-
Matewu 9
1 Kutani Yesu anhingena abotini, atlulela halahaya ka lwandle, anhingena adoropeni dzra le kwavu.
2 Kutani vamubuyisela mhunu wa kuwonyana svizro na ayetlele ka xinkukwana. Loko avona lipfumelo dzravu, Yesu aku ka lweyi wa kuwonyana svizro: “Tiya mbilu, n’wananga! Svidoho svaku svidzrivaleliwile.”
3 Kutani vatsrali van’we vahlaya lesvi hi le ndzreni ka mbilu: “Mhunu lweyi awasandzra.”
4 Yesu, hi kutiva mimpimiso yavu, aku: “Hayini mipimisa minchumu ya kubiha atimbilwini tenu?
5 Hikuva, hi svini svinabzalaka ngopfu? I kuhlaya lesvaku: ‘Svidoho svaku svidzrivaleliwile’, kumbe i kuhlaya lesvaku: ‘Sekeleka ufamba’?
6 Kambe, ke, mitasvitiva lesvaku N’wana wa Mhunu a ni ntamu wa kudzrivalela svidoho amisaveni.” Kutani aku ka lweyi wa kuwonyana svizro: “Sekeleka utlakula xinkukwana xaku utimukela.”
7 Kutani asekeleka atimukela.
8 Loko svitsrhungu svivona lesvi, svitala hi nchavu, svidzrumisa Xikwembu, lexinyikiki vhanu ntamu wa ku tanu.
9 Kutani, kuteloko asuka ambangwini lowo aya amahlweni, Yesu avona mun’we wanuna lwavitaniwaka Matewu na atsrhame andlwini ya kuhakelisa tinemba. Kutani aku ka yene: ‘Nilandzre.’ Kolanu, asekeleka amulandzra.
10 Kutani, na ali kudeni andlwini, kotlhasa vahakelisi va tinemba ni vadohi va vanyingi vatatada na Yesu ni vadondzrisiwa vake.
11 Kambe loko vavona lesvi, vafarisi vavutisa vadondzrisiwa vake, vaku: “Hayini mudondzrisi wenu ada xikan’we ni vahakelisi va tinemba ni vadohi kee?”
12 Loko avayingela, aku: “Lavanga vatomi avavileli mudahi, kambe ntsena lavavabzaka.
13 Xilesvo, fambani miyadondzra ntlhamuxelo wa mazritu lamaliki: ‘Lexi nixijulaka i timpsalu, kungali xitlhavelo.’ Hikusa anitelanga kutavitana valulami, kambe vadohi.”
14 Kutani vadondzrisiwa va Johani vamutlhasela, vamuvutisa lesvi: “Hayini hine ni vafarisi hititsrona svakuda nakuve vadondzrisiwa vaku avatitsroni?”
15 Yesu aku ka vone: “Ahi svone lesvaku vanghanu va muteki vangedzrili na muteki ahali navu? Kambe mata masiku lawa muteki atakasusiwa ka vone. Lanu ke vatatitsrona svakuda.
16 Anga kone lweyi azrungelaka xihlama hi panu yimpsha ka xiyambalu xa khale, hikusa panu leyimpsha yitakokeka ka xiyambalu kutani la kuhandzrukiki kuyengeteleka.
17 Nakone, avacheli vhinyo dzrimpsha ka minkwama ya khale. Kambe loko vochela, minkwama yitahandzruka kutani vhinyo dzrihalaka kuva kuhoneka ni minkwama. Kambe vhanu vachela vhinyo dzrimpsha ka minkwama ya yimpsha, kutani ha svibidzri svihlayiseka.”
18 Na ahavabzela minchumu leyi, kutsrhindzrekela mun’we wa muzrangeli amukhinsamela, aku: “Lowu nkama n’wananga kusvijula afile, kambe buya umutlhanteka voko atatlhela ahanya.”
19 Kutani Yesu asekeleka amulandzra, yene ni vadondzrisiwa vake.
20 Kutani mun’we wansati lwangaheta 12 wa malembe na axaniseka hi mavabzi ya kuhumela ngati atsrhindzrekela ntsrhaku kwake akhumba mponta ya xiyambalu xake.
21 Hikusa hi le ndzreni ka mbilu aaku: “Loko ntsena nokhumba mujansi wake, nitahanya.”
22 Kutani Yesu andzruluka; loko amuvona, aku: “Tiya mbilu, n’wananga! Lipfumelo dzraku dzrikuhanyisile.” Kutani kusukela ka nkama wolowo wansati lweyo ahanya.
23 Kutani loko anhingena andlwini ya muzrangeli lweyo, akuma lesvaku ku ni vachayi va tinsimu letiyimbeleliwaka akufeni ni xitsrhungu lexi axihamba pongwe.
24 Kutani Yesu aku: “Sukani lani, hikusa xin’hwanyatana lexi axifanga, kambe xeyetlela.” Kutani vasungula kumuhleka.
25 Kutani loko xitsrhungu xihumexiwile ahandle, anhingena akhoma xin’hwanyatana hi voko, kutani xipfuka.
26 Kutani ndzrava ya kone yihangalaka amugangeni wolowo hinkwawu.
27 Loko Yesu aku awasuka kolanu, vavanuna vabidzri va kuka vangavoni vamulandzrelela na vabandlukana, vaku: “Hitwele wusiwana, N’wana Davhida!”
28 Kuteloko anhingene andlwini, vavanuna lava kuka vangavoni vamubuyela; kutani Yesu avavutisa, aku: “Xana mapfumela lesvaku ningasviyenca lesvo?” Vamuhlamula, vaku: “Ina, Hosi.”
29 Kutani akhumba matihlo yavu, aku: “Asvimiyencekele hi la mipfumelaka ha kone.”
30 Kutani matihlo yavu mavona. Kutani Yesu avabasopisa svinene, aku: “Tivonelani, lesvaku kungavi na mhunu lwasvitivaka.”
31 Kambe loko vahumele handle, vakhanela hi yene amugangeni wolowo hinkwawu.
32 Ankama vasukaka, vomubuyisela mhunu wa kuka angakhaneli lweyi aa ni demona;
33 kutani loko demona dzrihlongoliwile, mhunu lweyi aangakhaneli asungula kukhanela. Kolanu, svitsrhungu svihlamala, sviku: “Sva kufana ni lesvi asvingivoniwa ni siku ni dzrin’we atikweni dzra Yisrayele.”
34 Kambe vafarisi avaku: “Ahlongola mademona hi ntamu wa hosi ya mademona.”
35 Kutani Yesu afambafamba amadoropeni hinkwawu ni le svidoropaneni hinkwasvu, adondzrisa amasinagogeni yavu ni kuzrezra madzrungula lamanene ya Mfumu, ni kudaha mavabzi hinkwawu ni svivavu hinkwasvu.
36 Kutani loko avona svitsrhungu, asvitwela wusiwana, hikusa asviwondzrile hi le moyeni, svifamba svipepetseka kufana ni tihamba letipfumalaka mubzisi.
37 Kutani aku ka vadondzrisiwa vake: “Ina, ntsrhovelo i wukulu, kambe vatizri va kone ahi vangani.
38 Ke, kombelani N’winyi wa ntsrhovelo lesvaku azrumela vatizri antsrhovelweni wake.”