BRN

12   Kutani Yesu atlhela avulavula na vone, aku: “Hi mine livaningo dzra misava. Lweyi anilandzraka angaka angafambi amunyameni, kambe atava ni livaningo dzra wutomi.”

13   Kutani vafarisi vaku ka yene: “Wene hi wene wokotifakazela; wumboni bzaku ahi bza ntiyiso.”

14   Yesu avahlamula, aku: “Nhambiloko nitifakazela, wumboni bzanga i bza ntiyiso, hikusa nakutiva lomu nihumaka kone ni lomu ni yaka kone. Kambe n’wine amikutivi lomu nihumaka kone ni lomu niyaka kone.

15   N’wine miyavanyisa hi kuya hi nyama; mine aniyavanyisi mhunu ni kutsrongo.

16   Nakone nhambiloko niyavanyisa, wuyavanyisi bzanga i bza ntiyiso, hikusa ani wusvanga, kambe Tatana wanga lwanizrumiki a na mine.

17   Nakone anawini wenu kutsraliwe lesvaku ‘wumboni bza vhanu vabidzri i bza ntiyiso’.

18   Hi mine nitibekelaka wumboni, nitlhela nibekeliwa wumboni hi Tatana wanga lwanizrumiki.”

19   Kutani vaku ka yene: “A kwini Tatana waku?” Yesu ahlamula, aku: “N’wine aminitivi mine nhambi ova Tatana wanga. Loko aminitivile, inha mimutivile na yene Tatana wanga.”

20   Ahlaye mazritu lawa na ali ambangwini wa kuchela minhlengo ankama lowu aadondzrisa atempeleni. Kambe angakhomiwanga hi mhunu, hikuva nkama wake awungesitlhasa.

21   Kutani atlhela aku ka vone: “Nafamba, kutani n’wine mitanijula, kambe mitafela axidohweni xenu. Lomu niyaka kone, n’wine mingetlhasi.”

22   Kutani vajuda avaku: “Svili ojula kutisunga, lesvi aliki: ‘Lomu niyaka kone, n’wine mingetlhasi’?”

23   Kutani aku ka vone: “N’wine mihuma la hansi; mine nihuma le henhla. N’wine mihuma ka misava leyi; mine anihumi ka misava leyi.

24   Hi svosvo ningamibzela, niku: Mitafela asvidohweni svenu. Hikuva loko mingapfumeli lesvaku hi mine, mitafela asvidohweni svenu.”

25   Kutani avaku ka yene: “Hi wene mani?” Yesu avahlamula, aku: “Kasi nikhanelela yini na n’wine kusukela khale?

26   Ni na svinyingi sva kusvihlaya ha n’wine ni kusviyavanyisa. Kambe Lweyi anizrumiki i wa ntiyiso, nakone lesvi nisviyingeliki ka yene nisvibzela misava.”

27   Avasvitwisisanga lesvaku aavulavula hi Tatana.

28   Yesu kutani aku ka vone: “Loko mitava mitlakuxe N’wana wa Mhunu, kutani mitasvitiva lesvaku hi mine ni lesvaku aniyenci nchumu hi kutisungulela kwanga; kambe lesvi Tatana anidondzrisisiki xisvone, nikhanelisa xisvosvo.

29   Nakone Lweyi anizrumiki a na mine; anganitsrhikanga wusvanga, hikusa minkama hinkwayu niyenca lesvimunyonxisaka.”

30   Ankama lowu aavulavula hi timhaka leto, vanyingi vapfumelile ka yene.

31   Kutani Yesu abzela vajuda lava avapfumele ka yene, aku: “Loko mitsrhama azritwini dzranga, mi vadondzrisiwa vanga hakunene,

32   kutani mitativa ntiyiso; ntiyiso wutamintsrhunxa.”

33   Vamuhlamula, vaku: “Hi vana va Abrahamu nakone ahingisama hiva svikazrawa sva mhunu. Uhlayisa kuyini uku: ‘Mitantsrhunxiwa’?”

34   Yesu avahlamula, aku: “Nitiyisile nili ka n’wine: Mani na mani lwayencaka xidoho i xikazrawa xa xidoho.

35   Kambe xikazrawa axitsrhami andangwini hi la kungahelikiki; N’wana hi yene atsrhamaka hi la kungahelikiki.

36   Xilesvo, loko N’wana amintsrhunxa, mitava lavantsrhunxekiki hi ntiyiso.

37   Nasvitiva lesvaku mi vana va Abrahamu. Kambe mijula kunidlaya, hikusa zritu dzranga adzrikumi mbangu andzreni kwenu.

