BRN

1   Kutani hi siku dzra kusungula dzra vhiki, Mariya Madalena abuya asizreni ni mpundzru, na kahamphumile, atlhasa akuma lesvaku zribze kutani adzripfinguliwile asizreni.

2   Kutani abuya hi kutsrutsruma ka Simoni Petrosi ni mudondzrisiwa lwemun’wana, lweyi Yesu aamuzrandzra, aku ka vone: “Vasuse Hosi asizreni, nakone ahikutivi lomu vayibekiki kone.”

3   Kutani Petrosi ni mudondzrisiwa lwemun’wana vasuka vaya asizreni.

4   Hi wubidzri bzavu va vasungula kutsrutsruma xikan’we; mudondzrisiwa lwemun’wana aatsrutstuma hi matsrambu kutlula Petrosi. Kutani azranga atlhasa asizreni.

5   Loko aku awahlomela, ovona makapulana ya linyu na mali hansi, kambe anganhingenanga.

6   Kutani Simoni Petrosi na yene atlhasa, antsrhaku kwake, anhingena asizreni. Avona makapulana ya linyu na mali hansi.

7   Kapulana ledzri avamufunekete nhloko hi dzrone adzringali xikan’we ni makapulana man’wana lahaya hansi, kambe adzritsrondzriyeliwe dzritsrhama hi tlhelo wusvadzrone.

8   Kutani mudondzrisiwa lwemun’wana lweyi aazrange atlhasa asizreni anhingena, asvivona, akholwa.

9   Hikuva avangesidzritwisisa tsralwa ledzriliki afanela kupfuka akufeni.

10   Kutani vadondzrisiwa vatlhelela amakaya kwavu.

11   Kambe Mariya, ayima handle kusuhi ni sizra, adzrila. Na ahadzrila, akazrama lesvaku atahlomela ndzreni ka sizra,

12   kutani avona tintsrumi tibidzri leti atiyambale mpahla ya kubasa na titsrhame lomu ntsrumbu wa Yesu awubekiwe kone, yin’we atinhlokweni, leyin’wana aminengeni.

13   Kutani tiku ka yene: “Wansati, udzrilela yini?” Aku ka tone: “Vasuse Hosi yanga, kutani anikutivi lomu vayibekiki kone.”

14   Loko ahlaye lesvo, andzruluka avona Yesu na eyima kone, kambe angasvivonga lesvaku i Yesu.

15   Yesu aku ka yene: “Wansati, udzrilela yini? Ubuya ujula mani?” Hi kupimisa lesvaku i mubekisi wa xizramba, aku ka yene: “Hosi, loko uli wene umususiki, nibzele lomu umubekiki kone nitayamuteka.”

16   Yesu aku ka yene: “Mariya!” Andzruluka aku ka yene hi xiheberu: “Raboni!” (lesvitlhamuxelaka lesvaku “Mudondzrisi!”)

17   Yesu aku ka yene: “Unganinamazreli, hikuva anisitlhantukela ka Tatana. Kambe yana ka vamakwezru uyavabzela lesvi: ‘Nitlhantukela ka Tatana wanga ni Tatana wenu, ni Xikwembu xanga ni Xikwembu xenu.’”

18   Mariya Madalena ayatlhasisela ndzrava vadondzrisiwa, aku: “Nivone Hosi!” Kutani avadzrungulela lesvi yingamubzela svone.

19   Loko dambu dzripelile siku ledzro, anga siku dzra kusungula dzra vhiki, na svipfalu svikhiyiwile lomu vadondzrisiwa avali kone hi kuchava vajuda, Yesu anhingena ayima amakazri kwavu, aku ka vone: “Kuzrula akuve na n’wine.”

20   Antsrhaku ka kuhlaya lesvo, avakomba mavoko ni mazreve yake. Kutani vadondzrisiwa vanyonxa hi kuvona Hosi.

21   Yesu atlhela aku ka vone: “Kuzrula akuve na n’wine. Svanga hesvi Tatana anizrumiki, na mine namizruma.”

22   Antsrhaku ka kuhlaya lesvo, avafufutela moya, aku ka vone: “Yamukelani moya wa kuxwenga.

23   Loko midzrivalela mhunu svidoho, svitadzrivaleliwa; loko mingamudzrivaleli, svingetidzrivaleliwa.”

24   Kambe Tomasi, mun’we wa lava 12, lweyi aavitaniwa Didimosi (Hahla), aangali navu loko Yesu atlhasa.

25   Kutani vadondzrisiwa lavan’wana vamubzela, vaku: “Hivone Hosi!” Kambe aku ka vone: “Loko ningavoni ntsrhosi wa svipikizri amavokweni yake niva nindevetela ntsrhosi wa svipikizri hi litiho dzranga, nitlhela nindeveta zreve dzrake hi voko dzranga, ningaka ningasvikholwi ni kutsrongo.”

26   Kutani, antsrhaku ka 8 wa masiku, vadondzrisiwa vake vatlhela vakumeka na vatipfalelile ndlwini. Na ye Tomasi aali navu. Yesu anhingena nhambilesvi svipfalu asvikhiyiwile, ayima makazri kwavu, aku: “Kuzrula akuve na n’wine.”

27   Agama aku ka Tomasi: “Ndeveta hi tintiho, uvona mavoko yanga, ubuyisa voko undeveta zreve dzranga, utsrhika kuganaganeka kambe ukholwa.”

28   Tomasi ayangula, aku ka yene: “Hosi yanga ni Xikwembu xanga!”

29   Yesu aku ka yene: “Xana ukholwa hi lesvi kutani univoniki? Va ni njombo lavakholwaka na vangasvivonanga.”

30   Nakone Yesu ayence ni masingita man’wana ya kutala amahlweni ka vadondzrisiwa, lawa mangatsraliwangakiki ka buku ledzri.

31   Kambe lesvi svitsraleliwe akuva n’wine mikholwa lesvaku Yesu i Kriste, n’wana wa Xikwembu ni lesvaku hi kukholwa, mitakota kukuma wutomi hi kola ka vito dzrake.