-
Johani 17
1 Yesu ahlaye mazritu lawo, agama atlakuxa nhloko alangusa atilweni, aku: “Tatana, wutlhasile nkama. Phatimisa N’wanaku akuva na ye N’wanaku akuphatimisa,
2 svanga hesvi umunyikiki ntamu ahenhla ka vhanu hinkwavu, lesvaku akota kunyika wutomi lebzingahelikiki hinkwavu lava umunyikiki vone.
3 Wutomi lebzingahelikiki bzijula kuva vakutiva wene, unga Xikwembu xin’we xa ntiyiso, ni lweyi umuzrumiki, Yesu Kriste.
4 Nikudzrumisile amisaveni, niva niheta ntizro lowu uninyikiki wone akuva niwuyenca.
5 Kutani svosvi Tatana, niphatimise hi kuphatima kwaku loku anili naku na misava yingesiva kone.
6 “Vhanu lava uninyikiki vone la misaveni, nivakhanyiselile vito dzraku. Avali vaku, kambe uninyike vone, kutani valandzre zritu dzraku.
7 Svosvi vasvitiva lesvaku hinkwasvu lesvi uninyikiki svone i svaku;
8 hikusa nivanyike mazritu lawa uninyikiki wone, kutani vone vamayamukelile nakone vasvitwisisile hakunene lesvaku nisukele kwaku, vava vakholwa lesvaku hi wene unizrumiki.
9 Navakombelela; anikombeleli misava, kambe nikombelela lava uninyikiki vone, hikusa i vaku.
10 Funtsrhi hinkwasvu lesvinga svanga i svaku ni lesvinga svaku i svanga, nakone niphatimisiwile amakazri kwavu.
11 “Mine anahali misaveni, kambe vone vale misaveni, nakuve mine nibuya kwaku. Tatana wa Kuxwenga, vazrindzre hi nkonta ya vito dzraku, ledzri uninyikiki dzrone akuva vone vava xin’we svanga hesvi mine na wene hinga xin’we.
12 Loko nahali na vone, anihamba nivazrindzra hi nkonta ya vito dzraku, ledzri uninyikiki dzrone; nakone nivasizrelelile, funtsrhi akulovanga ni mun’we wa vone, handle ka n’wana wa kulova, akuva kutahetiseka tsralwa.
13 Kambe svosvi nibuya kwaku, nakone nihlaya mazritu lawa la misaveni, akuva vatala hi kunyonxa kwanga.
14 Nivanyike zritu dzraku, kambe misava yivavengile, hikusa ahi va misava, svanga hesvi na mine ningeke wa misava.
15 “Anikombeli lesvaku uvasusa amisaveni, kambe lesvaku uvazrindzra ka Mubihi.
16 Vone ahi va misava, svanga hesvi na mine ningeke wa misava.
17 Vaxwengise hi ntiyiso; zritu dzraku i ntiyiso.
18 Svanga hesvi unizrumiki amisaveni, na mine nivazrumile amisaveni.
19 Kutani natixwengisa hi kola kwavu, akuva na vone vaxwengisiwa hi ntiyiso.
20 “Anikombeleli lava ntsena, kambe nikombelela ni lavatakapfumela ka mine hi zritu dzravu,
21 akuva hinkwavu vatava xin’we, svanga hesvi wene, Tatana, unga xin’we na mine, na mine ninga xin’we na wene, lesvaku na vone vatava xin’we na hine, akuva misava yitakholwa lesvaku hi wene unizrumiki.
22 Nivanyike kuphatima loku uninyikiki kone, lesvaku vone vatava xin’we svanga hesvi na hine hinga xin’we;
23 mine niva xikan’we na vone, na wene uva xikan’we na mine, lesvaku vatava xin’we hi kuhetiseka, akuva misava yitasvitiva lesvaku hi wene unizrumiki ni lesvaku uvazrandzrile svanga hesvi unizrandzriki.
24 Tatana, ninavela lesvaku lava uninyikiki vone vava na mine lomu ninga kone, lesvaku vatakota kuvona kuphatima kwanga loku uninyikiki kone, hikusa unizrandzrile na misava yingesisunguliwa.
25 Tatana wa Kululama, nhambilesvi misava leyi yikalaka yingakutivanga, mine nikutivile, ni volava vasvitivile lesvaku hi wene unizrumiki.
26 Nivativisile vito dzraku nakone nitadzritivisa, akuva lizrandzru ledzri unizrandzriki hi dzrone dzritava na vone na mine niva na vone.”