BRN

1   Kutani loko Hosi yitive lesvaku vafarisi avabzeliwe lesvaku Yesu aahamba atlhela ababatisa vadondzrisiwa va vanyingi kutlula Johani,

2   nhambilesvi lweyi aababatisa aangali Yesu hi ntshima kambe vadondzrisiwa vake,

3   yisuka Judeya yitlhela yiya Galileya.

4   Kambe asvikombela akuva yikhaluta hi le Samariya.

5   Kutani yitlhasa adoropeni dzra Samariya ledzrivitaniwaka Sikari, kusuhi ni nsimu leyi Jakobe ayinyikiki n’wanake Josefa.

6   Kutani nhlovo ya Jakobe ayili ambangwini wolowo. Lesvi Yesu atlhasiki atsrhama anhlobzeni, hikusa aakazralile hi kufamba. Ankama lowo, asviya ka dina.

7   Kutlhasa mun’we wa mamana wa le Samariya atataka mati. Yesu aku ka yene: “Nikombela mati.”

8   (Hikusa vadondzrisiwa vake avaye doropeni vayaxava svakuda.)

9   Kutani lwewa mamana wa musamariya aku ka yene: “Unikombelisa kuyini mati nakuve u mujuda, kasi mine ni wansati wa musamariya?” (Hikuva vajuda avawokelani ndzrilo ni vasamariya.)

10   Yesu amuhlamula, aku: “Loko awetiva nyiko ya Xikwembu ni lesvaku i mani lweyi aliki ka wene: ‘Nikombela mati’, inha umukombelile, ava akunyika mati lamahanyaka.”

11   Lwewa mamana aku ka yene: “Hosi, ni xikelelo xa kuka mati ha xone awu naxu, nakuve nhlovo leyi yiyentile. Kutani utamakuma kwini mati wolawo ya kuhanya?

12   Svili wene u nkulu kutlula tatana wezru Jakobe, lweyi ahinyikiki nhlovo leyi ni lweyi anwiki mati ya yone, yene ni vanake ni svifuyo svake?”

13   Yesu amuhlamula, aku: “Mani na mani lweyi anwaka mati lawa atatlhela atwa tozra.

14   Kambe lweyi anwaka mati lawa nitakamunyika wone angaka angahatlheli atwa tozra ni siku ni dzrin’we, kambe mati lawa nitakamunyika wone matandzruluka nhlovo ya mati andzreni kwake, leyipfelelaka yihamba wutomi lebzingahelikiki.”

15   Lwewa mamana aku ka yene: “Hosi, ninyike mati lawo, akuva ningehetitwa tozra nhambi kutlhela nibuya lani nitatakelela mati.”

16   Aku ka yene: “Famba uyavitana nuna waku abuya lani.”

17   Lwewa mamana ayangula, aku: “Ani na nuna.” Yesu aku ka yene: “Uhlaya svone loko uku: ‘Ani na nuna.’

18   Hikuva uve ni ntlhanu wa vavanuna, kutani ni lweyi unga naye svosvi ahi nuna waku. Lanu ukhanele ntiyiso.”

19   Lwewa mamana aku ka yene: “Hosi, nasvivona lesvaku u muprofeta.

20   Vatatana vezru avagandzrela ka nhava leyi, kambe n’wine mili lomu kufanelaka kugandzreliwa kone hi le Jerusalema.”

21   Yesu aku ka yene: “Kholwa lesvi nikubzelaka svone, wene wansati, hikusa wata nkama lowu mingetikigandzrela Tatana anhaveni leyi nhambi Jerusalema.

22   N’wine migandzrela lesvi mingasvitivikiki; hine higandzrela lesvi hisvitivaka, hikusa huluku dzrihuma ka vajuda.

23   Kambe nkama wata, nakone wutlhasile kutani, lowu vagandzreli va ntiyiso vatakagandzrela Tatana hi moya ni ntiyiso, hikuva na ye Tatana ajula volavo lesvaku vamugandzrela.

24   Xikwembu i Moya, kutani lavaxigandzrelaka kujuleka vaxigandzrela hi moya ni ntiyiso.”

25   Lwewa mamana aku ka yene: “Nasvitiva lesvaku Mesiya, lwavitaniwaka Kriste, awata. Loko yelweyo atlhasa, atahibzela hinkwasvu.”

26   Yesu aku ka yene: “Hi ye mine, nikhanelaka na wene.”

27   Hi nkama lowo, kutlhasa vadondzrisiwa vake; kutani vahlamala hilesvi aavulavula ni mhunu wa zrambu dzra xisati. Kambe anga kone lwatiki: “Ujula yini?” kumbe: “Ukhanelela yini ni lwe wansati?”