38   Nivulavula lesvi nisvivoniki na ni na Tatana, kutani na n’wine miyenca lesvi misviyingeliki ka tatana wenu.”

39   Vahlamula, vaku: “Tatana wezru i Abrahamu.” Yesu aku ka vone: “Loko amili vana va Abrahamu, amitayenca mintizro ya Abrahamu.

40   Kambe svosvi mijula kunidlaya, mine ninga mhunu lweyi amibzeliki ntiyiso lowu niwuyingeliki ka Xikwembu. Abrahamu angayencanga lesvo.

41   N’wine miyenca mintizro ya tatana wenu.” Vone vaku ka yene: “Hine ahipsaliwanga hi wugangu; hi ni Tatana mun’we, anga Xikwembu.”

42   Yesu aku ka vone: “Loko Xikwembu axili tatana wenu, amitanizrandzra, hikuva nikumeka lani na nihuma ka Xikwembu. Anibuyanga hi kutisungulela, kambe hi xone xinizrumiki.

43   Hayini mingatwisisi lesvi nisvihlayaka? Hilesvi mihlulekaka kuyingela zritu dzranga.

44   N’wine mihuma ka tatana wenu, Diyavulosi, nakone mijula kuyenca kunavela ka tatana wenu. Yelweyo aali mudlayi kusukela amasungulwini, nakone angayimanga atiya ka ntiyiso, hikusa ntiyiso awu kone kwake. Loko akhanela madzrimi, akhanela hi kulandzra tsrhamela dzrake, hikusa i muhembi ni tatana wa madzrimi.

45   Kambe lesvi mine nimibzelaka ntiyiso, aminikholwi.

46   Hi mani ka n’wine anganitsremelaka xikhatiso hi mhaka ya xidoho? Loko nikhanela ntiyiso, hayini minganikholwi?

47   Lweyi ahumaka ka Xikwembu ayingiseta mazritu ya Xikwembu. Hi svosvo mingayingisetikiki ha svone, hikusa amihumi ka Xikwembu.”

48   Vajuda vamuhlamula, vaku: “Ahi svone lesvi hihlayaka ha svone, hiku: ‘Wene u musamariya, funtsrhi u ni demona’?”

49   Yesu ahlamula, aku: “Ani na demona, kambe nibekela xichavu Tatana wanga, kambe n’wine maniyeyisa.

50   Kambe mine anitijuleli kudzrumisiwa; a kone Lweyi akujulaka ni Lweyi ayavanyisaka.

51   Nitiyisile nili ka n’wine: Loko mhunu abekisa zritu dzranga, angaka angavoni lifu ni siku ni dzrin’we.”

52   Vajuda vaku ka yene: “Svosvi hasvitiva lesvaku wene u ni demona! Abrahamu afile, na vone vaprofeta vafile, kambe wene uli: ‘Loko mhunu abekisa zritu dzranga, anga na kutiva ni siku ni dzrin’we lesvaku lifu i mpsini’!

53   Svili u nkulu kutlula tatana wezru Abrahamu, lweyi angafa? Vaprofeta na vone vafile. U jula kutiyenca mani wene?”

54   Yesu ahlamula, aku: “Loko nitidzrumisa, kudzrumisiwa kwanga ahi ka nchumu. I Tatana wanga anidzrumisaka, lweyi n’wine miliki: ‘I Xikwembu xezru’.

55   Kambe n’wine amimutivanga, kasi mine namutiva. Ni loko niku animutivi, anitafana na n’wine, nindzruluka muhembi. Kambe namutiva funtsrhi nibekisa zritu dzrake.

56   Tatana wenu Abrahamu anyonxe svinene hilesvi aatavona siku dzranga, kutani adzrivonile, anyonxa.”

57   Kutani vajuda vaku ka yene: “Wene nhambi 50 wa malembe awu nawu, kambe uvone Abrahamu?!”

58   Yesu aku ka vone: “Nitiyisile nili ka n’wine: Na Abrahamu angesiva kone, mine nive kone.”

59   Kutani vazrola mazribze akuva vamukhandla ha wone, kambe Yesu atumbela agama ahuma atempeleni.