BRN

1   Kuteloko kahasale 6 wa masiku akuva kusungula Paxkwa, Yesu atlhasa Betanya, lomu aku na Lazaro, lweyi angamupfuxa akufeni.

2   Kutani vahambela Yesu xilalelo kone; Marta aali kazri avatizrela, kambe Lazaro aali mun’we wa lava avada naye.

3   Kutani Mariya ateka ngwama ya mafuzra ya kunun’hwela ni ya kudula svinene, ya kuhambiwa hi xiluva xa kunandzrika xa le Indya xa kukala xingapatsriwanga na nchumu, atota minenge ya Yesu, ava asula minkondzro yake hi misisi yake. Kutani yindlu hinkwayu yikumpfim hi moya wa mafuzra lawo ya kunun’hwela.

4   Kambe Juda Iskariyota, mun’we wa vadondzrisiwa vake, lweyi aajula kumuxavisa, aku:

5   “Hayini mafuzra lawa ya kunun’hwela mangaxavisiwanga hi 300 wa madenari, mali ya kone yiphakeliwa svisiwana?”

6   Kambe aangahlayi lesvo hilesvi aova ni mhaka ni svisiwana, kambe hilesvi aali muyivi ni lesvi aatamela nkwama wa mali, nakone aahamba ayiva mali leyi ayipetiwa kone.

7   Kutani Yesu aku: “Mutsrhikani hi kuzrula, akuva alulamisela ntizro wa siku dzra kulahliwa kwanga.

8   Hikuva n’wine minkama hinkwayu mi ni svisiwana, kambe ahi minkama hinkwayu mitakava na mine.”

9   Hi nkama wolowo, xitsrhungu lexikulu xa vajuda xiyingela lesvaku aali kone; kutani xiya, na kungali ntsena hi mhaka ya Yesu kambe ni hi kujula kuvona Lazaro, lweyi angamupfuxa akufeni.

10   Kambe vaprista lavakulu vahamba xikungu xa kudlaya na ye Lazaro,

11   hikusa hi mhaka yake, vanyingi va vajuda avasuka vavasiya, vayapfumela ka Yesu.

12   Mundzruku ka kone, xitsrhungu xa vhanu lava avate ankhubzini xiyingela lesvaku Yesu aabuya Jerusalema.

13   Kutani vhanu lavo vateka tinkambu ta minkindzru vahuma vamutlhangaveta, na vabandlukana, vaku: “Huluxa, hakukombela! Akukhensiwe lweyi ataka hi vito dzra Jehovha, Hosi ya Yisrayele!”

14   Kuteloko Yesu akume ximbongolwana, atsrhama ahenhla ka xone, svanga hesvi kutsraliwiki lesvi:

15   “Ungachavi, n’wana wa xisati wa Ziyoni. Lavisa! Hosi yaku yabuya, na yitsrhame ka ximbongolwana.”

16   Akusunguleni, vadondzrisiwa vake avasvitwisisanga lesvi, kambe loko Yesu aphatimisiwile, vadzrimuke lesvaku lesvi asvitsraliwile mayelanu na yene ni lesvaku vamuyencele minchumu leyo.

17   Kutani xitsrhungu lexi axili naye loko avitana Lazaro lesvaku ahuma asizreni ava amupfuxa akufeni ximufakazela.

18   Hi svosvo na svone sviyenciki vanyingi vayamutlhangaveta, hikusa vayingele lesvaku ayence singita ledzri.

19   Kutani vafarisi vabzelana, vaku: “Masvivona lesvaku amiyi mbangu. Lavisani! Misava hinkwayu yamulandzra.”

20   Kutani aku ni vagrika vangali vangani amakazri ka lava avatele kutatagandzrela ankhubzini.

21   Kutani vatsrhindzrekelela Filipi, lweyi aahuma Betsayda wa le Galileya, vamukombela, vaku: “Hosi, hijula kuvona Yesu.”

22   Filipi ayabzela Andreye. Andreye na Filipi vayabzela Yesu.

23   Kambe Yesu avahlamula, aku: “Nkama wutlhasile wa kuva N’wana wa Mhunu aphatimisiwa.

24   Nitiyisile nili ka n’wine: Loko mbewu ya tirigu yingaweli amisaveni yifa, yitsrhama na yili wusvayone; kambe loko yifa, yipsala mihandzru leyinyingi.

25   Lweyi azrandzraka wutomi bzake atabzilahla, kambe lweyi avengaka wutomi amisaveni leyi atabzihlayisa bzindzruluka wutomi lebzingahelikiki.

