BRN

1   Ahi vanyingi ka n’wine vafanelaka kuva vadondzrisi, vamakwezru, hi kutiva lesvaku hitakuma kuyavanyisiwa lokutlulaka ka vambeni.

2   Hikusa hinkwezru hahoxa minkama yinyingi. Loko mhunu wa kukazri angahoxi hi zritu, ahetisekile, nakone akota kufuma mizri wake hinkwawu.

3   Loko hibekela matomu aminon’wini ya mahanxi akuva himayenca mahiyingiseta, hikota kufambisa ni mizri wa wone hinkwawu.

4   Lavisani ni tingalawa letifambaka alwandle: Nhambilesvi tinga tikulu svinene ni lesvi titlhelaka tifambisiwa hi mimoya ya ntamu, tikongomisiwa hi xihindzrulo xitsrongo svinene kwini na kwini lomu mhunu lwafambisaka ajulaka kuya kone.

5   Xisvosvo, na dzrone lidzrimi i xizro xa xitsrongo xa mizri, kambe xitikhuza svinene. Vonani lesvaku svojula ndzrilo wutsrongo kutlhavika nhova ya yikulu svinene!

6   Lidzrimi na dzrone i ndzrilo; i tiko dzra kutala hi sva kubiha. Lidzrimi dzrinyikiwe mbangu wa dzrone makazri ka svizro sva mizri wezru. Dzrinchimisa mizri hinkwawu dzritlhela dzritlhavika wutomi hinkwabzu bza mhunu, nakone dzritlhavikiwa hi ndzrilo wa Xikhele xa Kuhelisiwa.

7   Hikusa mixaka hinkwayu ya svihazri sva nhova, angava tinyanyana kumbe svikokovi, kumbe svihazri sva lwandle, svingasusiwa kulebza ka svone svifuyiwa, nakone mhunu asvikotile kusvisusa kulebza ka svone asvifuya.

8   Kambe aku na mhunu lwangakotaka kususa kulebza ka lidzrimi adzrifuya. Dzralutla nakone dzravavisana; dzritale hi wuhlungu bza kudlayana.

9   Ha dzrone hi dzrumisa Jehovha, Tatana, hitlhela hizruka ha dzrone vhanu, lavatumbuluxiwiki hi xifaniso xa Xikwembu.

10   Ka nomu wolowu wa wun’we kuhuma nkateko ni xizruku. Vamakwezru, ahi svinene kuva sviyencekisa xilesvo.

11   Xana xihlovo xahumexa mati ya kunandzrika ni mati ya kubava hi mbangu wa wun’we?

12   Vamakwezru, nkuwa wungapsala mahlwazri, kumbe mvhinya wungapsala makuwa? Nhambi mati ya munyu mangehumexi mati ya kunandzrika.

13   I mani lwatlhazrihiki ni lwakotaka kutwisisa timhaka amakazri kwenu? Aakombise mintizro yake hi hanyela dzrake ledzrinene, hi kutitsrongahata lokuhumaka awutlhazrini.

14   Kambe loko mi ni xikwele xa mona ni moya wa kukokelana atimbilwini tenu, mingatikhuzi mitlhela mihembela ntiyiso.

15   Lebzo ahi bzone wutlhazri lebzixikaka hi le henhla. I wutlhazri bza misava, bza wuhazri ni bza wudemona.

16   Hikusa kwini na kwini lomu kunga ni matsrhoho ni kukokelana, kupfuka mpfilumpfilu ni minchumu hinkwayu leya kubiha.

17   Kambe wutlhazri bza le henhla xa kusungula bzibasile, nakone funtsrhi bzizrandzra kuzrula, bzinabzalile, bzayingiseta loko bzizrumiwa nchumu, bzitale timpsalu ni mihandzru leyinene, abzi na xihlawuhlawu, abzi na wukanganyisi.

18   Nakone, handzru wa wululami wubzaliwa hi lavayakaka kuzrula na vali ndzreni ka kuzrula.