BRN

1   “Mingatsrhiki timbilu tenu tikazrateka. Pfumelani ka Xikwembu; mipfumela ni le ka mine.

2   Andlwini ya Tatana wanga ku ni mimbangu ya yinyingi ya kutsrhama ka yone. Kutani loko asvinge tanu, inha nimibzelile, hikusa nafamba niyamibekisela mbangu.

3   Nakone loko nitava nifambile niyamibekisela mbangu, nitabuya nimizruzrela akaya kwanga, akuva lomu ninga kone na n’wine mitava kone.

4   Nakone n’wine mayitiva ndlela ya kuya lomu niyaka kone.”

5   Tomasi aku ka yene: “Hosi, ahikutivi lomu uyaka kone. Hingayitivisa kuyini ndlela ya kone?”

6   Yesu aku ka yene: “Hi mine ndlela ni ntiyiso, ni wutomi. Anga kone lweyi ataka ka Tatana loko kungali ha mine.

7   Loko amenitiva, inha mimutivile na yene Tatana wanga; kusukela ka svosvi mamutiva nakone mimuvonile.”

8   Filipi aku ka yene: “Hosi, hikombe Tatana, kutani ka hine svitava svili svinyingi lesvo.”

9   Yesu aku ka yene: “Nitsrhame nkama wunyingi na n’wine, kambe awusinitiva, Filipi? Lweyi anivoniki avone na Tatana. Ungahlayisa kuyini, uku: ‘Hikombe Tatana’?

10   Awukholwi lesvaku mine ni xikan’we na Tatana na ye Tatana a xikan’we na mine kee? Mazritu lawa nimibzelaka wone anikhaneli na masukela kwanga, kambe Tatana lweyi atsrhamaka xikan’we na mine ayenca mintizro yake.

11   Kholwani lesvaku mine ni xikan’we na Tatana na ye Tatana a xikan’we na mine; loko svinge tanu, kholwani hi mhaka ya mintizro ntsena.

12   Nitiyisile nili ka n’wine: Lweyi apfumelaka ka mine na yene atayenca mintizro leyi niyiyencaka; nakone atayenca ya kutlula ni leyi, hikusa niya ka Tatana.

13   Nakone, xin’wana ni xin’wana lexi mitakaxikombela hi vito dzranga, nitaxiyenca, akuva Tatana adzrumisiwa xikan’we ni N’wana.

14   Loko mikombela xa kukazri hi vito dzranga, nitaxiyenca.

15   “Loko minizrandzra, mitalandzra svileleto svanga.

16   Nakone nitakombela Tatana, kutani ataminyika mupfuni mun’wana akuva ava na n’wine hi la kungahelikiki,

17   kunga moya wa ntiyiso, lowu misava yingeke na kuwuyamukela, hikusa ayiwuvoni nakone ayiwutivi. N’wine mawutiva, hikusa wutsrhama kusuhi na n’wine nakone wu na n’wine.

18   Ningetimisiya awusiwaneni. Nitatlhela nimibuyela.

19   Kungali khale misava yingehetinivona, kambe n’wine mitanivona, hikusa nahanya, na n’wine mitahanya.

20   Asikwini dzra kone mitasvitiva lesvaku mine ni xikan’we ni Tatana wanga, na n’wine mi xikan’we na mine, na mine ni xikan’we na n’wine.

21   Lweyi anga ni svileleto svanga ava asvilandzra awanizrandzra. Kutani lweyi anizrandzraka atazrandzriwa hi Tatana wanga, na mine nitamuzrandzra niva nitikombekisa ka yene.”

22   Juda, na kungali Iskariyota, aku ka yene: “Hosi, keyenceka yini lakakuva ujula kutikombekisa ka hine, kambe kungali ka misava?”

23   Yesu amuhlamula, aku: “Loko mhunu anizrandzra, atalandzra zritu dzranga, kutani Tatana wanga atamuzrandzra, kutani hitamubuyela hitatatsrhama na yene.

24   Lweyi anganizrandzrikiki angalandzri mazritu yanga. Zritu ledzri n’wine midzriyingelaka ahi dzranga, kambe i dzra Tatana lweyi anizrumiki.

25   “Nimibzele timhaka leti na nahatsrhama na n’wine.

26   Kambe mupfuni, kunga moya wa kuxwenga lowu Tatana atakawuzrumela hi vito dzranga, atamidondzrisa hinkwasvu atlhela amidzrimuxa hinkwasvu lesvi nimidondzrisiki svone.

27   Nimisiyela kuzrula. Niminyika kuzrula kwanga. Animinyiki kone hi ndlela leyi misava yikunyikaka ha yone. Mingatsrhiki timbilu tenu tikazrateka kumbe tiwoma hi kuchava.

28   Misviyingelile loko nimibzela, niku: ‘Nafamba, nakone nitatlhela nimibuyela.’ Loko aminizrandzra, amitanyonxa hi lesvi niyaka ka Tatana, hikuva Tatana i nkulu kutlula mine.

29   Kutani svosvi nimibzelile na svingesiyenceka, akuva mitakholwa loko sviyenceka.

30   Ningehetikhanela na n’wine sva kutala, hikuva mufumi wa misava awata, kambe anga na ntamu ahenhla kwanga.

31   Kambe, akuva misava yitasvitiva lesvaku namuzrandzra Tatana, niyenca svanga hesvi Tatana anileletiki ha kone. Sekelekani hisuka lani.