BRN

1   Antsrhaku ka lesvo, Yesu atsremakanya Lwandle dzra Galileya, kumbe Tiberya.

2   Kutani vhanu vanyingi svinene vamulandzra, hikusa avavona masingita lawa aamayenca hi kuhanyisa timbabzi.

3   Kutani Yesu atlhantukela anhaveni, atsrhamisa kone ni vadondzrisiwa vake.

4   Kutani nkhuvu wa vajuda, anga Paxkwa, awuli kusuhi.

5   Loko Yesu atlakuxa nhloko avona lesvaku abuyeliwa hi xitsrhungu lexikulu, aku ka Filipi: “Hitaxava kwini mapawu ya kuva kuda vhanu lava?”

6   Kambe lesvo aahlayela kumukamba ntsena, hikuva aasvitiva lesvi aajula kusviyenca.

7   Filipi amuhlamula, aku: “Mapawu ya kuteka 200 wa madenari amadzringani akuva mun’wana ni mun’wana wavu akuma nhambi xikhemu.”

8   Mun’we wa vadondzrisiwa vake, Andreye, makwa Simoni Petrosi, aku ka yene:

9   “Hi lexi xifanyana xinga ni ntlhanu wa mapawu ya sevhada ni svinhlampfana svibidzri. Kambe svosvo svitavayenca yini vhanu va kutalisa xilesvi?”

10   Yesu aku ka yene: “Bzelani vhanu vatsrhamisa hansi.” Aku ni bzanyi bza bzinyingi ambangwini wa kone. Kutani vavanuna vatsrhamisa kone, na vajula kutlhasa ka 5.000 wa vone.

11   Yesu ateka mapawu, agama akhensa, amayavela lava avatsrhamisile; ayenca lesvifanaka hi svinhlampfana, hi mpimu lowu avawuxuva.

12   Kambe loko vadile vaxuzra, aku ka vadondzrisiwa vake: “Hlengeletani matlhantlha lamasaliki akuva kungacukumetiwi nchumu.”

13   Kutani vamahlengeleta, vatata 12 wa mintsrhava hi matlhantlha lamasiyiwiki hi lavadiki mapawu ya kusukela ka ntlhanu wa mapawu ya sevhada.

14   Kutani loko vhanu vavone singita ledzri adzriyenciki, vasungula kuhlaya lesvi: “Lweyi hakunene i Muprofeta lweyi abuyaka amisaveni.”

15   Kutani Yesu, hi kutiva lesvaku avajula kutatamukhoma vamuyenca hosi, atlhela asuka ayatsrhamisa anhaveni wusvake.

16   Loko dambu dzripela, vadondzrisiwa vake vafulamela lwandle.

17   Kuteloko vanhingene botini, vawela lwandle vaya Kapernawume. Kutani abzili wusiku, nakuve Yesu aangesitlhela ayavakuma.

18   Nakone lwandle adzrilebza hikusa akuba moya wa wukulu.

19   Kutani, loko vawete kolomu ka 5 kumbe 6 wa makilometru, vavona Yesu na afamba ahenhla ka lwandle atsrhindzrekela abotini; vatala hi kuchava.

20   Kambe aku ka vone: “Hi mine; mingachavi!”

21   Hi kone vanganyonxa hi kumuyamukela abotini, kutani hi nkama wolowo boti dzritlhasa atikweni ledzri avaya ka dzrone.

22   Mundzruku ka kone, xitsrhungu lexi axisale ka tlhelo ledzrin’wana dzra lwandle xisvivona lesvaku akungali na boti dzrin’wana kone handle ka xibotana xin’we ntsena, ni lesvaku Yesu aangafambanga hi boti ni vadondzrisiwa vake, kambe vadondzrisiwa vake avasuke wusvavu.

23   Kambe kusuhi ni mbangu lowu vhanu vadiki kone mapawu antsrhaku ka loko Hosi yikhensile, akutlhasa maboti mambeni lamabuyaka hi le Tiberya.

