-
Johani 3
1 Kutani aku ni mun’we wanuna lweyi aali xizro xa vafarisi lweyi aavitaniwa Nikodema. Aali mun’we wa vazrangeli va vajuda.
2 Ayele Yesu ni wusiku, aku ka yene: “Rabbi, hasvitiva lesvaku u mudondzrisi lwazrumiwiki hi Xikwembu, hikusa anga kone lweyi angakotaka kuyenca masingita lawa umayencaka na Xikwembu xingali naye.”
3 Yesu amuhlamula, aku: “Nihlaya na nitiyisile niku ka wene: Loko mhunu angapsaliwi ka wubidzri, angaka angawuvoni Mfumu wa Xikwembu.”
4 Nikodema aku ka yene: “Xana mhunu angapsalisiwa kuyini na ali nkulu? Svili angatlhela anhingena akhuzrini dzra mamana wake, atlhela apsaliwa?”
5 Yesu ahlamula, aku: “Nihlaya na nitiyisile niku ka wene: Loko mhunu angapsaliwi hi mati ni moya, angaka anganhingeni amfun’wini wa Xikwembu.
6 Lesvipsaliwiki hi nyama i nyama, ni lesvipsaliwiki hi moya i moya.
7 Ungahlamali hilesvi nikubzeliki niku: Kujuleka mipsaliwa ka wubidzri.
8 Moya wuhunga wuya lomu wukujulaka, kutani uyingela mpfumawulu wa wone, kambe awukutivi lomu wubuyaka hi kone ni lomu wuyaka kone. Svi xitanu ka mani na mani lwapsaliwiki hi moya.”
9 Nikodema amuhlamula, aku: “Svingakotekisa kuyini svolesvo?”
10 Yesu ahlamula, aku: “U mudondzrisi wa Yisrayele nakuve awutitivi timhaka leti?
11 Nihlaya na nitiyisile niku ka wene: Hine hikhanela lesvi hisvitivaka, hitlhela hibekela wumboni minchumu leyi hiyivoniki; kambe n’wine amiyamukelanga wumboni bzezru.
12 Lesvi nikubzeliki minchumu ya la misaveni kambe ungakholwi, utayikholwisa kuyini loko nokubzela minchumu ya le tilweni?
13 Nakone, aku na mhunu lwasamiki atlhantukela atilweni handle ka lweyi axikiki hi le tilweni, anga N’wana wa Mhunu.
14 Nakone svanga hesvi Moxe ahayekiki nyoka amananga, na ye N’wana wa Mhunu kujuleka ahayekisiwa xisvosvo,
15 lesvaku mani na mani lwapfumelaka ka yene akuma wutomi lebzingahelikiki.
16 “Hikuva Xikwembu xizrandzre misava ngopfu svinene lakakuva xinyikela N’wana wa xone lwapsaliwiki wusvake, akuva mani na mani lwapfumelaka ka yene angahelisiwi, kambe ava ni wutomi lebzingahelikiki.
17 Hikuva Xikwembu axizrumelanga N’wana wa xone amisaveni akuva ayavanyisa misava, kambe lesvaku misava yihuluxiwa ha yene.
18 Lweyi apfumelaka ka yene angayavanyisiwi. Lweyi angapfumelikiki ka yene kutani ayavanyisiwile, hikusa angapfumelanga ka vito dzra N’wana wa Xikwembu lwapsaliwiki wusvake.
19 Kutani xivangelo xa kuyavanyisiwa loku hi lexi: Hi lesvaku livaningo dzritile amisaveni, kambe vhanu vazrandzre munyama amatsrhan’wini ya livaningo, hikuva mintizro yavu yibihile.
20 Hikuva lweyi ayencaka minchumu ya kubiha awadzrinyenya livaningo funtsrhi angabuyi alivaningweni, akuva mintizro yake yingetisoliwa.
21 Kambe lweyi ahanyaka hi kulandzra ntiyiso abuya alivaningweni, akuva svitavoneka lesvaku mintizro yake yiyenciwa hi kutwanana ni kuzrandzra ka Xikwembu.”
22 Antsrhaku ka lesvi, Yesu ni vadondzrisiwa vake vanhingene atikweni dzra Judeya, lomu ahetiki nkamanyana navu, ava ababatisa.
23 Kambe Johani na yene aababatisa le Ayenoni kusuhi na Salimi, hikusa kone mati amali manyingi, kutani vhanu avayetetela vayababatisiwa;
24 hikuva Johani aangesipetiwa ajele.
25 Kutani kupfuka mholova amakazri ka vadondzrisiwa va Johani ni mujuda mun’we hi mhaka ya mukhuva wa kutibasisa.
26 Lesvi vabuyeliki Johani, vaku ka yene: “Rabbi, phela mhunu lweyi aali na wene halahaya ka Jordani, lweyi umufakazeliki, ababatisa vhanu nakone hinkwavu vayetetela ka yene.”
27 Johani ahlamula, aku: “Mhunu angeyamukeli nchumu ni wa wun’we na anganyikiwanga wone kusukela atilweni.
28 N’wine ha wusvenu manifakazela lesvaku nite: ‘Ahi mine Kriste, kambe nezrumiwa amahlweni kwake.’
29 Lweyi anga ni mutekiwa i muteki. Kambe munghanu wa muteki, loko ayima amuyingela, anyonxa ngopfu svinene hi mhaka ya zritu dzra muteki. Xilesvo kunyonxa kwanga kuhelelile.
30 Yene afanela kuyengeteleka, kambe mine nifanela kupumbeka.”
31 Lweyi abuyaka hi le henhla atlula hinkwavu. Lweyi abuyaka hi la misaveni abuya hi la misaveni nakone avulavula sva la misaveni. Lweyi abuyaka hi le tilweni atlula hinkwavu.
32 Akhanela hi minchumu leyi ekeyivona ni kuyiyingela, kambe aku na mhunu ayamukelaka wumboni bzake.
33 Lweyi ayamukeliki wumboni atiyise lesvaku Xikwembu xi ni ntiyiso.
34 Hikuva lweyi Xikwembu ximuzrumiki avulavula mazritu ya Xikwembu, hikuva axifeleli loko xihanana moya wa xone.
35 Tatana azrandzra N’wanake nakone abeke minchumu hinkwayu avokweni dzrake.
36 Lweyi apfumelaka ka N’wana a ni wutomi lebzingahelikiki; lweyi ayalaka kuyingiseta N’wana angetibzivona wutomi, kambe mahlundzru ya Xikwembu matsrhama ahenhla kwake.