BRN

1   Mine, nkulu wa mhunu, nitsralelaka Gayu, muzrandzriwa, lweyi nimuzrandzraka hi ntiyiso.

2   Muzrandzriwa, atimhakeni hinkwatu nikhongota lesvaku svikufambela ha hombe ni kuva utihanyela ha hombe, svanga hesvi svikufambelaka ha hombe awuton’wini bzaku.

3   Hikuva ninyonxe ngopfu svinene loko kubuye vamakwezru, vava vabeka wumboni bza ntiyiso lowu unga na wone, svanga hesvi ufambaka antiyisweni.

4   Ani na nchumu wa kunyonxisa kutlula kuyingela ndzrava ya lesvaku vana vanga va kazri vafamba antiyisweni.

5   Muzrandzriwa, uyenca ntizro wa kudumbeka ka xini na xini lexi uxiyencelaka vamakwezru, nakuve i vayeni,

6   lavabekiki wumboni bza lizrandzru ledzri unga nadzru hi bandla, lava utakayenca svone loko uvaheleketa andleleni yavu hi mukhuva lowufanelaka Xikwembu.

7   Hikuva vahume hi nkonta ya vito dzra xone, na vangateki nchumu ka vhanu va matiko.

8   Xilesvo, hifanela kukomba malwandla vhanu va muxaka lowo akuva hitizrisana hi xihine antiyisweni.

9   Nitsralele bandla, kambe Diyotrefa, lweyi azrandzraka kutichaya phambili amakazri ka vhanu, angahiyamukeli.

10   Hi mhaka yoleyo, loko nochuka nita, nitamudzrimuxa mintizro yake leyi ayiyencetelaka, lesvi apshapshazraka hi hine hi mazritu ya mahlevo. Kambe nhambi svosvo asvimukolwi; vamakwezru angavayamukeli hi ndlela ya kone, nakone, lavajulaka kuvayamukela, awavatsimba atlhela avahlongola abandleni.

11   Muzrandzriwa, ungatekeleli lesva kubiha kambe tekelela lesvinene. Lweyi ayencaka lesvinene ahuma ka Xikwembu. Lweyi ayencaka lesva kubiha angaxivonanga Xikwembu.

12   Hinkwavu vanyikele madzrungula lamanyonxisaka hi Demetru; nhambi ntiyiso hi ntshima, na wone wamuseketela. Funtsrhi, nhambi hi hine hi ni wumboni bza kumuseketela, nakone wene wasvitiva lesvaku wumboni bzezru i bza ntiyiso.

13   I svinyingi lesvi anili nasvu akuva nikutsralela, kambe aninaveli svone sva kuyenca hi kukutsralela hi papela ni ntinta.

14   Kambe nilavisela kukahlula nikuvona, hitakhanela na hivonana. Sala hi kuzrula. Vanakulozri vakudzrungula. Nidzrungulele vanakulozri hi mavito.