-
Johani 21
1 Antsrhaku ka lesvi, Yesu atlhela atikombekisa ka vadondzrisiwa le Lwandle dzra Tiberya. Atikombekise hi ndlela leyi:
2 Avali xikan’we Simoni Petrosi, Tomasi (lwavitaniwaka Didimosi, Hahla), Nataniyele wa le Kana wa Galileya, ni vana va Zebedewu, na vabidzri van’wana va vadondzrisiwa vake.
3 Simoni Petrosi aku ka vone: “Nahaya kuphaseni ka tinhlampfi.” Vaku ka yene: “Na hine hahafamba na wene.” Vasukiki vayanhingena botini, kambe wusiku lebzo hinkwabzu avaphasanga nchumu.
4 Kutani loko bzixa, Yesu ayima ankingeni, kambe vadondzrisiwa avasvivonanga lesvaku i Yesu.
5 Kutani Yesu aku ka vone: “Vananga, njhe, mi ni svakuda kolanu?” Vahlamula, vaku: “Ihina!”
6 Aku ka vone: “Cukumetelani nkukutu hi tlhelo dzra xinene dzra boti, mitaphasa.” Kutani vawucukumetela, kambe vahluleka kuwukoka wunhingena botini hi mhaka ya kutala ka tinhlampfi.
7 Kutani mudondzrisiwa lweyi Yesu aamuzrandzra aku ka Petrosi: “Hi Hosi!” Kutani Simoni Petrosi, loko ayingele lesvaku hi Hosi, ayambala mujasi wake, (hikuva aahlivilile), aku ka lwandle tluu!
8 Kambe vadondzrisiwa lavan’wana vabuya hi boti, na vakoka nkukutu wa kutala hi tinhlampfi, hikuva avangali kule ni sava, kambe avali ka kujula kuteka 500 wa mametru ntsena.
9 Kutani loko vatlhasa asaveni, vakuma lesvaku ku ni ndzrilo wa makhala ni tinhlampfi leti atiwoxiwa ka wone, ni mapawu.
10 Yesu aku ka vone: “Pambulani titsrongo ka tinhlampfi leti mahakakutiphasa mitibuyisa halenu.”
11 Kutani Simoni Petrosi ayanhingena botini akoka nkukutu awutisa asaveni na wutale hi tinhlampfi ta tikulu, 153 wa tone. Kambe nhambilesvi atitalise xilesvo, nkukutu awuhandzrukanga.
12 Yesu aku ka vone: “Buyani mitatakhomisa ndzreni.” Akuvanga ni mun’we wa vadondzrisiwa lwangava ni nhlana wa kumuvutisa, aku: “Hi we mani?” Hikusa avasvitiva lesvaku hi ye Hosi.
13 Yesu asekeleka ateka mapawu avanyika, ayenca svosvosvo ni hi tinhlampfi.
14 Lesvi kutani akuli ka wuzrazru na Yesu atikombekisa ka vadondzrisiwa antsrhaku ka loko apfuxiwe akufeni.
15 Loko vagame kufihlula, Yesu aku ka Simoni Petrosi: “Simoni, n’wana Johani, xana wanizrandzra kutlula lesvi?” Ayangula, aku ka yene: “Ina, Hosi, wasvitiva lesvaku nikuzrandzra ngopfu svinene.” Aku ka yene: “Disa svihambana svanga.”
16 Aphindha amuvutisa ka wubidzri, aku: “Simoni, n’wana Johani, xana wanizrandzra?” Ayangula aku: “Ina, Hosi, wasvitiva lesvaku nikuzrandzra ngopfu svinene.” Aku ka yene: “Bzisa svihambana svanga.”
17 Amuvutisa ka wuzrazru, aku: “Simoni, n’wana Johani, unizrandzra ngopfu svinene?” Petrosi atlhaveka mbilu hilesvi amuvutisiki ka wuzrazru, aku: “Xana unizrandzra ngopfu svinene?” Kutani aku ka yene: “Hosi, wene utiva hinkwasvu; wasvitiva lesvaku nikuzrandzra ngopfu svinene.” Yesu aku ka yene: “Disa svihambana svanga.
18 Nihlaya na nitiyisile niku ka wene: Na wahali ntsrongo, awuhamba uyambala, utiyela kwini na n’wini lomu awukujula. Kambe loko utaduhwala, utanalavuta mavoko kutani mhunu mun’wana atakuyambexa akuyisa lomu ungakujulikiki.”
19 Aahlaya lesvo kukomba mafela lawa aatadzrumisa Xikwembu ha wone. Antsrhaku ka kuhlaya lesvo, aku ka yene: “Fambafamba na mine.”
20 Loko Petrosi andzruluka, avona mudondzrisiwa lweyi Yesu aamuzrandzra na abuya hi ntsrhaku, anga lweyi angakhigetela hi le kusuhi na Yesu ka xilalelo aku ka yene: “Hosi, i mani lweyi akudlayisaka?”
21 Kutani loko amuvona, Petrosi aku ka Yesu: “Hosi, lweyi ke?”
22 Yesu aku ka yene: “Loko nijula kuva atama ava kone niko nibuya, unhingena kwini wene? Fambafamba na mine.”
23 Kutani kusungula kuduma mhaka amakazri ka vamakwavu ya lesvaku mudondzrisiwa lweyo aangetifa. Nhambitanu, Yesu angamubzelanga svone lesvaku angetifa, kambe ate ka yene: “Loko nijula lesvaku atama ava kone niko nibuya, unhingena kwini wene?”
24 Lweyo hi ye mudondzrisiwa lweyi abekaka wumboni bza timhaka leti, ni lweyi atsraliki timhaka leti, nakone hasvitiva lesvaku wumboni bzake i bza ntiyiso.
25 Nakone kaha ni minchumu yin’wana leya kutala leyi Yesu ayiyenciki, leyi niyanakanyaka lesvaku loko yingotsraliwa ha wun’wewun’we wa yone, misava hi ntshima ayingetiva na mbangu wa kubeka mabuku lawa amatatsraliwa.