-
Juda 1
1 Mine Juda, ninga nandzra wa Yesu Kriste ni makwa Jakobe, nitsralela lavavitaniwiki, lavazrandzriwaka hi Xikwembu, lexinga Tatana, ni lavahlayiseliwiki Yesu Kriste, niku:
2 Niminavelela kuva timpsalu, kuzrula ni lizrandzru svimitalela.
3 Vazrandzriwa, nisvijule hi mbilu hinkwayu kumitsralela mayelanu ni kuhuluxiwa loku n’wine na mine hinga naku, kambe nisvivone na svili sva xihatla kumitsralela lesvaku nimitsratsriya akuva milwa hi ntamu svinene, milwela lipfumelo ledzri vhanu va Xikwembu lava kuxwenga vanganyikiwa dzrone kan’we ntsena.
4 Hikuva ku ni vhanu va kukazri lavanganhingena hi kunyanimela, lava kusukela ka khale kutsraliwiki lesvaku vatatsremeliwa xikhatiso lexi, vanga vhanu lavangachavikiki Xikwembu, lavatiyimelelaka hi wumbilu bza Xikwembu xezru akuva vayenca sva kunyenyentsa, vatlhela valandzrula N’winyi wezru ni Hosi yezru leyinga yin’we ntsena, Yesu Kriste.
5 Kutani, nhambilesvi miyitivisisaka ha hombe minchumu leyi hinkwayu, ninavela kumidzrimuxa lesvaku Jehovha antsrhunxe tiko dzrake atikweni dzra Gibita, kambe agame ahelisa lava avange na lipfumelo.
6 Ni tintsrumi letikalaka tingahlayisanga xiyimu xa tone xa kusungula, kambe tifulazreliki kaya dzra tone, atibeke amunyameni wa kuchavisa na titsrimbiwe hi machini hi la kungahelikiki, tiyimela kuyavanyisiwa hi siku ledzrikulu.
7 Hi ndlela leyifanaka, vhanu va le Sodoma na Gomora ni madoropa ya le kusuhi, vahanye hi wugangu lebzitsremaka nhlana vatlhela valandzrelela kunavela ka nyama lokuhambanaka ni ka ntumbuluku. Kubiwa kwavu hi ndzrilo lowungahelikiki svitizrela kuva xikombiso.
8 Kambe, hi ndlela leyifanaka, vhanu lava na vone vale matlavini, va ni mahanyela lamangabasangakiki, vayeyisa wuhosi vatlhela vazruka vhanu lavakhensekaka.
9 Kambe, nhambi Mikayele, ntsrumi leyikulu, ankama lowu angaholova na Diyavulosi na valwetana hi ntsrumbu wa Moxe, angavanga nawu nhlana wa kumuyavanyisa hi mazritu ya kuzruketela, kambe ate: “Jehovha aakukhwavele!”
10 Nhambitanu, vhanu lava vakhanela kubiha hi minchumu hinkwayu leyi hi ntshimantshima vangayitwisisikiki ni kuyitwisisa; nakone minchumu hinkwayu leyi vayitwisisaka hi ntumbuluku, kufana ni svihazri lesvingapimisikiki, vatihona ha yone.
11 Khombo dzra vone! Hikuva vafambe hi ndlela ya Kayini, nakone vatsrutsrume vanhingena xihoxweni xa Balama hi kufela muholo, vava vahelisiwa hi moya wa wupfukeli lowu Kora aali nawu.
12 Vhanu lava i mintlhamu leyidlayisanaka aminkhubzini yenu ya kukombana lizrandzru ankama lowu vatikholisaka na n’wine hi svakuda; i vabzisi lavatidisaka na ni kudana vangadani; i matlavi lamangeke na mati lamapengwisiwaka hi moya; i minsinya leyingeke na mihandzru loko kutlhasa nkama wa yone, leyifiki kabidzri yitlhela yitsruvuliwa;
13 i mavimbi ya lwandle laya kulebza, lamatlhutlhaka khuvi mahumexa sviyenco sva wone sva kudanisa; i tinyeleti letitsrendzrelekaka, letibekiseliwiki kutsrhama na timphumile hi munyama hi la kungahelikiki.
14 nhambi Enoki, lweyi aali mhunu wa wu-7 kusukela ka Adamu, na yene aprofetile ha vone, loko aku: “Hi lweyi Jehovha atlhasiki ni masocha yake ya kuxwenga ya ntsrandzravahlayi,
15 akuva atsrhama ayavanyisa hinkwavu ni kutrsemela xikhatiso hinkwavu lavangachavikiki Xikwembu hi mhaka ya sviyenco hinkwasvu sva kubiha lesvi vaxiyeyisiki ha svone, ni hi mhaka ya minchumu hinkwayu ya kuchavisa leyi vadohi lavangachavikiki Xikwembu vaxizrukiki ha yone.
16 Vhanu lava vahanya hi kungurangura ni kusola lesvi vanyikiwiki svone, na valandzrelela kunavela kwavu; funtsrhi minomu yavu yikhanela mazritu ya kutikukumuxa, nakone vadzrumisa vhanu na svingahumi mbilwini ntsena akuva vakuma bindzru dzra kukazri.
17 Kambe n’wine, vazrandzriwa, dzrimukani mazritu lamahlayiwiki kusungula hi vapostola va Hosi yezru Yesu Kriste,
18 lawa avamibzela wone, vaku: “Ankameni wa wugamu kutava ni vhanu va svipoyilo , lavahanyelaka kunyonxisa kunavela kwavu ka kuyenca minchumu ya manyala.”
19 Lava hi vone vahambanisaka vhanu; vahanyela kunyonxisa nyama ntsena nakone ava na mhaka ni minchumu ya moya.
20 Kambe n’wine, vazrandzriwa, tiyakani alipfumelweni dzrenu ledzra kuxwengisisa, na mikhongota hansi ka moya wa kuxwenga;
21 tihlayisani alizrandzrwini dzra Xikwembu, na miyimela timpsalu ta Hosi yezru Yesu Kriste, akuva mikuma wutomi lebzingahelikiki.
22 Nakone, vatsretsrelelani lavanga ni kuganagana;
23 mivahuluxa hi kuvawutla andzrilweni. Nakone, tsretsrelelani vambeni na mitivonela, na mivenga nhambi xiyambalu lexinchimisiwiki hi mintizro ya nyama.
24 Kutani Lweyi anga ni ntamu wa kumipfuna kutsrhama na mitiyile ni kumibeka amahlweni ka wuphatimi bzake na minge na xa kusoleka funtsrhi na minyonxe svinene,
25 lwanga Xikwembu xa xin’we, Muhuluxi wezru ha Yesu Kriste, Hosi yezru, aadzrumisiwe hi kola ka wuphatimi, wukulukumba, ntamu ni wuhosi bzake kusukela na minkama hinkwayu yingesiva kone, kutatlhasa svosvi, ni hi la kungahelikiki! Amen.