24   Kutani loko vhanu vavone lesvaku Yesu ni vadondzrisiwa avangali kone, vanhingena mabotini yavu vaya Kapernawume vayajuletela Yesu.

25   Loko vamukumile halahaya ka lwandle, vaku ka yene: “Rabbi, utlhase siku muni halenu?”

26   Yesu avahlamula, aku: “Nitiyisile nili ka n’wine: N’wine aminijuleteli hilesvi mivoniki masingita, kambe hilesvi midiki mapawu mixuzra.

27   Mingatizreli svakuda lesvihelaka, kambe tizrelani svakuda lesvitamaka sviva kone sviyisa awuton’wini lebzingahelikiki, lesvi N’wana wa Mhunu atakaminyika svone; hikuva hi lweyo afungiwiki hi Tatana, lwanga Xikwembu.”

28   Kutani vaku ka yene: “Xana hifanela kuyenca yini akuva hitizra mintizro ya Xikwembu?”

29   Yesu avahlamula, aku: “Ntizro wa Xikwembu hi lowu: I kuva mipfumela ka lweyi amuzrumiki.”

30   Kutani vaku ka yene: “Uyenca singita dzrini hitadzrivona hiva hikukholwa? Utayenca yini kee?

31   Vatatana vezru vade mana amananga, svanga hesvi kutsraliwiki lesvi: ‘Avanyike svakuda sva kupfa tilweni vada.’”

32   Kutani Yesu aku ka vone: “Nitiyisile nili ka n’wine, Moxe angaminyikanga svakuda sva kupfa tilweni, kambe Tatana aminyika svakuda sva ntiyiso sva kupfa tilweni.

33   Hikuva svakuda sva Xikwembu hi lweyi axikaka hi le tilweni, anyika misava wutomi.”

34   Kutani vaku ka yene: “Hosi, hinyike svakuda lesvo minkama hinkwayu.”

35   Yesu aku ka vone: “Hi mine svakuda sva wutomi. Lweyi abuyaka ka mine angaka angahatlheli atwa ndlala, ni lweyi apfumelaka ka mine angaka angahatlheli atwa tozra.

36   Kambe hi la nihlayaka ha kone ka n’wine, minivonile kambe amikholwanga.

37   Hinkwavu lava Tatana aninyikaka vone vatata kwanga, kutani lweyi ataka kwanga ningaka ningamuhlongoli ni siku ni dzrin’we;

38   hikuva anixikanga hi le tilweni kutatayenca kuzrandzra kwanga, kambe nixikele kutatayenca kuzrandzra ka Lweyi anizrumiki.

39   Kutani kuzrandzra ka Lweyi anizrumiki hi loku, lesvaku ningachuki nilahlekeliwa hi mhunu ni mun’we ka hinkwavu lava aninyikiki vone, kambe nivapfuxa asikwini dzra wugamu.

40   Hikuva kuzrandzra ka Tatana wanga hi koloku: I kuva mani na mani lwavonaka N’wana ava apfumela ka yene akuma wutomi lebzingahelikiki, kutani mine nitamupfuxa asikwini dzra wugamu.”

41   Kutani vajuda vasungula kungurangura hi mhaka yake hilesvi atiki: “Hi mine svakuda lesvixikiki hi le tilweni.”

42   Kutani vaku: “Xana lweyi ahi yene Yesu n’wana Josefa, yelweyi nhambi tatana wake ni mamana wake hivativaka? Kutani asvikotisa kuyini kuhlaya lesvaku: ‘Nixike hi le tilweni’?”

43   Yesu avayangula, aku: “Tsrhikani kungurangura amakazri kwenu.

44   Aku na mhunu angataka kwanga handle ka loko Tatana, lweyi anizrumiki, amuyenca asvinavela; kutani mine nitamupfuxa hi siku dzra wugamu.

45   Kutsraliwe lesvi amabukwini ya vaprofeta: ‘Hinkwavu vatadondzrisiwa hi Xikwembu.’ Mani na mani lwayingeliki Tatana atlhela adondzra, abuya kwanga.

