Lexi xisusumeteliki kuhumexiwa ka Bibele Hi Xizronga Xa Namunhla (BRN) i kukhensa Xikwembu Xa Ntamu Hinkwawu hilesvi xinyikiki vhanu va tinxaka hinkwatu ni va tindzrimi hinkwatu Zritu Dzra xone, ledzrikotaka kuhikongomisa akuva hikuma kunyonxa svosvi ni kulavisela ka wumundzruku.
Bibele ledzri ngopfungopfu dzrihambiwe kusukela ka matsralwa ya xinghiza lamalongoloxiwiki ni matsralwa ya xigrika ka Interlinear Bible, ledzrikumekaka ka www.biblehub.com. Mabibele man’wana ya xinghiza na wone makambisisiwile mava matizrisiwa lomu svifanelaka kone.
Kudzringisiwe kutizrisa mavulavulela lamanabzaliki, lamangakotaka kutwisisiwa hi vavulavuli va xizronga va tintanga hinkwatu ni mimbangu hinkwayu leyi kuvulavuliwaka lidzrimi ledzri. Xilesvo, nhambiloko mahlayela man’wana ya xikhale mapumbiwile, kujuliwe tindlela ta kuyenca lesvaku kudondzra Zritu dzra Xikwembu hi xizronga svahatama svinandzrika svitlhela svikhumba mbilu. Akuva lesvo svikoteka, kuyanakanyeliwe ngopfu vavulavuli va xizronga lavatizrisaka lidzrimi ledzri xilesvi vadzridondzrisiki xisvone ka vapsele lavanga vavulavuli va mapsaliwa va xizronga. Xilesvo, ka Bibele ledzri, i matsrongo svinene mazritu lamahumaka ka xiputukezi. Lesviliki, mazritu manyingi ya xiputukezi, lawa vhanu va kutala vamatizrisaka ka mavulavulela yavu ya siku ni siku, magegiwile loko kuvoniwe lesvaku amayengeteli kutwisisa ka ntlhamuxelo wa Zritu ledzrihuhuteliwiki dzra Mutumbuluxi wa vhanu.
Matsralela lamatizrisiwaka ka Bibele ledzri i ya xinan’waka, nakone malandzra milawu leyitsrimbiwiki ka Nhlengeletanu ya Wuzrazru Ya Kubeka Milawu Ya Matsralela Ya Tindzrimi Ta Musambiki (III Seminário sobre a Padronização da Ortografia de Línguas Moçambicanas), kupatsra ni kucinca kuzrazru lokunhingenisiwiki ka Nhlengeletanu ya Wumune Ya Kubeka Milawu Ya Matsralela Ya Tindzrimi Ta Musambiki (IV Seminário sobre a Padronização da Ortografia de Línguas Moçambicanas), hi 2018. Kucinca koloko kusiva rh hi zr (hi xikombiso: zritu, amatsrhan’wini ya rhitu), tr hi tsr (hi xikombiso: tsrema, amatsrhan’wini ya trema), ni dr hi dzr (hi xikombiso: dzrila, amatsrhan’wini ya drila).
Na dzringasibasisiwa, Bibele ledzri dzrizrumeliwe ka vhanu lavatlulaka 50, akuva vadzridondzra ni kunyikela mavonela yavu mayelanu ni lomu mahlayela mangayampsisiwaka kone akuva Zritu dzra Xikwembu dzridondzreka hi ndlela ya kunabzala, leyitwisisekaka ni leyinga ya ntumbuluku. Kusuhi na 30 wa vone vatlhelise zritu ni mavonela yavu, lamapfuniki ngopfu svinene. Hibeka khanimambu wa kukheteka ka volavo hinkwavu.
Hi wugamu, hi nkama lowu hihumexaka Bibele ledzri, hilavisela lesvaku hinkwavu vazrandzri va Zritu dzra Xikwembu Nkulukumba vatatikholisa hi kudondzra Bibele Hi Xizronga Xa Namunhla (BRN). Hitakhensa hi mbilu loko vadondzri vahizrumelela svilayu, mavonela kumbe svivutiso svavu ka [email protected].
KaMatsrolo, Mudaxini wa 2021 (05/2021)