-
Johani 9
1 Kuteloko akhaluta, avona mun’we wanuna lweyi aangavoni kusukela apsaliwa.
2 Kutani vadondzrisiwa vake vamuvutisa, vaku: “Rabbi, hi mani lwadohiki? Hi lwewa mhunu kumbe hi vapsele vake, lesvi apsaliwiki na angavoni?”
3 Yesu ahlamula, aku: “Ahi lweyi wanuna angadoha, nhambi vapsele ahi vone vangadoha, kambe sviyencekele akuva mintizro ya Xikwembu yitakombekisiwa amhakeni yake.
4 Hifanela kutizra mintizro ya Lweyi anizrumiki na dambu dzrahavona; bzata wusiku lebzi svingetikikoteka kuva mhunu atizra.
5 Loko nahali la misaveni, ni livaningo dzra misava.”
6 Antsrhaku ka mazritu lawo, athukela ahansi apfuva misava ni mazri, atota ntsraka ya kone amatihlweni ya lweyo wanuna,
7 agama aku ka yene: “Famba axihlambelweni xa Silowami” (lesvindzrulutiwaka hi lidzrimi dzrin’wana sviku “Lwazrumiwiki”). Kutani afamba ayahlamba, abuya na avona.
8 Kutani vayakelani ni lava avazrange vamuvona lesvaku aali mukombeli avaku: “Xana ahi yene lweyi aahamba atsrhama akombela?”
9 Van’we avaku: “Hi yene.” Vambeni avaku: “Ihina, kambe ofana naye.” Yene aatizra kuhlaya lesvi: “Hi mine.”
10 Kutani vamuvutisa vaku: “Kutani ke, matihlo yaku mapfulekise kuyini?”
11 Ahlamula, aku: “Wanuna lwavitaniwaka Yesu apfuve ntsraka anitota ka matihlo, agama aku ka mine: ‘Famba uyahlamba le Silowami’. Kutani niyile niyahlamba niva nisungula kuvona.”
12 Kutani vaku ka yene: “A kwini mhunu wa kone?” Aku: “Anikutivi.”
13 Vayisa mhunu lweyi khale aangavoni ka vafarisi.
14 Kutani kuyenceke lesvaku siku ledzri Yesu apfuviki ntsraka ava amupfula matihlo akuli Savata.
15 Xilesvo vafarisi vatlhela vamuvutisa lesvaku asvikotise kuyini kuvona. Aku ka vone: “Aninamakete ntsraka amatihlweni, nigama niyahlamba; kutani navona.”
16 Van’we va vafarisi kutani avaku: “Lweyi ahi mhunu wa Xikwembu, hikuva angabekisi Savata.” Vambeni vaku: “Xana mhunu lweyi anga mudohi angasvikotisa kuyini kuyenca masingita ya kufana ni lawa?” Kutani kuva ni kuyavana amakazri kwavu.
17 Kutani vatlhela vaku ka lweyi khale aangavoni: “Uli yini hi yene, lesvi akupfuliki matihlo?” Kutani aku: “I muprofeta.”
18 Nhambitanu, vajuda avakholwanga lesvaku khale aangavoni ni lesvaku anyikiwe kuvona, vaza vavitana vapsele va mhunu lweyi kutani aavona.
19 Lesvi vavavutisiki, vaku: “Xana lweyi hi yene n’wanenu lweyi miliki apsaliwe na angavoni? Kutani ke, asvikotisa kuyini kuvona svosvi?”
20 Vapsele vake vahlamula, vaku: “Hasvitiva lesvaku lweyi i n’wanezru ni lesvaku apsaliwe na angavoni.
21 Kambe lesvaku svosvi avonisa kuyini, ahisvitivi; nhambi lweyi amupfuliki matihlo ahimutivi. Vutisani ye yene. I nkulu. Atatihlamulela.”
22 Vapsele vake avahlaya lesvo hilesvi avachava vajuda, hikuva vajuda kutani avatwanane lesvaku loko mhunu wa kukazri opfumela ka Kriste, mhunu lweyo aafanela kuhlongoliwa sinagogeni.
23 Hi svosvo svingayenca vapsele vake vaku “I nkulu. Vutisisani yene.”
24 Kutani vatlhela vavitana mhunu lweyi khale aangavoni ka wubidzri, vaku ka yene: “Dzrumisa Xikwembu; hasvitiva lesvaku mhunu lweyi i mudohi.”
25 Ahlamula, aku: “Kumbe i mudohi, anisvitivi. Lexi nixitivaka mine hi lesvaku aningavoni, kambe svosvi navona.”
26 Kutani vaku ka yene: “Akuyence yini? Akupfulise kuyini matihlo?”
27 Avahlamula, aku: “Mine nimibzelile kutani, kambe ke n’wine amiyingisetanga. Mijulela yini kutlhela misviyingela? Svili na n’wine mojula kuva vadondzrisiwa vake?”
28 Kutani vamuhleka, vaku: “Hi wene unga mudondzrisiwa wa mhunu lweyo, kambe hine hi vadondzrisiwa va Moxe.
29 Hasvitiva lesvaku Xikwembu xikhanele na Moxe, kambe lweyi ahikutivi lomu ahumaka kone.”
30 Lweyo wanuna avahlamula, aku: “Lesvi hi svone svihlamalisaka, lesvaku amikutivi lomu ahumaka kone, na kasi anipfule matihlo.
31 Hasvitiva lesvaku Xikwembu axiyingiseti vadohi, kambe loko mhunu achava Xikwembu ava ayenca kuzrandzra ka xone, xamuyingiseta.
32 Kusukela ka khale asvingisama sviyingeliwa lesvaku mhunu wa kukazri apfule matihlo ya mhunu wa kupsaliwa na angavoni.
33 Loko lweyi aangabuyi hi ka Xikwembu, inha angakoti kuyenca nchumu.”
34 Vamuhlamula, vaku: “Wene upsaliwe asvidohweni hi kuhelela, kutani svosvi ujula kudondzrisa hine?” Kutani vamuhlongola!
35 Yesu asviyingela lesvaku vamuhlongolile. Kutani loko atlhangane naye, aku: “Xana wapfumela ka N’wana wa Mhunu?”
36 Ahlamula aku: “Kone ke, i mani, we Hosi, akuva nitapfumela ka yene?”
37 Yesu aku ka yene: “Nhambi kumuvona umuvonile; nakone hi yelweyi avulavulanaka na wene.”
38 Aku ka yene: “Napfumela, we Hosi.” Agama amukhinsamela.
39 Yesu kutani aku: “Hi svosvo yavanyiso dzritiki amisaveni leyi ha svone, lesvaku lavangavonikiki vavona, ni lavavonaka vangavoni.”
40 Loko van’we va vafarisi lava avali kusuhi na yene vayingela mazritu lawa, vaku ka yene: “Sviliki na hine ahivoni lesvi?!”
41 Yesu aku ka vone: “Loko amingavoni, amingetidoha. Kambe lesvi miliki: ‘Havona’, xidoho xenu axisuki.”