-
Johani 2
1 Kutani hi siku dzra wuzrazru, kuve ni muchatu le Kana wa Galileya; na ye mamana wa Yesu aali ka wone.
2 Kutani na ye Yesu ni vadondzrisiwa vake avazrambiwile amuchatwini.
3 Kutani loko vhinyo dzrihelile, mamana wa Yesu ayekhanela naye, aku: “Ava na vhinyo.”
4 Kambe Yesu aku ka yene: “Wansati, mine na wene hinhingena kwini ka lesvo? Nkama wanga awusitlhasa.”
5 Mamana wake ayakhanela ni malandzra, aku: “Xin’wana ni xin’wana lexi atakamibzela aku yencisani xisvone, yencani!”
6 Kutani aku ni 6 wa tihotsro ta mati ta kuhambiwa hi zribze leti atibekiwe kone hi kulandzra minawu ya kutibasisa ya vajuda, yin’wana ni yin’wana ya kuyanela 44 kuya ka 66 wa malitru.
7 Yesu aku ka vone: “Tatani tihotsro hi mati.” Kutani vatitata tiyagamela non’wini.
8 Agama aku ka vone: “Svosvi kanani miyanyika mufambisi wa nkhuvu.” Lesvi vamuheleketeliki.
9 Kutani loko mufambisi wa nkhuvu adzringa mati lawa amandzruluke vhinyo, na angakutivi lomu adzribuya ha kone (hikusa asvotiviwa ntsena hi malandzra lamakiki mati), avitana muteki,
10 aku ka yene: “Hinkwavu vazranga hi kuhumexa vhinyo ledzrinene, vagama vahumexa ledzringaphelikiki loko vhanu kutani vapopsile. Wene ubekise ledzrinene akuva dzrinwiwa svosvi.”
11 Yesu asungule kuyenca masingita hi singita ledzri le Kana wa Galileya, akombisa kuphatima kwake, kutani vadondzrisiwa vake vapfumela ka yene.
12 Antsrhaku ka lesvo, yene ni mamana wake ni vamakwavu, ni vadondzrisiwa vake, vafulamele vaya Kapernawume, kambe avatsrhamanga masiku manyingi kone.
13 Kutani Paxkwa dzra vajuda adzritsrhindzrekela, kutani Yesu atlhantukela Jerusalema.
14 Atlhasa atempeleni akuma lavaxavisaka tihomu, tihamba ni matuva, ni vacincisi va mali na vetsrhama.
15 Ahamba xisepu hi tingoti, ahlongola hinkwavu lava ava ni tihamba ni tihomu atempeleni, awisetela ni mali ya vacincisi va mali, awisa ni mabanka yavu.
16 Kutani aku ka lavaxavisaka matuva: “Susani lesvi lani! Mingateki yindlu ya Tatana wanga miyiyenca bazara!”
17 Vadondzrisiwa vake vadzrimuka lesvaku kutsraliwe lesvi: “Nitapsha hi kuhisekela yindlu yaku.”
18 Kutani vajuda vamuyangula, vaku: “Ungahikomba singita dzrini, hitakholwa lesvaku u ni mfanelo ya kuyenca lesvi?”
19 Yesu avahlamula, aku: “Hohlotani tempele ledzri! Mine nitadzripfuxeta hi masiku mazrazru.”
20 Kutani vajuda vaku: “Tempele ledzri dzriteke 46 wa malembe, kutani wene utadzripfuxeta hi masiku mazrazru?!”
21 Kambe loko akhanela hi tempele aahlaya mizri wake.
22 Nhambitanu, loko apfuxiwile akufeni, vadondzrisiwa vake vadzrimukile lesvaku aasvihlaya lesvi; kutani vakholwa Matsralwa ni lesvi Yesu asvihlayiki.
23 Nhambitanu, loko ali Jerusalema ankhubzini wa Paxkwa, vhanu vanyingi vapfumelile avitweni dzrake loko vavona masingita lawa aamayenca.
24 Kambe Yesu aangatekeki hi vone hikusa aavativa hinkwavu.
25 Xin’wana funtsrhi hi lesvaku aangavileli mhunu wa kukazri akuva afakazela mhunu mun’wana, hikuva aasvitiva lesvinga ndzreni ka mhunu.