BRN

1   Nitiyisile nili ka n’wine: Lweyi anganhingenikiki hi nyangwa axib’ayeni xa tihamba, kambe atlulaka hi kun’wanyana, i muyivi ni muphangi.

2   Kambe lweyi anhingenaka hi nyangwa i mubzisi wa tihamba.

3   Muzrindzri wa nyangwa awamupfulela, kutani tihamba tiyingiseta zritu dzrake. Avitana tihamba take hi vito ava atihumexa handle.

4   Loko ahumexe hinkwatu ta ka kwake, afamba amahlweni ka tone, kutani tihamba timulandzra, hikusa tadzritiva zritu dzrake.

5   Kambe tingaka tingalandzri mhunu wa kukala tingamutivi kambe titamutsrutsruma, hikusa atidzritivi zritu dzra vhanu va kukala tingavatvi.”

6   Yesu avahambele xifananiso, kambe avasvitwisisanga lesvi aakhanela hi svone na vone.

7   Kutani Yesu atlhela aku ka yene: “Nitiyisile nili ka n’wine: Hi mine nyangwa ya tihamba.

8   Hinkwavu lavangabuya amahlweni kwanga i vayivi ni vaphangi; kambe tihamba ativayingisetanga.

9   Hi mine nyangwa; lweyi anhingenaka ha mine atahuluxiwa, nakone atanhingena atlhela ahuma ayakuma svakuda.

10   Muyivi angateli xin’wana loko kungali kuyiva, kudlaya ni kuhelisa ntsena. Mine nitele kuva tikuma wutomi, ni lesvaku tikuma wutomi bza bzinyingi ngopfu svinene.

11   Hi mine mubzisi lwenene; mubzisi lwenene apfumela kufela tihamba.

12   Kambe mhunu wa kutizrela mali, lweyi angeke mubzisi ni lweyi tihamba tingeke take, loko avona mhisi na yita, otsrhika tihamba wusvatone atsrutsruma, kutani mhisi yitikhoma, yitihangalasela,

13   hikusa otizrela mali ntsena, xilesvo anga na mhaka ni tihamba.

14   Hi mine mubzisi lwenene. Natitiva tihamba ta ka kwanga; na tone ta ka kwanga tanitiva.

15   Svanga hesvi Tatana anitivaka, na mine namutiva Tatana; kutani nipfumela kufela tihamba.

16   “Nakone ni ni tihamba tin’wana, letingeke ta xib’aya lexi. Na tone nifanela kutitisa; nakone titayingiseta zritu dzranga, kutani kuta va ni ntlhambi wun’we ni mubzisi mun’we.

17   Hi svosvo Tatana anizrandzraka ha svone, hikusa ninyikela wutomi bzanga, akuva nitatlhela nibzikuma.

18   Aku na mhunu lweyi anitekelaka bzone, kambe hi mine nokobzinyikela hi kusvizrandzra. Ni ni ntamu wa kubzinyikela, nakone ni ni ntamu wa kutlhela nibzikuma. Xileleto lexi ninyikiwe hi Tatana wanga.”

19   Kutlhele kuva ni kuyavana amakazri ka vajuda hi mhaka ya mazritu lawa.

20   Kutani vanyingi va vone avaku: “A ni demona nakone awahlanya. Mimuyingisetela yini?”

21   Van’wana avaku: “Lawa ahi mazritu ya mhunu lwanga ni demona. Xana demona dzringasvikota kupfula matihlo ya lavangavonikiki?”

22   Ankameni lowo kuva ni Nkhuvu wa Kukhanguliwa ka Tempele le Jerusalema. Aali wuxika,

23   kutani Yesu aafambafamba atempeleni, antsrhutini wa kufuleliwa wa Salomoni.

24   Kutani vajuda vayima vamusiya xikazri, vaku ka yene: “Utagama siku muni kuhitlhakameta timbilu? Loko uli ye Kriste, hibzele svitwala.”

25   Yesu avahlamula, aku: “Nimibzelile, kambe n’wine amipfumeli. Mintizro leyi niyiyencaka hi vito dzra Tatana wanga hi yone yinifakazelaka.

26   Kambe n’wine amikholwi, hikusa ami va tone tihamba tanga.

27   Tihamba tanga tiyingiseta zritu dzranga; na mine natitiva, funtsrhi tanilandzra.

28   Nitinyika wutomi lebzingahelikiki, xilesvo tingaka tingahelisiwi ni siku ni dzrin’we, nakone anga kone lweyi atakatiwutla avokweni dzranga.

29   Lesvi Tatana wanga anganinyika svone i svikulu kutlula hinkwasvu, kutani anga kone lweyi angatiwutlaka avokweni dzra Tatana.

30   Mine na Tatana hi xin’we.”

31   Vajuda vatlhela vazrola mazribze akuva vamukhandla ha wone.

32   Yesu avayangula, aku: “Nimikombe mintizro yinyingi leyinene leyihumaka ka Tatana. Hi wini wa mintizro leyi lowu mijulaka kunidlaya hi mazribze hi mhaka ya wone kee?”

33   Vajuda vamuhlamula, vaku: “Ahijuli kukudlaya hi mazribze hi mhaka ya ntizro lowunene, kambe hijula kukudlaya hilesvi usandzraka; hikuva wene utiyenca Xikwembu, nakuve u mhunu.”

34   Yesu avahlamula, aku: “Xana abukwini dzrenu dzra Nawu akutsraliwanga lesvaku: ‘Nite: “N’wine mi svikwembu”?’

35   Loko Xikwembu xite lava zritu dzra xone adzrikongome vone i “svikwembu” (nakuve ndzrimana leyo yingetimiwi),

36   xana mibzela mine lweyi Tatana anixwengisiki ava anizrumela amisaveni, miku: ‘Wasandzra’, hilesvi nitiki: ‘Ni N’wana wa Xikwembu’?!

37   Loko ningayenci mintizro ya Tatana wanga, minganikholwi.

38   Kambe loko niyiyenca, nhambiloko minganikholwi, kholwani mintizro, akuva mitasvitiva mitlhela misvitwisisa lesvaku Tatana a xikan’we na mine, funtsrhi na mine ni xikan’we na Tatana.”

39   Kutani vatlhela vajula kumukhoma, kambe aphonyoka amavokweni yavu.

40   Atlhela asuka aya halahaya ka Jordani, ambangwini lowu Johani aababatisa kone kusungula, atsrhama kone.

41   Kutani vanyingi avamuyela na vaku: “Svone, Johani angahambanga singita ni dzra dzrin’we, kambe hinkwasvu lesvi Johani asvihlayiki hi mhunu lweyi i ntiyiso.”

42   Kutani vanyingi vapfumela ka yene kone.