-
Matewu 2
1 Antsrhaku ka kupsaliwa ka Yesu le Bethlehema wa Judeya amasikwini ya hosi Heroda, kutlhasa tin’anga ta tinyeleti ta le Wuxeni le Jerusalema,
2 tiku: “A kwini lweyi apsaleliwiki kuva hosi ya vajuda? Hikusa hivone nyeleti yake na hili Wuxeni, kutani hibuya hitamukhinsamela.”
3 Kutani loko ayingela lesvo, Hosi Heroda atalataleka, ni doropa hinkwadzru dzra Jerusalema dzritalataleka naye.
4 Kuteloko atlhanganisile vaprista lavakulu hinkwavu ni vatsrali va tiko, avavutisisa lesvaku Kriste aatapsaliwa kwini.
5 Kutani vamuhlamula, vaku: “Le Bethlehema wa Judeya, hikusa hi svosvo svingatsralisiwa xisvone hi muprofeta, lwangaku:
6 ‘Na wene, Bethlehema wa tiko dzra Juda, awu lwentsrongo ka hinkwavu amakazri ka vafumi va Juda, hikusa ka wene kutahuma mufumi, lweyi atakabzisa tiko dzranga dzra Yisrayele.’”
7 Kutani Heroda avitana tin’anga ta tinyeleti axihundleni ativutisisa ha hombe lesvaku nyeleti yihumelele nkama muni.
8 Agama atizrumela le Bethlehema, aku: “Fambani miyaxijuletela ha hombe xin’wanana lexo. Loko mixikumile, nitivisani akuva na mine nitakota kufamba niyaxikhinsamela.”
9 Loko tiheta kukhanela ni hosi, tikhoma ndlela, kutani nyeleti leyi tiyivoniki na tili Wuxeni yitizrangela yiko yiyayima ahenhla ka yindlu leyi xin’wanana axili ka yone.
10 Kutani loko tivona nyeleti, tin’anga ta tinyeleti tinyonxa ngopfu svinene.
11 Tite tinhingena andlwini, tovona xin’wanana ni mamana wa xone, Mariya. Kutani tiwela hansi, tixikhinsamela. Titlhela tipfula mabokisi ya wukosi bza tone tixinyika svihananu: gole ni mizri ya kunun’hwelisa andlwini ni mafuzra ya kunun’hwela.
12 Kambe, lesvi Xikwembu xingatitivisa hi nozro lesvaku tingatlheleli ka Heroda, titlhelele atikweni dzra tone hi ndlela yin’wana.
13 Kutani loko tin’anga ta tinyeleti timukile, kohumelela ntsrumi ya Jehovha ka Josefa anozrweni, yiku: “Pfuka uteka xin’wanana lexo ni mamana wa xone, utsrutsrumela Gibita uyatsrhama kone niko nikunyika zritu, hikusa Heroda atajuletela xin’wanana lexo ataxidlaya.”
14 Kutani Josefa apfuka ni wusiku ateka xin’wanana ni mamana wa xone, aya Gibita.
15 Atsrhama kone Heroda ako afa, akuva kuhetiseka lesvihlayiwiki hi Jehovha hi kutizrisa muprofeta wake, aku: “Nivitane n’wananga ahuma Gibita.”
16 Kutani loko Heroda avona lesvaku tin’anga ta tinyeleti timutlhazrihelile, ahlundzruka ngopfu svinene. Kutani aleleta lesvaku kuyadlayiwa svifanyatana hinkwasvu sva le Bethlehema ni le migangeni ya le kusuhi na kone, sva kusukela ka malembe mabidzri kuya hansi, hi kuya hi nkama lowu angavutisisa ha wone tin’anga ta tinyeleti.
17 Kutani kuhetiseka lesvihlayiwiki hi muprofeta Jeremiya, lwangaku:
18 “Kutwala huwa le Rama: nkosi ni xidzrilo lexikulu. I Rakele adzrilelaka vanake; angapfumeli nhambi kumiyeteliwa, hikusa avahali kone.”
19 Kutani loko Heroda afile, ntsrumi ya Jehovha yihumelela ka Josefa hi nozro le Gibita,
20 yiku: “Pfuka uteka xin’wanana lexo ni mamana wa xone, unhingena atikweni dzra Yisrayele, hikusa vafile lava avajula kuxisusa wutomi xin’wanana lexo.”
21 Kutani apfuka ateka xin’wanana ni mamana wa xone, anhingena atikweni dzra Yisrayele.
22 Kambe loko ayingela lesvaku Arkelawu afuma Judeya ambangwini wa Heroda, tatana wake, Josefa achava kuya kone. Kutani, loko Xikwembu xikhanele naye hi nozro, asuka akongoma amugangeni wa Galileya.
23 Kutani loko atlhasile, atsrhame ka doropa ledzrivitaniwaka Nazareta, akuva kuhetiseka mazritu lamahlayiwiki hi kutizrisa vaprofeta, lesvaku atavitaniwa ‘munazareta’.