46   Aku na mhunu lwasamiki avona Tatana, handle ka lweyi ataka hi le ka Xikwembu; lweyo hi yene avoniki Tatana.

47   Nitiyisile nili ka n’wine: Lweyi apfumelaka a ni wutomi lebzingahelikiki.

48   “Hi mine svakuda sva wutomi.

49   Vatatana venu vade mana amananga kambe vagame hi kufa.

50   Lesvi hi svone svakuda lesvixikaka hi le tilweni, akuva loko mhunu asvida, angafi.

51   Hi mine svakuda lesvihanyaka lesvixikiki hi le tilweni. Loko mhunu ada svakuda lesvi, atahanya hi la kungahelikiki; Nakone, svakuda lesvi nitakasvinyikela akuva nihuluxa wutomi bza misava i nyama yanga.”

52   Kutani vajuda vasungula kudokadokisana, vaku: “Xana mhunu lweyi angahinyikisa kuyini nyama yake hida?”

53   Kutani Yesu aku ka vone: “Nitiyisile nili ka n’wine: Loko mingadi nyama ya N’wana wa Mhunu miva minwa ni ngati yake, ami na wutomi andzreni kwenu.

54   Lweyi adaka nyama yanga ava anwa ni ngati yanga a ni wutomi lebzingahelikiki, kutani mine nitamupfuxa hi siku dzra wugamu;

55   hikuva nyama yanga i svakuda sva ntiyiso ni ngati yanga i svakunwa sva ntiyiso.

56   Lweyi adaka nyama yanga ava anwa ngati yanga, atsrhama xikan’we na mine, niva na mine nitsrhama xikan’we na yene.

57   Svanga hesvi Tatana lwahanyaka anizrumiki, ni lesvi na mine nihanyaka hi kola ka Tatana, ni yelweyi adaka mine atahanya hi kola ka mine.

58   Lesvi hi svone svakuda lesvixikiki hi le tilweni. Asvifani ni lesvi vatatana venu vadiki vagama vafa. Lweyi adaka svakuda lesvi ahanya hi la kungahelikiki.”

59   Lesvi asvihlaye na adondzrisa ka dzrin’we dzra masinagoga ya le Kapernawume.

60   Kutani loko vanyingi va vadondzrisiwa vake vayingela lesvo, vaku: “Zritu ledzri dzritsremana nhlana; i mani angadzriyingisetaka?”

61   Kambe Yesu, hi kutiva lesvaku vadondzrisiwa vake vangurangura hi lesvo, aku ka vone: “Xana lesvi svamikhunguvanyisa?

62   Mitayenca yini, ke kutani, loko mivona N’wana wa Mhunu na atlhantukela lomu aali kone akusunguleni?

63   Lexi xinyikaka wutomi i moya; nyama ayisizi nchumu. Mazritu lawa nimibzeliki wone i moya ni wutomi.

64   Kambe lani ku ni van’we ka n’wine lavangapfumelikiki.” Hikuva Yesu aavativa kusukela akusunguleni lavangapfumelikiki ni lweyi aatamuxavisa.

65   Kutani aya mahlweni, aku: “Hi svosvo nimibzeliki niku aku na mhunu lwangataka kwanga handle ka loko anyikiwe hi Tatana.”

66   Hi mhaka leyo, vanyingi va vadondzrisiwa vake vatlhelela ntsrhaku, vangahafambi na yene.

67   Kutani Yesu aku ka lava 12: “Na n’wine amisvijuli kufamba?”

68   Simoni Petrosi amuhlamula, aku: “Hosi, hitaya ka mani? Hi wene unga ni mazritu ya wutomi lebzingahelikiki,

69   nakone hipfumelile hiva hisvitwisisa lesvaku wene u Muxwengi wa Xikwembu.”

70   Yesu avahlamula, aku: “Animihlawulanga na mili 12 kee? Kasi mun’we wa n’wine i mulumbeti.”

71   Ankameni lowo aakhanela hi Juda wa ka Simoni Iskariyota, hikuva hi yene lweyi aajula kumudlayisa, nhambilesvi aali mun’we wa lava 12.