kuzrandzra kuhanana.

14   Nakone asvikhongotweni svavu vamikombelela, hikusa vamizrandzra ngopfu hilesvi wumbilu bza Xikwembu bzingamitatela svinene.

15   Akukhensiwe Xikwembu hi mhaka ya nyiko ya xone leyi kungeke na mazritu ya kuyitlhamuxela.