BRN

1   Kutani Pilatu ateka Yesu amubisa hi ntshilana.

2   Kutani masocha maluka hazri ya mitwa mayitlhanteka anhlokweni yake, mamuyambexa nkhancu wa libungu,

3   mamubuyela, maku: “Hilosile, we Hosi ya vajuda”, na mamuba wuso hi timpama.

4   Pilatu atlhela ahuma aku ka vone: “Lavisani! Nimihumexela yene akuva mitasvitiva lesvaku anikumi nandzru ka yene.”

5   Kutani Yesu ahuma handle, na ayambale hazri ya mitwa ni nkhancu wa libungu. Kutani Pilatu aku ka vone: “Hi lweyi mhunu wenu!”

6   Nhambitanu, loko vaprista lavakulu ni valaviseli lavatsrongo vamuvona, vabandlukana, vaku: “Aagongondzreliwe! Aagongondzreliwe!” Pilatu aku ka vone: “Mutekani n’wine miyamudlaya, hikuva mine anikumi nandzru ka yene.”

7   Vajuda vamuhlamula, vaku: “Hine hi ni nawu, nakone Nawu lowo wuli afanela kudlawa, hikusa atiyence n’wana wa Xikwembu.”

8   Loko Pilatu ayingele lesvi avasvihlaya, ayengetela kuchava,

9   atlhela anhingena andlwini ya wuhosi aku ka Yesu: “Uhuma kwini?” Kambe Yesu angamuhlamulanga nchumu.

10   Kutani Pilatu aku ka yene: “Awujuli kukhanela na mine? Awusvitivi lesvaku ni ni ntamu wa kukuntsrhunxa nakone loko nisvijula ningakudlaya?”

11   Yesu amuhlamula, aku: “Wene awungetiva na ntamu wa kuniyenca nchumu ni kutsrongo loko awunganyikiwanga wone na svipfela henhla. Hi xivangelo lexi, lweyi anganinyiketa kwaku a ni xidoho lexikulu kutlulisa.”

12   Kutani Pilatu adzringisa kukuma ndlela ya kumuntsrhunxa, kambe vajuda vabandlukana, vaku: “Loko wontsrhunxa mhunu lweyo, awu munghanu wa Khezari. Mani na mani lwatiyencaka hosi alwa na Khezari.”

13   Kutani Pilatu, loko ayingela mazritu lawo, ahumexa Yesu, atsrhamisa axitsrhan’wini xa wuyavanyisi ambangwini lowuvitaniwaka Le Mazribzeni, kambe hi xiheberu, Gabbatha.

14   Kutani adzrili siku dzra Malulamiselo ya Paxkwa, nakone nkama lowo asviya ka 9 wora Kutani aku ka vajuda: “Hi leyi Hosi yenu!”

15   Kambe vabandlukana, vaku: “Mususe! Mususe! Aagongondzreliwe!” Pilatu aku ka vone: “Mijula nidlaya hosi yenu?” Vaprista lavakulu vahlamula, vaku: “Ahi na hosi yimbeni handle ka Khezari!”

16   Kutani amunyiketa ka vone akuva agongondzreliwa amhandzreni. Kutani vateka Yesu.

17   Ahuma na atizrwalele mhandzre, aya lomu kuhlayiwaka Mbangu wa Pala, lowuvitaniwakwa Golgotha hi xiheberu,

18   lomu vatlhasiki vamugongondzrela xikan’we ni vhanu vabidzri, mun’we atlhelweni ledzri mun’wana atlhelweni ledzrimbeni, Yesu asala makazri.

19   Pilatu atlhela atsrala tsralwa, adzribeka amhandzreni. Akutsraliwe lesvi: “Yesu wa Nazareta, hosi ya vajuda.”

20   Vanyingi va vajuda vadondzre tsralwa ledzri, hikusa lomu Yesu aagongondzreliwe kone akuli kusuhi ni doropa, nakone adzritsraliwe hi xiheberu, ni xilatini ni xigrika.

21   Xilesvo vaprista lavakulu va vajuda avaku ka Pilatu: “Ungatsrali lesvaku: ‘Hosi ya vajuda’, kambe lesvaku ate: ‘Hi mine hosi ya vajuda.’”

22   Pilatu ahlamula aku: “Lesvi nisvitsraliki nisvitsralile.”

23   Kutani loko masocha mahete kugongondzrela Yesu amhandzreni, mateka mijansi yake ni minkhancu yake mayavana hi mune wa sviyenge, xin’we xiva xa musocha ni musocha, matlhela mateka ni nkhancu wake. Kambe nkhancu awunge na ka kutlhavinyetiwa; awelukiwa kusukela henhla kuya hansi.