26   Loko mhunu ajula kunitizrela, aanilandzre, nakone lomu ninga kone, nandzra wanga atava kone na yene. Loko mhunu ajula kunitizrela, Tatana atamunyika lisima.

27   Svosvi hika dzranga dzrofoo! Kutani nitahlaya yini? Tatana, nihuluxe ka nkama lowu. Nhambitanu, nitlhase ka nkama lowu hi mhaka ya svosvo.

28   Tatana, phatimisa vito dzraku.” Kutani kuhumelela zritu dzripfa tilweni, dzriku: “Nidzriphatimisile nakone nahatatlhela nidzriphatimisa!”

29   Kutani xitsrhungu lexi axiyimile xiva xisviyingela axiku: ‘Kudzrume tilo’. Van’wana avaku: “I ntsrumi yikhaneliki naye.”

30   Yesu ayangula, aku: “Zritu ledzri adzrihumelelanga hi mhaka yanga, kambe hi mhaka yenu.

31   Svosvi i nkama wa kuyavanyisiwa ka misava leyi; svosvi mufumi wa misava leyi atacukumetiwa handle.

32   Kambe mine, loko nitatlakuxiwa amisaveni, nitatikokela mixaka hinkwayu ya vhanu.”

33   Kutani lesvi aasvihlayela kukomba mafela lawa aatafa ha wone.

34   Kutani xitsrhungu ximuhlamula, xiku: “Hine hiyingele abukwini dzra Nawu lesvaku Kriste atsrhama hi la kungahelikiki. Uhlayisa kuyini lesvaku N’wana wa Mhunu afanela kutlakuxiwa? I mani N’wana lweyi wa Mhunu?”

35   Kutani Yesu aku ka vone: “Livaningo dzrahatava konenyana na n’wine. Fambani na mahali ni livaningo dzra kone, akuva munyama wungamikumi; lweyi afambaka amunyameni angakutivi lomu ayaka kone.

36   Na mahali ni livaningo ledzri, pfumelani ka livaningo dzra kone, lesvaku mitava vana va livaningo.” Ankama lowu Yesu ahlayiki lesvo, agame asuka ayatumbela kule navu.

37   Kambe, nhambilesvi ahambiki masingita ya kutala svinene amahlweni kwavu, avangapfumeli ka yene,

38   akuva kuhetiseka zritu dzra muprofeta Ezaya, lwangaku: “Jehovha, i mani lwapfumeliki ka zritu dzrezru? Ni voko dzra Jehovha dzripfuleteliwe ka mani?”

39   Hi svosvo svingayenca vangasvikoti kupfumela hikusa Ezaya atlhela aku:

40   “Avadlaye matihlo atlhela anonon’hwisa timbilu tavu, lesvaku vangavoni hi matihlo yavu ni kuva vangatwisisi hi timbilu tavu, vava vandzruluka kutani mine nivahanyisa.”

41   Ezaya ahlaye lesvo hikusa avone kuphatima kwake, ava akhanela ha yene.

42   Nhambitanu, vanyingi va lava avali vazrangeli vapfumelile ka yene, kambe avangasvihlayi alivaleni hi kuchava vafarisi, akuva vangahlongoliwi asinagogeni;

43   hikuva avazrandzra kudzrumisiwa hi vhanu kutlula kudzrumisiwa hi Xikwembu.

44   Kutani Yesu ahuwelela, aku: “Lweyi apfumelaka ka mine angapfumeli ka mine ntsena kambe apfumela ni le ka Lweyi anizrumiki;

45   ni lweyi anivonaka avona ni Lweyi anizrumiki.

46   Nitile svanga livaningo amisaveni, akuva mani na mani lwapfumelaka ka mine angatsrhami amunyameni.

47   Kambe loko mhunu ayingela mazritu yanga agama angamalandzri, animuyavanyisi; hikuva anitelanga kuyavanyisa misava, kambe nitele kutahuluxa misava.

48   Lweyi angeke na mhaka na mine atlhela angayamukeli mazritu yanga a ni lweyi amuyavanyisaka. Zritu ledzri nidzrikhaneliki hi dzrone dzritakamuyavanyisa hi siku dzra wugamu.

49   Hikuva anikhanelanga sva kusukela kwanga, kambe Tatana Lweyi anizrumiki hi yene anileletiki lesvi nifaneliki kusvihlaya ni kusvikhanela.

50   Nakone nasvitiva lesvaku xileleto xake i wutomi lebzingahelikiki. Kutani lesvi nisvikhanelaka, nisvikhanela hi kulandzra lesvi Tatana anibzeliki svone.”