28   Kutani lwewa mamana asuka, asiya hotsro yake ya mati ayanhingena adoropeni, abzela vhanu, aku:

29   “Buyani mivona mhunu lwanibzeliki hinkwasvu lesvi ningasviyenca. Angava ali yene Kriste, kumbexana?”

30   Vahuma adoropeni vayela Yesu.

31   Na kahayenceka lesvo, vadondzrisiwa avamutsratsriya, vaku: “Rabbi, dana.”

32   Kambe aku ka vone: “Ni ni svakuda lesvi n’wine mingasvitivikiki.”

33   Kutani vadondzrisiwa vabzelana, vaku: “Svili kova ni lweyi amubuyiseliki svakuda?”

34   Yesu aku ka vone: “Svakuda svanga i kuyenca kuzrandzra ka lweyi anizrumiki ni kuheta ntizro wake.

35   Ahi n’wine miliki kesala ntsena mune wa tihweti akuva kutlhasa nkama wa ntsrhovelo? Masviyingela? Nili ka n’wine: Tlakuxani tinhloko milangusa masimu, hikusa mawupfile, mayimela kutsrhoveliwa!

36   Mutsrhoveli kutani ayamukela muholo nakone ahlengeletela mihandzru yitanhingena awuton’wini lebzingahelikiki, akuva mubzali ni mutsrhoveli vatakota kunyonxa xikan’we.

37   Hikuva amhakeni leyi xitiyisile xihlayahlaya lexiliki:  ‘Kubzala mun’we, kutsrhovela mun’wana.’

38   Nimizrumile akuva miyatsrhovela lesvi mikalaka mingasvitizrelanga. Kutizre van’wana, kambe n’wine mitsrhovele lesvi vone vasvitizriki.”

39   Kutani vanyingi va lavahumaka adoropeni dzra vasamariya vapfumela ka Yesu hi mhaka ya zritu dzra lwewa mamana lwangabeka wumboni, aku: “Anibzele hinkwasvu lesvi ningasama nisviyenca.”

40   Kutani loko vasamariya vamutlhaselile, vamukombela kutsrhama navu; kutani atsrhama navu masiku mabidzri.

41   Kutani vhanu va kutala kutlula kusunguleni vapfumela hi mhaka ya lesvi Yesu asvihlayiki,

42   kutani vaku ka lwewa mamana: “Ahahapfumeli hi mhaka ya lesvi usvihlayiki; hikuva hesviyingela hi ta ka kwezru, kutani hasvitiva lesvaku lweyi kunene hi yene Muhuluxi wa misava.”

43   Kutani antsrhaku ka masiku mabidzri, asuka aya Galileya.

44   Hikusa Yesu hi ntshima aatiyisa lesvaku muprofeta angakombiwi xichavu atikweni dzrake.

45   Kutani loko atlhase Galileya, vagalileya vamuhoyozela, hilesvi vavoniki hinkwasvu lesvi angasviyenca le Jerusalema hi nkama wa nkhuvu, hikuva na vone avayile ankhubzini.

46   Kutani atlhela anhingena le Kana wa Galileya, lomu angandzruluta kone mati mava vhinyo. Kutani aku ni mutizreli wa le wuhosini lweyi aavabzeliwa hi n’wana le Kapernawume.

47   Loko ayingele lesvaku Yesu aahume Judeya ayanhingena Galileya, amuyelile ayamukombela kufamba naye ayadaha n’wanake, hikuva akusale kutsrongo akuva afa.

48   Kambe Yesu aku ka yene: “N’wine! Amikholwi nchumu loko mingesivona masingita ni svihlamaliso.”

49   Lwewa mutizreli wa le wuhosini aku ka yene: “Hosi, buya na n’wananga angesifa.”

50   Yesu aku ka yene: “Muka; n’wanaku awahanya.” Lweyo wanuna akholwa zritu ledzri Yesu amubzeliki dzrone, atikhomela ndlela amuka.

51   Kutani, na ahali ndleleni, malandzra yake mamutlhangaveta maku n’wanake awahanya.

52   Kutani avavutisa nkama lowu angayampsa ha wone. Vamuhlamula, vaku: “Agame kuhiseta mizri tolo hi 13 wora.”

53   Kutani lweyo wa tatana asvivona lesvaku akuli nkama wolowu Yesu angaku ka yene: “N’wanaku awahanya.” Kutani apfumela, yene ni ndangu wake hinkwawu.

54   Kutani ledzri adzrili singita dzra wubidzri ledzri Yesu adzriyenciki loko atlhase Galileya na apfa hi le Judeya.