24   Kutani mabzelana, maku: “Hingawuhandzruleni, kambe ahihambeni mpshampsha akuva hitiva lesvaku wutava wa mani.” Lesvo asviyencela kuhetisisa tsralwa ledzriliki: “Vayavelane sviyambalu svanga, vahambela mpshampsha mpahla yanga.” Kutani masocha kunene mayence tanu.

25   Kambe le tlhelweni ka mhandzre leyi Yesu agongondzreliwiki ka yone, akuyime mamana wake ni makwa wa mamana wake; Mariya, nsati wa Klewopasi na Mariya Madalena.

26   Kutani loko Yesu avona mamana wake ni mudondzrisiwa lweyi aamuzrandzra na ayime le tlhelweni, aku ka mamana wake: “Wansati, hi lweyo n’wanaku!”

27   Agama aku ka mudondzrisiwa lwiyani: “Hi lweyo mamana waku!” Kutani kusukela ka nkama lowo, mudondzrisiwa amuteka ayatsrhama naye akaya kwake.

28   Antsrhaku ka lesvi, loko Yesu ative lesvaku kuyatlhasa ka nkama lowo hinkwasvu asvihetisisiwile, akuva kutahetiseka ndzrimana, ahlaye lesvi: “Ni ni tozra.”

29   Akubekiwe hotsro ya kutala hi vhinyo ka mbangu lowuyani. Kutani vateka xiponjhi xa kutala hi vhinyo dzra kutsatsavela vaxitlhoma ka lihlanga dzra hisopo vaxiyisa anon’wini wake.

30   Loko vamunyikile vhinyo dzra kutsatsavela, Yesu aku: “Svihetisekile!” Akazramisa nhloko, anyiketa moya.

31   Lesvi aali siku dzra Malulamiselo, akuva mintsrumbu yingatsrhami atimhandzreni hi Savata (hikuva Savata ledzro adzrili dzrikulu), vajuda vayekombela Pilatu lesvaku kutsrhoviwa minenge ya lavagongondzreliwiki akuva kususiwa mintsrumbu.

32   Kutani masocha matlhasa matsrhova minenge ya lwewa kusungula ni ya lwemun’wana lweyi aali atlhelweni kwake amhandzreni.

33   Kambe loko matlhasa ka Yesu, mavone lesvaku kutani aafile; xilesvo amamutsrhovanga minenge.

34   Kambe mun’we wa masocha atlhave zreve dzrake hi tlhazri, kutekela kuhuma ngati ni mati.

35   Kutani lweyi asvivoniki anyikele wumboni lebzi, nakone wumboni bzake i bza ntiyiso, nakone awasvitiva lesvaku lesvi asvihlayaka i sva ntiyiso, akuva na n’wine mitakholwa.

36   Hikusa lesvo svihumelele akuva kuhetiseka ndzrimana leyiliki: “Kungetitsrhoviwa ni dzrin’we dzra mazrambu yake.”

37   Nakone ndzrimana yin’wana funtsrhi yili: “Vatalangusa lweyi vamutlhaviki.”

38   Kutani antsrhaku ka lesvo, Josefa wa le Arimateya, lweyi aali mudondzrisiwa wa Yesu kambe axihundleni hi mhaka ya kuchava vajuda, ayekombela ka Pilatu lesvaku angateka ntsrumbu wa Yesu; Pilatu ahangamunyika mpfumelelo. Kutani abuya asusa ntsrumbu.

39   Na yene Nikodema, lweyi angayakhanela na Yesu ni wusiku akusunguleni, abuye ni mizri ya kupatsrinyetiwa ni lowa kunun’hwelisa tindlwini ni mhangana, lesvi asviyenca kusuhi ni 45 wa makilu.

40   Kutani vateka ntsrumbu wa Yesu vawutsrondzriyela hi malansole na vachele mizri ya kunun’hwela hi kulandzra malahlela ya xijuda.

41   Kutani, ambangwini lowu adlaweliki ka wone aku ni xizramba, kutani le xizrambeni xa kone, aku ni sizra dzrimpsha ledzri akungali na mhunu lwasamiki alahliwa ka dzrone.

42   Kutani lesvi aali siku dzra Malulamiselo ya vajuda, hi kuvona lesvaku sizra adzrili kusuhi, valahle Yesu kone.