BRN

1   Loko ahete kuhlaya mazritu lawa, Yesu ahuma ni vadondzrisiwa vake vatsremakanya xinambzana xa Kidroni, lomu aku ni xizramba, atlhasa anhingena kone ni vadondzrisiwa vake.

2   Kutani Juda, lweyi aajula kumudlayisa, na yene aawutiva mbangu lowo, hikusa Yesu aatalisa kutlhangana kone ni vadondzrisiwa vake.

3   Kutani Juda ateka ntlawa wa masocha ni valaviseli lavatsrongo va vaprista lavakulu ni va vafarisi, vabuya na vatamele svisa ni mimotsre ni matlhazri.

4   Kutani Yesu, hi kutiva hinkwasvu lesvi asvijula kumuyencekela, ahumelela amahlweni, aku ka vone: “Mijula mani?”

5   Vamuhlamula, vaku: “Yesu wa le Nazareta.” Yesu aku ka vone: “Hi mine lweyi.” Kutani Juda, lweyi angamunyikela, na yene aayime navu.

6   Kutani, loko Yesu aku ka vone: “Hi mine lweyi”, vatlhelela ntsrhaku vawa hansi.

7   Kutani atlhela avavutisa, aku: “Mijula mani?” Vaku ka yene: “Yesu wa le Nazareta.”

8   Yesu ahlamula, aku: “Nimibzelile niku hi mine. Kutani loko mijula mine, tsrhikani lava vafamba.”

9   Lesvo sviyenceke akuva kuhetiseka lesvi angasvihlaya, aku: “Ka lava uninyikiki vone, anga kone ni mun’we wa vone anganilahlekela.”

10   Kutani Simoni Petrosi, lweyi aa ni lipanga, adzrihlomula aba nandzra wa muprista lwenkulu, amutsrema ndleve ya xinene. Kutani vito dzra nandzra wa kone aali Malkusi.

11   Kutani Yesu aku ka Petrosi: “Beka lipanga ankotlotweni wa dzrone. Xana anifanelanga kunwa xinwelo lexi Tatana aninyikiki xone?”

12   Kutani masocha ni muzrangeli wa masocha ni valaviseli lavatsrongo va vajuda vakhoma Yesu vamutsrimba.

13   Vamuyisa ka Anasi kusungula, hikuva aali tatana wa nsati wa Kayafasi, lweyi aali muprista lwenkulu alembeni ledzro.

14   Kayafasi wa kone hi lweyi angalaya vajuda lesvaku avatapfuneka loko mhunu mun’we afela tiko.

15   Kutani Simoni Petrosi aalandzrelela Yesu na a ni mudondzrisiwa mun’wana. Kutani lesvi mudondzrisiwa lwemun’wana aativana ni muprista lwenkulu, na yene anhingene na Yesu amutini wa muprista lwenkulu,

16   kambe Petrosi aayime ahandle anyangweni. Kutani mudondzrisiwa lwemun’wana, lweyi aativana ni muprista lwenkulu, ahuma ayakhanela ni n’hwanyana wa xitizri lweyi aavonelela nyangwa, agama anhingenisa Petrosi.

17   Kutani n’hwanyana wa xitizri lweyi aavonelela nyangwa aku ka Petrosi: “Ahi wene mun’we wa vadondzrisiwa va lwe wanuna?” Aku: “Ahi mine.”

18   Kutani malandzra ni valaviseli lavatsrongo avayime amatlhelweni ka mbawula leyi avayitlhavikile, hikusa akutitimeta nakone avali kazri vawozra. Petrosi na yene aayime navu awozra.

19   Kutani muprista lwenkulu athethisela Yesu hi vadondzrisiwa vake ni dondzro yake.

20   Yesu amuhlamula, aku: “Nikhanele ni misava alivaleni. Minkama hinkwayu nidondzrise asinagogeni ni le tempeleni, lomu vajuda hinkwavu vatlhanganaka kone, nakone anihlayanga nchumu axihundleni.

