-
Matewu 3
1 Amasikwini wolawo, Johani Mubabatisi abuye atatazrezra le mananga ya Judeya,
2 aku: “Tisolani, hikusa Mfumu wa matilo wutsrhindzrekelile.”
3 Hikuva lweyi hi yelweyi kukhaneliwaka ha yene hi kutizrisa muprofeta Ezaya hi mazritu lawa: “Zritu dzra lweyi ahuwelelaka le mananga dzrili: ‘Lulamiselani ndlela ya Jehovha! Wololoxani svitaratu svake.’”
4 Kutani Johani aayambala voya bza kamele, atsrimba masenge hi bandi dzra xikhumba. Aahanya hi kuda maqwadi ni wulombe bza tinyonxi.
5 Kutani vhanu va Jerusalema ni Judeya hinkwaku, ni le mugangeni hinkwawu kusuhi na Jordani, avahuma vamuyela.
6 Kutani avababatisa anambzeni wa Jordani, na vatihlaya svidoho svavu alivaleni.
7 Loko avona vafarisi ni vasaduki va vanyingi na vatela kubabatisiwa, aku ka vone: “N’wine vana va svipshahla, i mani amilumiki ndleve akuva mihuluka ka mahlundzru lamataka?
8 Ina ka, humexani mihandzru leyikombisaka kutisola.
9 Nakone mingatibzeli lesvi: ‘Hine hi vana va Abrahamu.’ Hikusa nimibzela lesvaku Xikwembu xingahambela Abrahamu vana hi mazribze lawa.
10 Nakone chati kutani dzrigineteliwe amitsrwini ya minsinya. Minsinya hinkwayu leyingabekiki mihandzru leyinene yitatsremiwa yicukumeteliwa andzrilweni.
11 Kasi loko ali mine, nimibabatisa hi mati hi kutisola kwenu, kambe lweyi ataka antsrhaku kwanga awanitlula hi ntamu; ni kufaneliwa anifaneliwi hi kumususa masandhazi. Lweyo ke atamibabatisa hi moya wa kuxwenga ni hi ndzrilo.
12 Focholo dzrake dzra kuhehezra dzri le vokweni dzrake. Atabasisa mbangu wake wa kuhula tirigu hi kuhelela, ahlengeleta tirigu dzrake axitlhanteni, kambe makamba ya kone atamahisa hi ndzrilo lowungeke na kutimiwa.”
13 Kutani Yesu asuka Galileya aya Jordani ka Johani, akuva ababatisiwa hi yene.
14 Kambe Johani aamusivela, aku: “Hi mine lwajulaka kubabatisiwa hi wene, kasi wene uta kwanga?”
15 Yesu amuhlamula, aku: “Svitsrhike sviyencekisa xisvosvo svosvi, hikusa hi yo ndlela ya kone leyi svihifanelaka kuhetisisa hinkwasvu lesvilulamiki.” Kutani amutsrhika ababatisiwa.
16 Loko ababatisiwile, Yesu atekela kuhuma amatini. Kutani matilo mapfuleka, avona moya wa Xikwembu na wuxika kufana ni tuva, wuyima ahenhla kwake.
17 Kutani kutwala zritu na dzrihuma amatilweni, dzriku: “Lweyi i N’wananga wa kuzrandzriwa, lweyi ninyonxaka hi yene.”