-
2 Vatesalonika 2
1 Kambe, vamakwezru, mayelanu ni kuhumelela ka Hosi yezru Yesu Kriste ni kutlhanganisiwa kwezru na yene, himikombela lesvi:
2 Mingahatli midzolonganisiwa miyanakanyu kumbe michavisiwa, hi mhunu lwahleveliwaka hi moya kumbe hi zritu, kumbe hi papela dzra kukazri ledzriyencaka ingiki dzrihuma kwezru, na dzriku siku dzra Jehovha dzritlhasile.
3 Kungave na mhunu lwamilahlekisaka hi ndlela yini na yini, hikusa dzringetita na kungesizranga kutlhasa wuduki, ni kuva kupaluxiwile mhunu wa kutlula nawu, anga n’wana wa kuhelisiwa,
4 lweyi akanetaka atlhela atitlakuxa ahenhla ka xin’wana ni xin’wana lexivitaniwaka xikwembu kumbe nchumu lowugandzreliwaka, akuva atsrhamisa atempeleni dzra Xikwembu, atiyenca xikwembu amahlweni ka vhanu.
5 Amidzrimuki lesvaku loko nahali na n’wine, anihamba nimibzela minchumu leyi?
6 Nakone svosvi maxitiva leximusivelaka, akuva atapaluxiwa hi nkama wake lowufanelekaka.
7 Hikusa xihundla xa kutlula loku ka nawu nhambi svosvi xatizra; kambe ntsena xitagama loko lweyi svosvi amusivelaka asuka ndleleni.
8 Kutani ankameni lowo, lwewa kutlula nawu atapaluxiwa, yene lweyi Hosi Yesu atakamuhelisa hi kufufuta ka nomu wake ava amuheta, hi nkama lowu kuhumelela kwake kutakakombekisiwa ha wone.
9 Kambe kuhumelela ka lwewa kutlula nawu kuvoneka hi matizrela ya Sathana hi masingita, svikombiso ni svihlamaliso hinkwasvu sva madzrimi,
10 ni wukanganyisi hinkwabzu lebza kubiha lebziyisaka vhanu akufeni, vatakhawula hilesvi vakalaka vangayamukelanga lizrandzru dzra kuzrandzra ntiyiso akuva vatakota kuhuluxiwa.
11 Kutani, hi mhaka yoleyi, Xikwembu xitsrhika wukanganyisi bzivatizrisa akuva vakholwa madzrimi,
12 kuyencela lesvaku kuyavanyisiwa hinkwavu lava kukala vangapfumelanga ntiyiso kambe vanyonxisiwiki hi wubihi.
13 Kambe hisindzriseka kukhensa Xikwembu minkama hinkwayu hi nkonta yenu, vamakwezru lavazrandzriwaka hi Jehovha, hikusa kusukela akusunguleni Xikwembu ximihlawulile akuva mihuluka, hi kumixwengisa hi moya wa xone ni hi lipfumelo dzrenu ka ntiyiso.
14 Ximivitanele lesvi hi kola ka madzrungula lamanene lawa himahlayaka, akuva mikota kukuma kuphatima ka Hosi yezru Yesu Kriste.
15 Hi lesvo ke, vamakwezru, yimani mitiya, mikhomelela ka mikhuva leyi midondzrisiwiki yone, angava hi zritu kumbe hi papela ledzrihumaka kwezru.
16 Nakone ahinavela lesvaku Hosi yezru hi ntshima, Yesu Kriste, kupatsra na xone Xikwembu lexinga Tatana wezru lwahizrandzriki atlhela ahinyika nchavelelo lowungahelikiki ni dumbo ledzrinene hi kola ka wumbilu bzake,
17 yingachavelela timbilu tenu yiva yimitiyisa antizrweni wun’wana ni wun’wana lowunene ni le zritwini dzrin’wana ni dzrin’wana ledzrinene.