21   Univutisela yini? Vutisa lavayingeliki lesvi ningavabzela. Hi lavayani. Vasvitiva lesvi nisvihlayiki.”

22   Kutani loko ahlaye lesvo, mun’we wa valaviseli lavatsrongo lweyi aayime atlhelweni aba wuso bza Yesu hi mpama, aku: “Hi svosvi uhlamulisaka xisvone muprista lwenkulu?”

23   Yesu amuhlamula, aku: “Loko nivulavule kubiha, hlaya lesvaku wubihi bza kone hi bzini; kambe loko nivulavule svone, unibela yini?”

24   Kutani Anasi amuzrumela na atsrimbiwile ka Kayafasi, muprista lwenkulu.

25   Ankama lowo, Simoni Petrosi aayime kolahaya awozra ndzrilo. Kutani van’we vaku ka yene: “Ahi wene mun’we wa vadondzrisiwa vake?” Ayala, aku: “Ahi mine.”

26   Mun’we wa malandzra ya muprista lwenkulu, lweyi aali xaka dzra lweyi Petrosi angamutsrema ndleve, aku: “Anikuvonanga wene na uli naye axizrambeni?”

27   Kutani Petrosi atlhela ayala. Kungali kungani nkuku wokukuluka.

28   Kutani vahumexa Yesu ka Kayafasi vamuyisa amutini wa wuhosi. Ankama lowo, kutani awuli mpundzru. Kambe vone avanhingenanga amutini wa wuhosi, akuva vangatinyamisi lesvaku vatakota kuda Paxkwa.

29   Kutani Pilatu ahuma ayakhanela na vone, aku: “Mikhala ha yini hi lwe wanuna?”

30   Vamuhlamula, vaku: “Loko lwe wanuna aangali mubihi, inha hingamutisanga kwaku.”

31   Kutani Pilatu aku ka vone: “Mutekani n’wine miyamuyavanyisa hi kulandzra nawu wenu.” Vajuda vaku ka yene: “Nawu awuhipfumeleli kudlaya mhunu.”

32   Lesvi sviyenceke akuva kuhetiseka zritu ledzri Yesu adzrihlayiki kukomba mafela lawa aatafa ha wone.

33   Kutani Pilatu atlhela anhingena amutini wa wuhosi avitana Yesu, aku ka yene: “U hosi ya vajuda wene?”

34   Yesu ahlamula, aku: “Lesvi usvihlayaka svisukela kwaku kumbe i van’wana vangakubzela ha mine?”

35   Pilatu ahlamula, aku: “Nova mujuda mine? Tiko dzrenu ni vaprista lavakulu hi vone vangakutisa kwanga. Weyenca yini?”

36   Yesu ahlamula, aku: “Mfumu wanga ahi wa misava leyi. Loko mfumu wanga awova wa misava leyi, malandzra yanga inhaka manilwelile lesvaku ninganyiketiwi ka vajuda. Kambe ke, mfumu wanga ahi wa lani.”

37   Kutani Pilatu aku ka yene: “Sviliki u hosi ka?” Yesu ahlamula, aku: “Hi wene uhlayaka hi wusvaku lesvaku ni hosi. Nipsaleliwe svosvo, nakone nibuyele svosvo la misaveni, akuva nitabekela ntiyiso wumboni. Mani na mani lwayimaka ni ntiyiso ayingiseta zritu dzranga.”

38   Pilatu aku ka yene: “Ntiyiso i yini?” Loko ahlaye lesvo, atlhela ahuma ayakhanela ni vajuda, aku ka vone: “Anikumi nandzru ka yene.

39   Kambe n’wine mi ni xihena xa kuva nimintsrhunxela mun’we hi Paxkwa. Kutani ke, masvijula kuva nimintsrhunxela Hosi ya vajuda?”

40   Kutani vatlhela vabandlukana vaku: “Lweyo ahimujuli; hijula Barabasi!” Barabasi wa kone aali xigevenga.